Charmed Too Deep (COMPLETE)

Part 24

AMARI survived eating lunch with the Cabrons. It was easier than she thought, hindi rin siya nahiyang kumain nang madami. Sorry naman, hindi siya nag-breakfast kanina kaya gutom na gutom tuloy siya.

Kakain daw sila ng desserts sa labas ng bahay, sa malaking pergola sa likod. Ang anim na poste niyon ay inaakyatan ng bougainvillea na hitik sa iba't-ibang kulay na mga bulaklak.

"Ginawa mo talaga ang mga ito, iha?" manghang tanong ni Lucky kay Amari habang kinakain nito ang isang cinnamon roll.

Proud na tumango si Amari. "Opo."

"It's really good," ani Nick. "Makakadalawa yata ako."

"Ito na yata ang pinakamasarap na cinnamon bun na nakain ko," sabi ni Lucky pagkatapos ngumuya. "Magaling ka palang mag-bake, nagbebenta ka ba ng pastries? Aba'y willing akong bumili nito sa iyo, pa-meryenda ko sa mga ka-bingo ko. May pa-bingo kasi kami dito sa barangay twice a week, for charity. Iyong proceeds ay para sa gifts ng mga bata sa Pasko."

"Oh, that's nice po. Hindi po ako nagbebenta pero puwede ko naman po kayong ipag-bake na lang," nai-excite na sabi ni Amari kahit nagpu-protesta ang tamad self niya.

"Ay, naku, iha. Huwag namang libre. I'm willing to pay you, really. Iyon ay kung hindi naman makaabala sa iyo."

Nagpumilit si Amari. "Okay lang po iyon, consider it na lang na contribution ko sa project ninyo. Saka enjoy din pong mag-bake." Minumura na siya ng tamad self niya.

"I can help," prisinta ni Pierre na nag-raise hand pa. "Puwedeng ako na lang ang bumili ng baking supplies mo, at ako na rin magde-deliver kina Mommy," sabi nito kay Amari.

"Okay," nakangiting sabi niya rito.

"Kaso, delikado yata ang lagay ng abs ko pag ganito kasarap ang mga pastries mo," ani Pierre na sinundan ng malaking kagat sa cinnamon roll.

Pumalatak si Lucky. "Naku, Amari, pagsabihan mo nga iyang boyfriend mo. Masyadong vain sa looks niya—"

Hindi nito naituloy ang sasabihin dahil tinawag ito ni Vince na kagagaling sa loob ng bahay.

"Mommy, 'andito iyong ka-bingo mo. Sabi ko may bisita kayo pero hintayin ka pa rin daw," ika nito sa ina.

"Ay, si Marilen? Mamayang alas-kuwatro pa iyong bingo namin, ah," ani Lucky habang inuubos ang natitirang cinnamon bun.

"Makikitsismis na naman iyan," natatawang sabi ni Nick.

Tumawa ang misis nito. "Hayaan mo na, nag-iisang malapit na kapitbahay natin dito iyan."

"At nag-iisang source ninyo ng tsismis sa buong barangay," ani Pierre.

"Uy, kailangan ko ring malaman mga nangyayari sa paligid ko, 'no? So far, wala pa namang palya si Marilen," ika ni Lucky sabay tayo upang salubungin ang bisita.

Niyaya sa pergola ang sinasabing kapitbahay na reliable source ng tsismis at ipinakilala kay Amari.

"Anong barangay ka sa Estrella? Madami akong kamag-anak doon, doon nakatira ang isang kapatid ko ko," interview agad ni Marilen sa kanya na sinisipat siya mula ulo hanggang paa.

"Sa Asuncion po," sagot ni Amari.

"Ay, may pinsan ako diyan! Nakatira sa tabi ng plaza. Kilala mo si Cora?"

"Hindi po. Wala pa po ako gaanong kilala dahil bagong lipat lang ako doon."

"Ay, teka lang... Mukhang kilala kita!" bulalas ni Marilen. "Amari ba kamo ang pangalan mo? Ikaw rin ba si Amari Forteza, iyong taga-Asuncion na kakambal ni Nicci Forteza? Kwento sa akin ni Cora, tagadoon nga daw ang dalawang kapatid ni Nicci. Parang ikaw nga iyong nakita ko sa TV at Facebook."