🚬"معـادلـة بـمجـهولـيـن"🚬
✒️ #SaFae_El_idrissi
الجزء 3:
وصلو للوطو وطلعات هي اللور وسمحمد ساگ بيهمم وولدو حداه..
زادو لدار سمحمد لي كانت قريبة لأرض الكيف لي كانو فيها (الأرض دإيبراهيم أب شوق وصاحبو ) ونيت علاقتو ماشي هي هاديك مع باها بغا يتطمن عليها عاد يسيفطها
دخلها لدارو لي كااانت كبيييرة وشاااسعة بحال دارهم
دخلو لوسط الدار كاينة جلسة تم جلسات هي وسمحمد حداها كيحاول يطمئن عليها واخا مكيتلقا منها تا شي جواب
وهو عارف ماشي إثر الصدمة طرا ليها هاكا راه ماشي اول مرة يحاول يتقرب منها وتصارع هي وياه تا كيسمعوها كتغوت من دارهم ولكن هي هاكا فالأصل غامضة لأبعد حد
جا رضوان شاد فيدو علبة إسعافات وقرب منها وهي غي كتشوف بنظرات فيهم حدة وخالين فنفس الوقت كتشتت بيهم بنادم مكيعرفها علاش مطوية..
شد مقص وبدا كيقطع داك التريكو المخطط لي لابسة تا بقات بلا كم شاف فالجرح وهو معبس (رضوان طالب كيقرا الطب فالأعوام الأولى ديالو)
رضوان:خاصها تخيط من الفوق باش تجمع الضربة غاارقة شوية
سمحمد بتأسف:الله يغبر ليه الشقف إواا شغنديرو دابا اولدي نديوها للسبيطار؟
شوق علات فيه عينيها السود بلا مبالاة:خيطها
رضوان :خاصها البنج مغتصبريش
شوق:انا قلت لك مغنصبرش؟ ، خيطها!
رضوان عصباتو:ملي تعواجي ليا هنا ولا تموتي شكون غيعقل عليا
شوق غمضات عينيها وحلاتهم دغيا كتحس بالضربة عاطياها الصداع محملاتش داك الإحساس
-عطيني نخيطها راسي
سمحمد عارفهم بزووج شوق عصبية بزااف وخاصها غا معامن و رضوان قال ليه متعرفيش..
سمحمد:صافي خيط ليها أولدي وحاول عليها
رضوان شاف تا عيا ودار ليگات فيديه شد برا عقمها ببريكة دار فيها الخيط وقرب ليها بعد ما نقا ليها الجرحة بدا الخياطة..غي خشا الخيط عبسات ملامحها وغوتات بلاما تحس
شوق:أععع بالشوية از* ب. ي واش دايرها بلعاني
خلاتو هو وباه حالين فمهم مصدومين من ديك الكلمة لي قالت
رضوان مخرج عينيه:شنو!! واش مكتمرگيييش
سمحمد كيبرد السوق وعاذرها حيت عارفها معامن كابرة!!!: صافي صافي كمل ليها بالشوية أولدي الله يرضي عليك
رضوان حرك راسو بلا حول ولا قوة ورجع كمل ليها وهو معصب أما هي غا معبسة ملامحهة و مزيرة على رجليها ما باغاش تصدر صوت الألم مرة أخرى ولكن داك الحريق لي كتحس بيه خيالي..
رضوان شداتو ضحكة خفيفة معرت لاش مقصحة راسها أش فيها لا تألمات قدامهم
كمل ليها ودور ليها فاصمة
على كتفهها
فحين سمحمد جاب ليها قبية ديال رضوان كحلة ومدها ليها.. تاهي فهمات وبلاما تسول حيدات القبية لي كانت لابسة بحذر.. بقات بسليب سماطي ولبساتها قدامهم خلاتهم غا كيدورو فعينيهم
و وقفات بشموخ بحالا عمرها تجرحات
شوق كتشوف فالباب: غنمشي
رضوان فخاطرو"حديييد! قولي غا شكرا"
سمحمد:تا ترتاحي ابنتي وسيري راه الطريق طويلة نوصلك؟
شوق:لا مرتاحة هاكا غنمشي رااسي بسلامة (وعطاتهم بالظهر)
رضوان بسخرية:لا شكر على واجب
شوق فهماتو ودارت عندو : لقيتي فيمن تتعلم نتا لي خاص تشكرني (شافت فسمحمد بتاسمات ونطقات بتقالة) بسلامة
خرجات وخلات رضوان شااعل باغي يتبعها يعطيها شي طرحة دالعصا كتعصبو
رضوان بغضب:شتيها أباا دابا دخلنا علك بالله واش هادي بنت !! مكتحشمش گااع
سمحمد: ونتا زعما كتحشم راه بحالك بحالها
#يتبع
أنت تقرأ
🌹معادلة بمجهولين 🌹( مكتملة )
Action#Alfa_stories ❌محلل النشر شرط الإحتفاظ بالغلاف وإسمي ❌ 🚬مـعــــادلـة بـمـجـهـولـيــن🚬 من تأليف وكتابة✒: #SaFae_El_idrissi "صفصف" ------- #معادلة_بمجهولين علمتني الرياضيات أن حركة الفاصلة تغير كل ا...
