Human Nature is Evil ||Completed||

Hold Me Hold My Soul - 22

ဝမ်ရိပေါ် အလုပ်တွေ အရမ်းရှုပ်နေတယ်။ သူက သူ့ကိုယ်သူ အနားမပေးဘူး။ မနက်ဆိုရင် စောစောထ အလုပ်သွားပြီး ညဆို အရမ်းနောက်ကျမှ အိမ်ပြန်လာတယ်။ ရှောင်းကျန့်လည်း ထို့အတူပဲ။ အဲ့တော့ နှစ်ယောက်သားဟာ တနေ့ကို အတူတူတွေ့ဖြစ်တဲ့အချိန်ဆိုတာ သိပ်မရှိဘူး။

ရံဖန်ရံခါမှာ ရှောင်းကျန့်က ဝမ်ရိပေါ်ကို မေးတတ်တယ်။ မြို့ထဲနဲ့ အဝေးကြီးမှာ ဘာလို့ နေတာလဲ၊ အလုပ်နဲ့ အိမ်နဲ့ အသွားအပြန် အဆင်မပြေဘူးလို့ မထင်ဘူးလားဆိုပြီး။ ဝမ်ရိပေါ်က ခပ်အေးအေးပဲ ပြန်ပြောတယ်။ သူ့အတွက်တော့ အဆင်မပြေတာ မရှိဘူးဆိုပြီး။ ဒါပေမဲ့ သူ ဒီအိမ်မှာ အရင်က မနေဖြစ်ခဲ့ဘူးဆိုတာကိုတော့ ထည့်မပြောခဲ့ဘူး။ ရှောင်းကျန့်က ဘာမှဆက်မတွေးတော့ဘူး။ သူ နေ့တိုင်း အိမ်ကို ဝမ်ရိပေါ်ထက် အရင်စောပြန်တယ်။ သူ အရမ်းပျင်းလာတဲ့အခါကျရင် ဝမ်ရိပေါ်ရဲ့ စာကြည့်ခန်းထဲက စာအုပ်စင်မှာ သူ ဖတ်ဖို့ စာအုပ်တွေ သွားရှာတတ်တယ်။ သူ အဲ့ဒီ "ကတိဖျက်သူ" ဆိုတဲ့ စာအုပ်ကို ၃ ကြိမ်တောင် ဖတ်ပြီးသွားပြီ။ အခုထိ သူ အားတိုင်း ပြန်ဖတ်နေတုန်းပဲ။

တခါတလေ ဝမ်ရိပေါ်က အလုပ်တွေ အရမ်းများလို့ အိမ်ကို ရက်အနည်းငယ်လောက် ပြန်မလာဖြစ်ဘူးဆိုရင် ရှောင်းကျန့်အတွက် အိမ်မှာ အပျင်းပြေဆော့ဖို့ jigsaw puzzles တွေ ဝယ်ပေးထားတတ်တယ်။ အစပိုင်းတုန်းကတော့ ယွမ် ၁၀၀၊ ၂၀၀ တန်လောက်ပဲ။ နောက်ပိုင်းမှာ တဖြည်းဖြည်းနဲ့ ယွမ် ၁၀၀၀ တန်၊ ၂၀၀၀ တန်လောက် ဖြစ်လာတယ်။ ဒါလေးတွေက ရှောင်းကျန့်အတွက်တော့ နည်းနည်းလောက်ပဲ တွေးရတဲ့ ကစားနည်းတွေပဲ။ သူ့အတွက် အခက်အခဲ မရှိဘူး။ ဒါပေမဲ့ တော်သေးတာက သူ့လို စိတ်ရောဂါလူနာတယောက်အနေနဲ့ ဒီလိုမျိုး ဖျက်လိုက်၊ ပြင်လိုက် ဂိမ်းထဲ သူ့စိတ်ကို နှစ်ထားခြင်းဟာ သူ့အတွက် စိတ်ကို ကုစားတဲ့ အချိန်တွေအဖြစ် သတ်မှတ်လို့ ရသွားတယ်။

ဝမ်ရိပေါ်ကလည်း အဲ့လို lego တွေ၊ puzzle တွေ ဆက်ရတာကို သဘောကျမှန်း သူ သိလိုက်ရတယ်။ သူ အရုပ်ဆက်တဲ့အချိန်က ရှောင်းကျန့်ထက် ၂ ဆ ပိုမြန်တယ်။ ယွမ် ၁၀၀၀ တန် puzzle ကို ဆက်ဖို့အတွက် ၁၀ မိနစ်ပဲ ကြာတယ်။ ဒါ အရမ်း အံ့ဩဖို့ကောင်းတယ်။ တခါတလေကျ ရှောင်းကျန့်က ဝမ်ရိပေါ်ကို မေးတတ်တယ်။ ဘာလို့ ဒီလောက်မြန်မြန် ဆက်နိုင်ရတာလဲလို့ပေါ့။ အဲ့ကျရင် ဝမ်ရိပေါ်က ပြန်ဖြေတယ်။ မွေးကတည်းက တော်လာတာဆိုပြီး။ ဒါပေမဲ့ သူ ရှောင်းကျန့်ကို ပြောမပြဖြစ်ခဲ့တဲ့ အမှန်တရားက သူ ငယ်ငယ်တုန်းက တောင်ပေါ်အိမ်ကြီးရဲ့ ထောင့်တနေရာမှာ ပုန်းကွယ်ရင်း အရုပ်တွေကို ဆက်နေခဲ့ရခြင်းကသာလျှင် သူ့ရဲ့ တခုတည်းသော စိတ်ပျော်ရာဖြစ်ခဲ့တယ်ဆိုတာကိုပေါ့။