مالكة قلبى

لا أريدك 32

صمت الجميع بعد جملة رقية القوية التى قالتها بطريقة جعلت الجميع ينظر بإتجاهها بدهشة كان صوتها ثابتا وصلبا وهى تعلن عن حبها وفى نفس الوقت رفضها لعمر كان غريبا أن تعترف بحبها بسهولة أمامه بوجه جامد يخلو من أى ملامح وصوت جاف حاد لا توجد به أى عاطفة وأكملت بنفس القوة:

وقلبى لو فضل يحبك هاقطعه بإيديا .. هاحرق كل صورى معاك وأقطع أوراقى اللى كتبتها عنك واحبس قلبى فى ضلوعى وأمنعه يحن ليك .. مش هانطق إسمك تانى ... هانساك ومش هافكر فيك , والحب اللى حافظت عليه 8 سنين فى قلبى هاقتله , كنت بأفكر فيك كل ثانية وكل دقيقة وقفلت قلبى عليك وكنت بأحلم باليوم اللى هارجع لك فيه تانى , كل يوم وكل دقيقة كنت بأستنى منك رسالة ترجع لى روحى وأنام وأنا باحلم برسالة من خيالى لكن إنت مبعتش أى حاجة .

ظهر الألم على وجه عمر وبلع ريقه بصعوبة وعجز عن التحدث أمام كلامها الذى فطر قلبه عليها وظل ينظر إلى وجهها وهو يحاول أن يبحث عن أى إشارة تعطيه الأمل ولكنه اصطدم بنظرتها الباردة وعيونها الجامدة وزاد ألمه عندما أكملت:

مش عايزاك تكون جزء من حياتى تانى , أنا خلاص مسحتك من ذاكرتى تماما.

صمت الجميع بعد كلامها وكان يعلو وجوههم الذهول من طريقتها وكلامها ولم يستطيع عمر أن يقف أكثر من ذلك ترنح فأسنده أحمد, لقد تغيرت رقية وإندهشو كيف أصبحت بهذه الصلابة وهذه القسوة , إقترب عمر منها ووقف أمامها بصعوبة وكان أكثرهم صدمة وتأثرا , حاولت رقية أن تظل عيونها جامدة أمامه وتمسك دموعها الوشيكة لقد أقسمت من قبل أنها لن تبكى من أجله ويجب أن تحافظ على هذا القسم وقال عمر:

إنت إتغيرتى قوى يارقية فين البنت الرقيقة المتسامحة ؟ فين رقية الرقيقة صاحبة النظرة المحبة والقلب الحنون ؟ فين رقية الناعمة المليانة بالحب والحيوية ؟

قاطعته بقوة قائلة :ماتت.

جفل عمر فقالت: رقية اللى بتقول عليها دى ماتت , إنت قتلتها

وقبل أن يتحدث عمر أكثر أكملت

إنت إخترت الفلوس وأنا إخترت أنساكم وأمسحكم من حياتى تماما

أنا بأحبك

إلتفتت له بغضب وقالت: أسكت.

أنا بأحبك يارقية , باحبك قوى قوى

إرتجف قلبها لسماع هذه الكلمة التي إنتظرتها منه من أول يوم عادت فيه ولكنها ضحكت بسخرية وقالت:

يآآه عمر بيك أوغلو بيعترف بحبه ؟ برافو , مستنى منى إيه بقى ؟ أطير فى الهواء وأجرى عليك أرمى نفسى فى حضنك وكأن مفيش أى حاجة حصلت وأرجع القصر وأنسى كل اللى حصل لى مش كده !! عايز تمسح كل ألمى ووجعى بكلمة واحدة؟؟؟؟ الكلمة دى لو كانت إتقالت يوم مارجعت كان الوضع إختلف كانت كل حاجة إتغيرت ويمكن كنت سامحتك لكن دلوقتى ملهاش قيمة مجرد حروف فارغة لا تعنى لى أى شئ