حَكاوي

الحِكاية السابعة عشر_مُسلمة ومسيحي..!!

_ماما أنا نازله الشغل بابا فين؟

_هيكون فين يعني!؟ نِزل المكتبة من صباحية ربنا.

_خلاص تمام أنا نازله باي يا سِت الكُل.

نِزلت جري على السَلالِم طبعًا واخر تلات سلالِم نطيتهم ورُحت لِـ بابا المكتبة.

_عمي وعم الناس إيه يا سيدي نِزلت من بدري ليه؟

_صباح الخير يا فُلتي قولت افتح أنا النهارده عشان عيسى هيجي متأخر.

_ربنا معاك يا حبيبي، أنا رايحه الشُغل وقولت اعدي عليك.

_عايزه فلوس يا فُله؟

_لا يا حبيبى معايا باقي المصروف وكمان المرتب موجود.

_ماشي خلي بالك من نفسك يا حبيبتي.

_باي يا حبيبي.

خرجت من المكتبة وإتوجهت للشركة اللي بشتغل فيها "المحمدي للاستيراد والتصدير" اكبر شركة في مجال الاستيراد والتصدير في مصر

دخلت الشركه وصبحت على زمايلي ودخلت مكتبي.

قعدت و بعديها بِـ شويه المصيبه حجي دخلت.

_فُلتي إيه اخبارك؟

_الحمدلله يا مُهره خير؟

ضحكت_على طول قفشاني كدا المهم كُنت عايزه النهارده اجازه.

_وأنا مالي يا مُهره!

_إحنا هنهزر! انتِ هنا نائب المُدير يعني ممكن تكتبي اجازه ليا يلا بقا يا لولو.

_عايزه الاجازه ليه؟

رفعت ايديها اللي فيها الدبله_هخرج مع عموري جوزي قرة عيني.

قولت بتعديل_خطيبك.

_تؤتؤ جوزي كاتِب عليَّا يبقى جوزي.

_طب مفيش اجازه.

_عشان خاطري بقى هدعيلك تتجوزي عيسى.

_انتِ عبيطه! عيسى مسيحي اساسًا يعني إستحالة تحصل، وبعدين تعالي هِنا إشمعنى عيسى!

_انتِ مشوفتيش بيبصلك إزاي ولا طريقتُه العسل معاكِ؟!

_لأ مشوفتش عشان هو اساسًا اسلوبه لطيف مع الكل.

غمزت لي_اسلوبه معاكِ الطف من الكُل يا عسل.

رديت بصرامة مُزيفة_بت بت اطلعي برا انا مش طيقاكِ.

_امضي علىٰ الاجازه بقى الله يخليكِ.

قولت بحزم _اخر اجازه الشهر دا وخِلص الكلام.
_اشطا جدًا.

وللاسف لأني مش بعرف ارفض لها طلب مضيت الاجازه وباستني وخرجِت.

رِجعت لِـ شُغلي تاني وفي البريك نزلت اجيب قهوة وحاجه اكلها عشان مفطرتش.