💕 မုန်းသူ့ကျိန်စာမပြေသည့်ရန်ငြိုး

💕 - 6

✍️ Unicode

ရှင်းသန့်မောင်လက်ထဲမှာကိုင်ထားတဲ့ နပြန်တောင်းကို အိမ်ရှေ့နတ်ထားဖို့အတွက်နတ်စင်ခပ်သေးသေးလုပ်ထားတဲ့ထောင့်တိုင်နားမှာမှောက်ခုံချလိုက်ပြီး အပေါ်ကနေပိတ်ဖြူစကိုခင်းလိုက်သည်။

နပြန်တောင်းလို့ခေါ်ကြပေမဲ့ စာနဲ့ရေးရင်တော့အနားပြန်တောင်းလို့ရေးရမည်ထင်သည်။အဖေကတော့ဒီလိုတောင်းကိုယက်ရတာလက်ဝင်တယ်လို့ပြောဖူးသည်။

တောင်းရဲ့အနားကိုအပေါ်မှာအဆုံးသတ်တာမဟုတ်ဘဲ ခေါက်ပြန်လှန်ချိုးချလိုက်ကာ တောင်းရဲ့လေးပုံတစ်ပုံလောက်မှာမှအနားသတ်ထားတာမို့ အခြားတောင်းတွေလိုအနားသတ်ကအပေါ်မှာမဟုတ်ဘဲ တောင်းရဲ့လေးပုံတစ်ပုံအပေါ်နားလောက်မှာပဲအနားသတ်ရှိတဲ့ဒီနပြန်တောင်းကလေးကိုရှင်းသန့်မောင်သဘောကျမိရပါသည်။

အိမ်ရှေ့နတ်ပူဇော်ပသရတာနဲ့ ဒီနပြန်တောင်းကဘယ်လိုပတ်သက်နေတာလဲဆိုတဲ့ရာဇဝင်ကိုတော့ရှင်းသန့်မောင်မသိပါ။မယ်အိမ်ရှေ့နတ်လုပ်တဲ့နောက်ကိုခဏခဏလိုက်ခဲ့ဖူးလို့သာ အိမ်ရှေ့နတ်ပူဇော်ပသရတာကိုအကျွမ်းတဝင်ဖြစ်နေခဲ့ခြင်းမို့ ဘယ်ပစ္စည်းကဘာအတွက်သုံးရတယ်ဆိုတာမျိုးအထိတော့ရှင်းသန့်မောင်နားမလည်ပါ။

ပိတ်ဖြူခင်းထားတဲ့‌အပေါ်ကနေ နှစ်ပေပတ်လည်သာသာလောက်ရှိမဲ့ဝါးကတ်ကလေးကိုတင်လိုက်သည်။ဝါးကတ်ဆိုပေမဲ့ခပ်ကျဲကျဲကလေးယက်ထားတာသာဖြစ်သည်။ဒီလိုယက်ထားမှလဲ ဝါးကိုလုပ်ထားတဲ့နတ်ဗူးလေးတွေကို ဝါးကတ်မှာထိုးထားနိုင်မည်ဖြစ်သည်။

နတ်ဗူးဆိုတာကလဲအထူးတလည်တော့မဟုတ်။ဝါးဆစ်ကိုအလယ်ကခံပြီးတစ်ဖက်ကဗူးလေးအတိုင်းထားကာ တစ်ဖက်က‌တော့ဝါးကတ်မှာထိုးစိုက်ဖို့အတွက် အချွန်လေးနှစ်ခုရအောင်ဓားနဲ့ခုတ်ထားခြင်းပင်ဖြစ်သည်။

အချွန်‌ဘက်ကဝါးကတ်မှာထိုးစိုက်ပြီး အပေါ်ထောင်နေတဲ့ဝါးဆစ်ဗူးလေးထဲကိုရေထည့်ကာ သပြေခက်သေးသေးနှစ်ညွန့်နဲ့‌မြက်တစ်မျိုးဖြစ်တဲ့မြေဇာမြက်ပင်နှစ်ပင်ကိုထိုးထည့်လိုက်သည်။

မြေပြင်မှာဆိုရင်တော့သိပ်မသိသာပေမဲ့ ဝါးဆစ်ဗူးလေးထဲရောက်သွားတဲ့အခါမှာတော့ မြေဇာမြက်ကလဲကြည့်လို့ကောင်းနေတတ်ပြန်သည်။နတ်ဗူးတွေထိုးစိုက်ပြီးတဲ့အခါမှကြက်သားမရည်ထည့်ထားတဲ့လင်ဗန်းကိုဝါးကတ်အပေါ်ကနေတင်လိုက်သည်။