_البروچيكت الجديد هيبقى نقلة لواحد فيكم، أفضل مشروع هيتعمل صاحبه هيقدمه في المؤتمر العالمي اللي هيحصل بعد ٣ شهور مِن دلوقتي، "good luck" يا شباب بتمنالكم النجاح والتوفيق يا باشمهندسين.
خلّص كلامه وبدأنا نلم حاجتنا وقبل ما اخرج الباشمهندس أمجد ندهلي، هو يعتبر أكبر مُهندس فينا سنًا وخبرة
_نعم يا باشمهندس.
_أنا واثِق فيكِ وعايزك إنتِ اللي تقدمي البروچيكت، إبذلي أكبر مجهود يا رَوان عايزك ترفعي راسي.
اه ونسيت أقولكم ان الباشمهندس أمجد يبقى خالي وهوّ اللي رباني بعد وفاة ابويا هوَّ اللي حببني في الهندسة اساسًا
إبتسمت وقولت بِثقة_متقلقش يا باشمهندس هرفع راسك.
_وأنا مُتأكِد مِن دا، يلا علىٰ شُغلك يا هندسة.
رُحت مكتبي وأنا متوترة مبحبش حد يحط ثقته عليَّ أنا كتكوت صُغير علىٰ الكلام دا كله وللّٰه
رميت نفسي علىٰ الكُرسي بِعُنف
_براحة يا رَوان في إيه؟
لفيت راسي يمين وشمال بحاول أجمّع الصوت دا جاي منين
_دي أكيد هلاوس من المجهود اللي ببذلُه في الشُغل، هروّح أنام وابقىٰ فُل.
الصوت رِجع تاني_لأ دي مِش هلاوس إنتِ سامعة صح.
_بسم الله أنا عارفة ان صوت افكاري عالي بس مش لدرجة انه يخرم طبلة ودني! ولا يكنش عفريت!
اتنفضت من علىٰ الكُرسي وكُنت علىٰ وشك الهروب لحد ما سمعت صوت أنثوي جاي من الأوضة برضه
_أقعدي يا رَوان دا مش عفريت دا الكُرسي.
رديت بِرعب_الـ إيه!!!
_الكُرسي يا رَوان، أنا الكنبة اقعدي عشان نفهمك.
قولت بخوف_أكيد أنا بحلم، يا رب اصحىٰ يا رب.
رد الصوت الأنثوي بِحدة
_قولنا مش حِلم ولا نيلة أقعدي بقىٰ قرفتينا.
دموعي بدأت تنزل من الخضة، ما أنا مِش كُل يوم بكلم الكنب والكراسي يعني
قعدت علىٰ الكُرسي بس المرة دي بالراحة
_احنا إختارنا نتكلم معاكِ إنتِ بالذات عشان لاقيناكِ طيبة.
أنت تقرأ
حَكاوي
Short Storyالسلام عليكم أنا مريم، بكتب اسكريبتات و قصص قصيرة بس مكنتش بتتشاف فـ قررت هجمعهم كلهم في روايه واحده و اسمها "حكاوي" كل فصل هيبقى حكايه جديده بأبطال جُداد عدد الحكاوي معرفش هُما قد إيه على حسب هي هتتشاف ولا لأ برضه
