Human Nature is Evil ||Completed||

Hold Me Hold My Soul - 30

အဟမ်း အဟမ်း!!
အရင်သတိပေးချက်တွေ အတိုင်းပါပဲ ချစ်တို့

မဖတ်ခင် တစ်ရှူးလေးတော့ အနားဆောင်ထားပေါ့နော် 🤭

Enjoy ~

°°°°°°°°°°°°°°°°°°°°°°°°°°°°°°°°°°°°°°°°°°°°°°°°

လတ်တလောမှာ ချီလုံရဲ့အခြေအနေဟာ အရမ်းကိုမှ သတိထားနေရတဲ့အခြေအနေ ဖြစ်နေတယ်။ အငယ်ဆုံးသားကို အမြဲ အရေးပေးခဲ့တဲ့ ဝမ်သခင်ကြီးဟာ သူ့သဘောထားတွေကို ညတွင်းချင်း ပြောင်းလဲလိုက်သလိုပဲ။ ဝမ်ရိပေါ်အကြောင်း ပြောတာကို မတွေ့ရဘူး။ သူ့ရဲ့ လှုပ်ရှားမှုတွေအပေါ် ကန့်သတ်ချက်တွေ ထားထားတာကို ဝမ်ရိပေါ် ရိပ်မိနေသလို လက်အောက်ငယ်သား လုံခြုံရေးအဆင့်လောက်ကအစ ဝမ်သခင်ကြီးတယောက် ရှက်စရာကောင်းတဲ့အခြေအနေကြား ရောက်နေတယ်ဆိုတာကို ရိပ်မိနေတယ်။

အောက်ပိုင်းကလူတွေဟာ အထက်ဘက်မှာ ဘယ်လိုအပြောင်းအလဲတွေ ဖြစ်လာနိုင်မလဲဆိုတာ ခန့်မှန်းကြတယ်။ အထက်ကလူတွေကတော့ အခြေအနေတွေကို ထိန်းသင့်တာထိန်းလို့ သူတို့ရဲ့အနေအထားကို ပြင်သင့်တာ ပြင်ကြတယ်။ ရလဒ်အနေနဲ့ ဝမ်ရိပေါ်ရဲ့ပခုံးပေါ် ကျလာတဲ့ ဖိအားတွေက အဆများစွာ ပိုပြီးတော့ လေးလံလာခဲ့တယ်။

ဒါဟာ သူ့အဖေဆီက သတိပေးလိုက်တာပဲဆိုတာ ဝမ်ရိပေါ် သိတယ်။ သူဟာ ဒီမိသားစုရဲ့ သံခြေကျင်းကနေ ဘယ်တော့မှ လွတ်မြောက်နိုင်မှာ မဟုတ်ဘူး။ ဝမ်မိသားစုက သူ့ကို လက်ထပ်စေချင်ရင် သူ လက်ထပ်ရမယ်။ ဝမ်မိသားစုက သူ့ကို အာဏာလွှဲပြောင်း ယူစေချင်တယ်ဆိုရင် သူဟာ မိသားစုထဲ အသင့်တော်ဆုံး အမွေဆက်ခံသူပဲ။ အဲ့လိုပဲ၊ သူ့အနေနဲ့ ဖယ်ရှားခံရတော့မယ်ဆိုရင်လည်း စင်မြင့်လယ်ကနေရာဟာ သူနဲ့ တဖြည်းဖြည်း ဝေးသွားတာကို ထိုင်ကြည့်နေရမှာဖြစ်ပြီး ရှက်ရွံဖွယ်အခြေအနေနဲ့အတူ ထွက်ခွာသွားရလိမ့်မယ်။

နောက်ဆုံးအချက်က အမှန်ဖြစ်လာမလားဆိုတာ သူ မသိဘူး။ ဒါပေမဲ့ အနည်းဆုံးတော့ သူဟာ လူတိုင်းရဲ့ စောင့်ကြည့်ခြင်းကို ခံနေရတယ်။

လောကကြီးမှာ လူတွေဟာ လူအချင်းချင်းလေးစားဖို့ထက် နတ်ဘုရားတွေကို အရင်လေးစားကြတယ်။ ဒီနေ့မှာလည်း လူတွေဟာ သူ့ကို နတ်ဘုရားတပါးလို သတ်မှတ်ပြီး သူ့ရဲ့ရာထူး၊ မျိုးရိုးအဆင့်အတန်း၊ ဂုဏ်သိက္ခာတွေကြောင့် လေးစားကြတာဖြစ်တယ်။ အကယ်၍များ သူသာ ချီလုံရဲ့ စွန့်ပစ်ခံ သားတယောက် ဖြစ်လာခဲ့ရင် လူတွေဟာ နတ်ဘုရားလို သတ်မှတ်ခဲ့တဲ့ သူ့ကို နောက်ကျောခိုင်းလို့ စီးပြီးသား ဖိနပ်စုတ်တရံလို သဘောထားလိမ့်မယ်။