اكحل عيوني فيه لا صابني ضيق ويطيب م في خاطري من عيونه

بسم الله الرحمن الرحيم

🙏

اشرقت الشمس معلنه عن بدايه يوم مجهول نهايته ..
اليوم كان مهم لكل سكان قريه نجم ...
اصوات الناس بسوق وصوت لعب الاطفال وصراخهم كان يرن باذن ذياب الي جالس بالحوش ويتقهوى بجمود ملامحه كانت خاليه من اي تعبير رد السلام على هزاع الي جلس جنبه وهو يسحب القهوه له ويصب لنفسه : والله وبتصير مذبحه اليوم
ذياب وهو يناظر للفنجال الي متوسط يده : راح تصير اذا ما صار ابوي شيخ القبيله
قاطعهم طلوع خليفه الي كانت هيبته تسبق خطواته
كان البشت مزين ظهره العريض على كبر سنه الا انه ما انحنى
ذياب وهزاع قامو احترام له لين جلس معاهم وجلسو بعده
هزاع فز وهو يمد فنجال القهوه لابوه الي اخذه وهو يناظر لذياب : اليوم مابي اسمع صوتكم بالمجلس واي شي يصير يا تتكلمون بعقلكم يا لا اسمع صوتكم والي يختارونه اهل القريه راح نرضى به
هزاع وهو كاتم غضبه بقلبه : بس انت كان لك يد ببناء قريه نجم قبلك ما كانت الا صحراء ومو معروفه والحين صارت من اقوى القرى بسوق و السمعه وكلهم عارفين كل شي بفضل الله ثم فضلك بيكونون جاحدين لك اذا ما اختاروك شيخ لهم
ذياب بجمود : هزاع ابوي لا قال شي تقول تم
هزاع سكت وهو ينزل راسه : اعذرني يا بوي
خليفه : تعبت فيها مو عشان اصير شيخهم عشان جدكم رحمه الله عليه وصاني عليهم وكلامه للحين يرن باذني وصاني عليهم قبل يوصيني بنفسي واهلي ...
هز الفنجال دليل على اكتفاءه وقام : بطلع للمجلس قول لهادي يجيني طلع وهو يمشي بديره وكل من شافه سلم عليه واثنى عليه وكان فارض احترامه وهيبته على الكل ابتسم بقلبه وهو عارف ومتاكد ان الشيخه بتكون له لنه عارف انه ثمين بنسبه لسكان قريه نجم
هزاع بقهر : والله اني محترق ابي الوقت يمشي بسرعه عشان اطمن ان الشيخه لابوي مو لابو سعاد الغثيث الي مناشب ابوي بكل شي
ذياب : ارتاح وتطمن راح تكون له ... قام وطلع تارك هزاع منصدم من برودهم بس عجبه ثقه ذياب يعرف اخوه اذا قال شي لازم يتم
فز وهو يشوف الهنوف تركض طالعه من بيتهم وعلى راسها عباتها وقفها وهو يمسك يدها : بسم الله وش فيش طايره كذا انهبلتي
الهنوف : الحمد الله انك موجود بسرعه ودني لبيت عمتي خوله ابي اخذ منها غرض قبل تنتبه حصه علي والله تنتف شوشتي
هزاع بقق عيونه بصدمه وضربها بخفيف : عيب استحي على وجهش اسمها جدتي حصه مو حصه حاف انتي ما تعقلين مهما سوينا فيش
الهنوف مسكت طرف ثوبه بترجي : تكفى تكفى هزاع يالله ودني مكانها بعيده
هزاع : حظش ان الددسن عبيتها بنزين يالله قدامي بسرعه ولا بغير رايي ما خلص كلمته الا شافها طايره من جنبه ولحقها وهو يشوفها تركب بصندوق
ولحقها وهو يشوفها تركب بصندوق : قولي والله تبين تفشلينا من الصباح وش بيقولون اهل القريه عيال خليفه انجنوا اقول انزلي لا انزلك بشوشتش

الهنوف تاففت بقهر : والله اني حمامه محبوسه بذا البيت محد يقدرني
هزاع : محبوسه الا منحوسه يالله بس اركبي وانتي ساكته ولا خليت ذياب يوديش
الهنوف نزلت بسرعه : لا تكفى الا ذياب ذا محد يتكلم معاه عويذ الله من شرهه