دامِك سكنتي القلب اسمعي العلوم إنتي سبب فرحِتي ومسك الختام .

الجزء الثالث

الساعه ٧ المغرب ، قسم النساء
كانو البنات واقفين عند الباب يرحبون بالضيوف والمعازيم : يا هلا والله ومسهلا اسفرت وانورت واسفهلت ، حياكم الله جميعا
إبراق : يا هلا بك يا خاله
ام الباهي : هلابك يا قلبي ، الا انتي مين ؟
ابراق : انا إبراق بنت عياّش آل ضرغم
ام الباهي : والله والنعم
ابراق : ما عليك زود ،اقلطي الحريم بالمجلس
دخلت ام الباهي المجلس
نغم شهقت : هههيييءء بنات ام ثامر جت مع بنتها
هداد : كذااابه وينها ؟
نغم : ليه بتسلمين عليها ؟
هداد : لا بهج
نغم : شوفيها عند ابراق
هداد : الفرار بدخل المجلس
نغم بهمس :الله يعينني
ابراق بوضع لا تحسد عليه : حياك الله يا ام ثامر
ام ثامر : الله يحييك ، ابراق ولا انا غلطانه ؟
ابراق : لا ابراق مو غلطانه
ام ثامر : وراتس اللهم يا كافي ما اعرستي لا يكون فيتس بلاء ؟
ابراق وصبرها بدا ينفذ : ما جاء النصيب ، اقلطي انتي وبنتتس سميره حياكم الله
سميره بدلع يخلي الواحد يستفرغ : الا وين الفاشلات ؟
ابراق : اي فاشلات ؟
سميره : بنات اخوانتس الي ما خذو ولا شهاده
ابراق : ومن وين لتس ذا الكلام ؟
سميره : والله كلن يقوله ، الحمدلله انا صرت معلمه لغة عربية
ابراق : الله يوفقتس
دخلو المجلس
الجدة لولوه : شخبارتس يا ام الباهي عساتس بخير وبنعمه ؟
ام الباهي : والله الحمدلله اننا طيبين وبنعمه وانتم كيفكم وكيف بناتكم وعيالكم عساهم بخير ؟
الجده : الحمدلله والله حالنا يسرتس

تعريف بسيط عن ام الباهي
ام الباهي : انسانه حالها حال نفسها ومحترمه والكلمه منها تجبر الخاطر
الباهي : انسان صبور وووسيم وخلوق ومحترم ، دكتور اسنان عمره ٣١ سنه
السامي : جميل جدا ويفتن يحب الطقطقه وسعة الصدر لكن وقت الجد كل شي ينقلب ، محامي ، عنده مكتب عمره ٢٥ سنه

نرجع
دخلت عليهم غدق بكامل جمالها وزينتها الي تفتن كل العيون كانت تدور حولها معجبة واخرى حاسده : ماشاءالله من ذي ؟
الجده لولوه: هذي حفيدتي غَـدق بنت طلحة آل ضرغم
تفاوتت الأصوات وكلها : والنعم
جلست بجانب البنات وقعدو يسولفون لين قاطعهم صوت فلك الي يسمونها "المايعه" :
هاي بنات
البنات : هلا
فلك : يوه بنات شوفو شنطتي ماركة شاريتها ب ٢٠ الف
هداد بهمس : اتحدى اذا مو من البطحاء
غدق انفجرت ضحك : الله يقطع بليسك يا هداد
فلك وهي متنرفزه : نعم قلت شي غلط ؟
نغم : لا ما قلتي شي الا اشوف الشنطه
فلك اعطتها : ما الومك اول مره تشوفين شنطه ماركه
نغم وهي تسلك : اي اي صح
نغم فتحت الشنطه وشافت الخيوط مقطعه بشكل فوضوي ويوضح انها "تقليد" : اصليه اجل ؟ وش ذا الخيوط ؟
فلك توترت : هاه لا اقصد يعني هي انقطعت
غدق بهمس لهداد : ليتها ساكته
سميره : بنات تخيلو وانا داخله شافوني العيال واي
البنات انصدمو من جرائتها وتفكيرها المقرف وكيف انها تدور الأتنشن
فلك : اكيد خقو عليك من حلاوتك
سميره : اي اكيد
وحده من الحريم الي بالمجلس سألت نهال : يا نهال وش تشتغل بنتك ؟
نهال بتكبر : بنتي تدرس بمعهد رياضيات ماشاءالله
الحريم : ااي ماشاءالله
ام ناصر : والبنات الباقيات ماشاءالله ؟
دُنيا : انا بنتي غدق طب اطفال
اغادير : انا بنتي هداد محاماة وبنتي تغاني ثالث ثانوي
تقاء : انا بنتي نغم هندسة معمارية وهُتاف ثالث ثانوي
الحريم : ماشاءالله تبارك الله الله يوفقهم ويزيدهم علم
سميرة وفلك وجههم صار اسوود كانو يحسبون انهم ما درسو
سميره : بنات من هذا المز الي عند السيارة السوداء ؟
هداد :ليه تسالين ؟
سميره : اووف يخقق يجنن
فلك : اي يجنن يا حلوه
غدق شافت الدريشة وطلع الي عند السيارة النيّـار
جتها يُسر تركض تبي تجلس على حضنها : غدد غدد
غدق : نعم يعيون غدغد انتي وشو ؟
يُسر اشرت على الجده وفهمت غدق ان جدتها مناديتها وراحت لها : هلا يا جده
الجده لولوه: روحي غرفتي وجيبي البخور وجيبي حلاو ليُسر من الدرج
غدق : ابشري
طلعت من المجلس ركض على غرفة جدتها

قسم الرجال قبل نص ساعة :
:اقول ماشاءالله يا ابو حكيم (الجد عياش ) احفادك وش يشتغلون ؟
الجد عيّاش : اول احفادي النيّـار عنده شركه بإسمه ماشاءالله ، وثاني احفادي النـوفل طيّار ، وجبر وغانم يشتغلون بشركة العايلة ، يمن ومنذر يدرسون بكلية التقنية ، نمار يدرس ثالث متوسط
الرجال : ماشاءالله ،الله يزيدهم ، الله يبارك لهم ، الله يوفقهم
العم عايد بكل قلة ادب : اقول يا النيّـار كم صفقة وقعتها الى الان ؟
النيّـار وهو مو طاق له خبر : اعتقد ما تهمك عدد صفقاتي ولا هي شغلك
العم عايد تفشل
الجد عياش بهمس : حتى ولو يا بوك المفروض ما ترد عليه كذا
النيّـار بنفس همس الجد : يا جد تدخل بشي ما يعنيه
رن جواله وطلع برا عند سيارته : هلا صالح .. لقيت الاوراق ؟ ارسلها على رقمي الثاني وقل لعبدالله يرسل الاوراق الي عنده لازم ضروري تجيني اليوم ... كيف يعني ما خلصها كم صار له عنده ؟ اسبوع ما كفاه ؟ خلاص انا بكلمه وسكر
الو عبدالله وين الاوراق ما خلصتها .. يرجال هاتها ما احتاج الورقه الاخيره اصلا من عطاك اياها ؟

قسم النساء غرفة الجده تحديدًا:
:يربي وين ذا البخور يليل وينه فيه ، قعدت تتأمل الغرفه : هذا هووو ، اخذته وقعدت تدور حلويات يُسر : يسورري وين حلوياتها بعد ؟ هذي هي
اخذت البوكس حق الحلويات والبخور وطلعت تتوجه لمجلس الحريم: هذا البخور ياجده ، الا وين يُسر ؟
الجده لولوه : طلعت تلعب بالحوش روحي لها
غدق : ابشري
طلعت للحوش وصت كعبها يرن بكل الحوش : يُسر سوووسو تعالي جبت حلوياتك
يُسر : غدغددد شكرا ( بلغة الاطفال)
غدق : عفوا يا روح غدق انتي ، شرايك نصور ؟
يُسر اشرت براسها بالموافقة
فتحت غدق جوالها على الكاميرا وقعدت تصور يُسر وهي تدور بفستانها : يمامي يا حلو يسووري

عند النيّـار: اقولك جيب الاوراق بكره وانت جاي .. سمع صوت يُسر وهي تضحك اقول عبدالله بكره نتفاهم عالاوراق تمام ؟ وقفل
وهو يمشي لفت انتباهه البنت الي مع يُسر هي نفسها الي دخلت عليه الغرفه واخذت الاستشوار : غدغد ابي فلتر قطوه ( بلغة الاطفال )
غدق : يا عيون غدق ابشري يلا اختاري
النيّـار سمع اسمها وابتسم وهو يتوجه لمجلس الرجال بهمس : اجل طلعتي غدق بنت عمي طلحة
________________
مرحبا حبايبي عساكم بخير ؟ ، كل عام وانتم بخير رمضان كريم ، بخصوص التنزيل بالأنستا ترا يكون اسرع من الواتباد بكثير وخصوصا اننا داخلين على شهر رمضان الي بيكون التنزيل فيه تقريبا قبل السحور يوميا فالوتباد بيكون كل ٩ بارتات او اكثر بالانستا ، تشرفوني بالانستا والتيك توك جميعا💗
الانستا :lcvu.0
التيك توك :rwe.la