It Seems There is Light || ဘာသာပြန် 《Completed》

Chapter 25:နားလည်မှုလွဲခြင်း

နှစ်သစ်ကူးပထမနေ့ပြီးနောက် ကျန်းယွမ်မှာ အမှန်တကယ်အဖျားကြီးလာ၏။

သူဆယ့်သုံးနှစ်ပြည့်သည့်နှစ်မှစ၍ ရှစ်အန်းမှာ ကျန်းယွမ်၏ကျန်းမာရေးအခြေအနေအပေါ် အလွန်ဆတ်ဆတ်ထိမခံ ဖြစ်လာခဲ့လေသည်။၎င်းက အသေးအဖွဲ့ကိစ္စမျှသာဖြစ်သည်ဟု ကျန်းယွမ်ကပြောသည့်တိုင် သူကတော့ ရက်အချို့ကြာမအိပ်မနေလောက်သည်အထိ ကျန်းယွမ်ကိုစောင့်ကြည့်ဂရုစိုက်ဆဲသာ။

သူက အခြားအရာများလုပ်ရန် အင်အားမရှိခဲ့ပေ။ကျန်းယွမ်၏ဖျားနာခြင်း သက်သာသွားပြီးနောက်မှသာ သူကယန်လျန့်ကို နှစ်သစ်ကူးပထမနေ့ပြီးကတည်းက မတွေ့ရတော့ကြောင်း သဘောပေါက်လာခဲ့လေသည်။

အခြေခံအားဖြင့် အားလပ်ရက်အတွင်း၌ ရှစ်အန်းမှာယန်လျန့်ကို နေ့တိုင်းတွေ့နိုင်လေသည်။ယန်လျန့်မှာ အခြားသူများ၏အိမ်သို့သွားရခြင်း သို့မဟုတ် လမ်းကြားရှိကလေးများနှင့် ကစားရန်ထွက်လာရခြင်းကို နှစ်သက်လေသည်။ရုတ်တရက် ထိုသူ့အားရက်အချို့ကြာမတွေ့ခဲ့ရသဖြင့် ရှစ်အန်းမှာအနည်းငယ်ကသိကအောက်ဖြစ်လာကာ သူ့နှလုံးသားကလည်း အနည်းငယ်မျှ အနှစ်သာရမဲ့နေခဲ့၏။

ဤရက်များ၌ သူတကယ်ကြီးကို အနည်းငယ်မျှပင်ပန်းနေခဲ့၏။တစ်မနက်လုံးအိပ်နေပြီးနောက် ရှစ်အန်းကယန်လျန့်ကိုမက်ဆေ့ချ်ပို့ကာ စာအတူလုပ်ချင်လားဟု မေးလိုက်လေသည်။

ယန်လျန့်ကသဘောတူကြောင်း အလျန်အမြန်ပြေဖြေလာခဲ့၏။ငါးမိနစ်မပြည့်မီ၌ပင် ယန်လျန့်က စာရွက်စာတမ်းများနှင့်အတူ သူ့အိမ်အောက်ထပ်၌ ရပ်နေလေသည်။

ရှစ်အန်းမှာ လွန်ခဲ့သောရက်အနည်းငယ်က ကောင်းကောင်းအနားမယူခဲ့ရဘဲ မျက်ကွင်းများညိုနေခဲ့သော်ငြားလည်း ယန်လျန့်၏မျက်ကွင်းညိုနေမှုက သူ့ထက်ပင်ပို၍ဆိုးနေလိမ့်မည်ဟု သူမျှော်လင့်မထားခဲ့မိ။

မျက်ကွင်းညိုများနှင့်လူနှစ်ယောက်မှာ တစ်နေရာတည်းကိုသာ ခဏကြာအောင် စိုက်ကြည့်နေမိကြလေသည်။

"အပေါ်ထပ်တက်ရအောင်"

ရှစ်အန်းက ယန်လျန့်ကိုအိမ်ထဲဝင်ခွင့်ပြုလိုက်ပြီး ဆိုင်တံခါးကို ပိတ်လိုက်၏။