حَكاوي

الحِكاية التاسِعة_لا تأكل!!!

نِزلت مِن العربية واتوجِهت للبيوتي سِنتر المشهور في الطبقة المخملية بخطوات واثقة ونظرات ثابتة

رُحت المكان اللي بقعد فيه دايمًا وفي بنت قرّبت مني
_أستاذة كابر، حابّة تغيري لون شعرك المرة دي؟!

_ياريت عايزاه لون مطرقع، أحمر مثلًا، بس ياترى هيليق عليَّ؟!

_أنا من رأيّ هيليق عليكِ جدًا، ولا تحبي تحطي أكستنشن وتجربي؟!

_مبحبش أجرّب أنا بدوس علىٰ طول، دوسي يا هناء.

وكانت إشارة مِني عشان هناء تبدأ شُغلها

_هناء، هاتيلي حد يعملي ضوافري عشان عندي ايفينت مُهم وكمان عايزة "Makeup artist" شاطِر عشان ليلىٰ مسافرة.

_تمام يا أستاذة.

بدأت شُغلها وأنا طلعت سيجارة وطلبت إسبريسو عشان افوّق شوية، وبعد ساعات كتير كُنت "مُبهرة"

لون شعري كان مطرقع بس لايق عليَّ مع قصرُه، فستان إسود واصل لرُكبتي من غير أكمام وهيلز سوداء، ضوافري معمولة حِلو أوي ميكب عيوني رقيق عكس ذوقي بس طبعًا ضيفت لمستي وهي الروچ الأحمر كان شكلي مفيهوش ولا غلطة

خرجت من البيوتي سنتر ورِكبت عربيتي

_ايوا يا يور، ابعتيلي لوكيشن المطعم.

_طيب هقفل معاكِ وابعته، بس متتأخريش يا كابر عشان خاطري، في ناس تقيلة جاية الايفينت وعايزين نلحقلنا صفقة ولا حاجة.

رديت بثقة مايلة للغرور_إنتِ معاكِ كابر بدران، عارفة يعني إيه كابر ولا أعرفك يا ميار؟؟

_لأ، عارفة يعني إيه كابر صاحبتي يلا اقفلي بقىٰ عشان أكمل لِبس.

بعتتلي اللوكيشن كان مطعم كبير بيطل علىٰ النيل باين عليه الفخامة اوكيه "that's my type"

دخلت المطعم بثقة كعادتي، إبتسامة دبلوماسية مرسومة علىٰ وِشي

كُنت لافتة الانظار بـ طلتي ودا المطلوب اساسًا

رُحت لرجل أعمال مشهور وسلّمت عليه، رفع ايدي وباسها في مشهد كلاسيكي ومقزز للدرجة الأولى

إبتسمت بتكلف لما إتكلم_ آنسة كابر بنفسها جاية تسلّم عليَّ! دا يزيدني الشرف.

_ميرسي لزوقك يا أستاذ عامر.

وكانت البداية لكلام كتير في مَجال شُغلي لحد ما نفذت خططتي وكسبت صفقة جديدة مع رجل أعمال زي عامر الشاذلي

إستأذنت منه علىٰ وعد بمقابلة مرة كمان عشان نتكلم في التفاصيل

ميار كانت وصلت سلّمت عليها وهمست لها_don يا يور.