ملحوظة: الحكاية دي تعتبر تكملة للحكاية الأولى فـ خدوا لفة سريعة على أول حكاية و بعدين ابدأوا دي
___________________
دخلت مِن باب الشقّة و أنا بغنّي_أفرحوا يا بنات
يالّا و هيصوا رمضان اهو نور فوانيسُه.سِمعت صوتُه مِن جوا و هوّ بيطبّل و بيكمّل الأغنيه_يا حلاوة التين.
قولت بِمرح و أنا بتوجِه للمكَان اللّي هوّ فيه_الله الله.
_و القمر الدين.
رديت عليه_الله الله.
_و أكياس النُقل و قراطيسُه
و فـ نفس واحِد إحنا الأتنين قولنا_ويييي
قعدت على كنبه جنبه
_إيه اللي جابك بدري أنا معملتش أكل و كُنت مفكره انك هتتأخر!_مفيش اخدت إذن و روّحت بدري.
_أنا ماتت يا يوسف خلاص تعبت.
ضربني فـ كتفي بالراحة _بعد الشر يا هبله و بعدين دا لِسه بدري أوي يا فوفا لِسه قُدامك ٢ كُليه كمان و سنه إمتياز و تكليف و حِوارات أما أنا بقىٰ باشمهندس مليش في الحِوارات دي كُلها.
_حسبي اللّٰه يا يوسف.
قام و اتوجِه للمطبخ_هقوم أشوف هناكل إيه.
_وللّٰهِ رقبتي قد السمسمه يعني أنتَ متجوز عشان تقوم تشوفلنا هناكل إيه.
_أنا مِش متجوزك تطبخيلي و تغسلي و بعدين أنتِ بتتعبي في الكُليه يبقىٰ حرام عليَّ لما أحملك فوق طاقتك.
رَميتلُه بوسه في الهوا_يوسف خُد بوسه عشان أنا بحبك.
غيرت هدومي و أكلنا و عملت كوبايتين الشاي و جِبت كشكول و قلم
_إيه دا يا فوفا؟!
_طلبات لِرمضان خلاص فاضِل أسبوعين بس!
_أنا قلقان.
_أوعىٰ تخاف أنا سِت موفِره هتشوف.
قال بملل بعد ما شِرب مِن كوباية الشاي_أشجيني.
_بسم اللّٰه مبدأيًا كدا الياميش بُص يا سيدي عايزين كيلو سوداني متقشر عشان القطايف و زيهم جوز هِند عشان القطايف برضه و أكيد أكيد مفيش رمضان مِن غير قمر الدين فـ هنجيب لفتين مانجا و لفتين مشمش و برضه رمضان يعني بلح فـ هنجيب عشرة كيلو بلح...
قاطع كلامي بصدمه_إيه!!! ليه كُل دا إحنا فردين بس لو مِش واخده بالِك!
_بحب البلح يا يوسف.
_يا فلسطين دا الأُسر اللي متكونه مِن أربع و خمس افراد بيجيبوا خمسه كيلو بلح بس!
_يوه بقى خلاص نجيب سابعه كيلو.
أنت تقرأ
حَكاوي
Short Storyالسلام عليكم أنا مريم، بكتب اسكريبتات و قصص قصيرة بس مكنتش بتتشاف فـ قررت هجمعهم كلهم في روايه واحده و اسمها "حكاوي" كل فصل هيبقى حكايه جديده بأبطال جُداد عدد الحكاوي معرفش هُما قد إيه على حسب هي هتتشاف ولا لأ برضه