قربان بلا ذنب

البـارت 22

#قربان بلا ذنب

لتنسون التصويت والتعليق على كل فقرة+متابعة الحساب فضلاً ❤️

قراءة ممتعة
"
يرد الحيل من أشتم گصايبها "

***********

سمار :- طول ما هو يحجي إني ساكتة واستمعلة
وعلامات الذهول والاستغراب مرسومه على وجهي
معقولة كل هاي الشغلات صايرة ويه يوسف ؟

- وشنو جان مكتوب بالورقة ؟

سألته رايدة أعرف شنو إلي صار بعد ما أخذ الورقة
منها ، سكت ثواني يالله حچه

يوسف :- أخذتها ورجعت للشغل وأنه كل عقلي وتفكيري يمها أريد بس أعرف شصاير وياها
وليش هيج حالتها

بس وصلت للمخبز لاكاني رواد ينتر نتر

رواد :- وين رحتتت أنت هااا

جاوبته بدون شعور وأصلا بالي مو يمه

يوسف :- هاا ما رحت بس اتذكرت شغله بالبيت ورحت علمودها

رواد :- خوش ، تعال يالله الوادم واكفه وبس أنه
ما الحك عليهم وأنت عفتني

يوسف :- اعذرني خليتك لوحدك

مشه كدامي وأنه وراء ، أشتغل واتحرك بس بالي
يشتغل بالتفكير وياي أريد بس كون
يخلص الوقت حتى أرجع للبيت واشوف شمكتوبلي بهاي الورقه

لحد ما صار الليل عزلنه ورجعت للبيت
بس وصلت وسلمت على أبويه گبل للغرفه بدون ما أغسل لو أبدل
كعدت بالكاع وطلعت الورقه فتحتها
بهتت ملامح وجهي من قريت المكتوب بيها

* السلام عليكم
أدري يمكن راح تكول عني مو خوش بنيه بس والله إني مو من البنات إلي عدهن سوالف مو خوش
بس انجبرت أسوي هل شيء

ما أعرف عنك شيء ولا منو أنت بس أسمك يوسف
هذا الاعرفه ، وجنت أشوف نظراتك وانتبه عليهن
ولا أدري إذا متأكدة منهن أو لأ

بس إلي أريدك تعرفه إذا مخليني ابالك ورايدني بالحلال استعجل بهل شيء ، أخوية يريد يجبرني على زواج إني ما رايدته..

يوسف :- مخلي أيدي على راسي ما مصدك القريته
شنو يعني معقولة أخوها يريد يجبرها ويزوجها

حسيت ناررر شبت ب گلبي وانه أتخيل هاي هي تتزوج وتنزف لواحد غيري وتنتهي سالفتنه كبل لأ تبدي ، كمت افتر بالغرفة والورقه بيدي مردتها مرد

شسوي شسوي شنو الحل هسه أريدها ياا الله دخيلك ودخيل أسمك رايدها بحلالك ماريد اخسرها

الحيرة كلتني أكل ضليت لأ أنه هيج ولا هيج
صفنت أدور على حل أسويه ماكوو
فزيت على دفعة الباب سيف دفعه ودخل

يوسف :- شبيكك لك أكو واحد هيج يدخل

سيف :- مادري راح يندفع الباب هيج
يالله شو بعدك لأ مبدل ولا سابح ، راح نتعشة وأنت بعدك