قربان بلا ذنب

البارت الأول

مساء الخير.....

#قُـربان بـلا ذنب

•••••••

جنت حاضنه إخواني التوم سيف وسما
كل واحد من جهة..
دافنه روسهم ب حضني أحاول ما اخليهم يسمعون
صوت صياح وعركة أمي وابوية.

بس ما اكدر صوت صياحهم عالي ما فكروا بينه
أو كالوا خاف نسمع وننرعب من عركتهم.
اباوع عليهم خايفين ومغمضين عيونهم قوي
ويرجفون:: دخيلك ربي لشوكت يبقون اهلي على هذا وضعهم ، اهديهم دخيلك..

درت عيني على يوسف أخوية أصغر مني ب سنة لأن إني الجبيرة..
سمار عمري ١٥ ويوسف ١٤ والتوم ١٣
جابتنه أمي سنه ورا سنه لهذا ماكو فرق بيناتنه
بس سنه وحدة.

:: اباوعله شابك ايديه على ركب رجليه ومدنك راسة
هادئ ما يصدر أي صوت.
ولو حقنه لأن تعودنه على هل وضع..

شوي وانفتح باب الغرفه ، دخلت أمي اباوع عليها وجهه أحمر من العصبيه..
أمي صاحبة بشرة بيضاء وحلوة كلش..
لأن خوالي كلهم حلوين وبيهم شكار.

احنه طالعين على أمي وماخذين جمالها وجمال خوالي ، صح إني مو شكرة بس بيضه واشبه لأمي كلش..
أما اخواني ماخذين شكار خوالي وبياض أمي.

اباوعلها الدمعه صايرة ب طرف عينها كوة لازمتها
أول ما شافتنه اجت أخذت اخواني حاضنتهم وتبوس بيهم..
باوعت علينا إني ويوسف واشرت ب أيدها
تعالوا ، رحنه يمها وتبوس بينه وتتحسر..

سألها سيف ::- ماما ليش أنتي وبابا تتعاركون

اباوعلها رجفت شفتها وجاوبته وصوتها كوة ينسمع
من الغصه:

- لأ حبيبي ما نتعارك بس چنه نحجي

باوعتلي وكالت::- سمورة كومي جيبي فراشات فرشيهن حتى ننام ..

- صار ماما ، رحت جبت فراشات وفرشتهن واحد بصف الثاني..
وكمنه تمددنه كلنه مخلين أمي بالنص وصايرين اثنين منا واثنين منا

: بهاي الليله نمنه صح ضجنه بسبب عركه اهلنه
بس مو أول مرة ، همه دائما هيج
يتعاركون بالليل ويرجعون الصبح يتصالحون

بس ما جنت أعرف هاي آخر ليله ننام بيها وأمي موجودة بالبيت ولا جان ابالي صوتها راح يختفي من بين اصواتنه..

: قاطين بالنومه ودفوا الفراش مغري ما يخلي الواحد يكوم..
فزيت اباوع على إخواني بعدهم نايمين بس مكان أمي فارغ مموجودة..

كمت طلعت من الغرفه ورحت لغرفة أهلي
جانت الساعه ب٧ ونص أكيد ابويه ما موجود
بالشغل هسه لأن دوامة ب ٦ ..

: فتحت باب غرفتهم ودخلت
شفت أمي واكفه اباب الكنتور وتطلع ملابس
من سمعت الباب انفتح دارت وجهه وشافتني
عيونها حزينه وبيهن قهر..
جانن حمر يمكن باجيه..