Human Nature is Evil ||Completed||

Hold My Hold My Soul - 8

ဝမ်ရိပေါ်ရဲ့ကားဟာ တောင်ပတ်လမ်းတွေပေါ် ကွေ့ဝိုက်လို့ တာ့မေရှားရဲ့ တောင်တန်းတွေကြားထဲက သီးသန့်ဗီလာရှိရာကို မောင်းသွားနေတယ်။ ဒီဗီလာဟာ တောင်တန်းတွေရဲ့ အလယ်မှာ ရှိတာဖြစ်တယ်။ ၂၀၁၃ လောက်ကမှ ဆောက်ထားတဲ့ အိမ်ဖြစ်ပြီး တင်းကျပ်တဲ့ လုံခြုံရေးရှိတယ်။ Minimalist style ဟာ ကျယ်ဝန်းတဲ့အိမ်ကို ပိုပြီးတော့ ကြည့်ကောင်းစေတယ်။

တအိမ်လုံးမှာ ရှိတဲ့အရောင်ဆိုလို့ အိမ်ထဲ ဝင်ဝင်ချင်း တွေ့ရတဲ့ အနီရောင်ကျူးလစ်ပန်းခင်းကြီး ဖြစ်တယ်။ ဒီပန်းတွေဟာ လစဉ် နိုင်ငံခြားကနေ တင်ပို့တဲ့ အစေ့သစ်တွေကို စိုက်ပျိုးထားတာတွေဖြစ်တယ်။ ပုံမှန်ဆိုရင် ဝမ်ရိပေါ်က ဒီအိမ်ကြီးကို ဒီတိုင်း အသုံးမပြုဘဲ ပစ်ထားတယ်ဆိုပေမဲ့ အိမ်တော်ထိန်းမှာ လျစ်လျူရှုမထားရဲဘဲ သခင်လေးရှောင်ဝမ်ရဲ့ အကြိုက်အတိုင်း ထိန်းသိမ်းထားပေးတယ်။

ဗီလာရဲ့အနောက်ဘက်မှာ အပြာရောင်သမ်းတဲ့ ပင်လယ်ရှုခင်းရှိပြီး တောင်ခြေမှာတော့ ရှန်ကျန်း Overseas Chinese Town ရဲ့ ကစားကွင်းရှိတယ်။ အိမ်ပိုင်ရှင်က ဘာမှလုပ်စရာမရှိလို့ အောက်ကို ငုံ့ကြည့်လိုက်မယ်ဆိုရင် သစ်ပင်တွေ၊ တိမ်စိုင်ရေငွေ့တွေကြား ရံဖန်ရံခါး ဖြတ်သွားဖြတ်လာ လုပ်နေတတ်တဲ့ နိုင်ငံခြားသားခရီးသည်တွေကို တွေ့ရလိမ့်မယ်။ လူထူထူ ဆူညံတာမျိုး မရှိပေမဲ့လည်း အရမ်းကို လူသိများတဲ့နေရာဖြစ်တယ်။ ဘယ်လိုပြောရမလဲ၊ ဘုရားသခင်ရဲ့ ရှုထောင့်ကနေ ကြည့်နေရသလိုပဲ။ လက်ဖက်ရည်သောက်၊ အလ္လာပ သလ္လာပစကားပြောရင်း ကမ္ဘာကြီးကို ငုံ့ကြည့်နေရသလိုမျိုး။

လူတွေက ပြောကြတယ်။ တာ့မေရှားရဲ့ တောင်တန်းတွေထဲမှာ ဗီလာတွေ ထားရှိခြင်းဟာ ငွေအရမ်းပေါလို့ ဖြစ်ပြီး ဒီအတိုင်း မသုံးဘဲ အကြာကြီး ပစ်ထားတဲ့အခါ မြွေရိုင်းတွေကို မွေးမြူသလို ဖြစ်နေတတ်တာမျိုး ဖြစ်ရင်ဖြစ်၊ မဖြစ်ရင် သူတို့ရဲ့ အငယ်အနှောင်းတွေကို ဗီလာတွေထဲမှာ လာဝှက်ထားတာမျိုး ဖြစ်နေတတ်တယ်တဲ့။

ဝမ်ရိပေါ်က ပထမအုပ်စုမှာ ပါဝင်တယ်။

ဝမ်ရိပေါ်က ဒီအိမ်ကို မလာတာ အတော်ကို ကြာနေလို့ထင်တယ်။ အိမ်တော်ထိန်းမှာ အနည်းငယ် အံ့ဩသွားခဲ့တယ်။ တော်သေးတာက အိမ်စောင့်နဲ့ အိမ်တော်ထိန်းတို့ နှစ်ယောက်လုံးက ဒီအိမ်ကို သေချာစောင့်ရှောက် ရှင်းလင်းထားနိုင်တာမို့ အခုလိုမျိုး သူတို့သူဌေး ရှောင်ဝမ်က ညဘက်ကြီး တခြားလူငယ်တယောက်ကို အိမ်ရှိရာ ရုတ်တရက် ခေါ်လာခဲ့ရင်တောင် သူတို့ ကောင်းကောင်းပြင်ဆင်ပေးထားနိုင်တယ်။