اكحل عيوني فيه لا صابني ضيق ويطيب م في خاطري من عيونه

بسم الله الرحمن الرحيم (٢٩ )

نجد رفعت راسها بسرعه لما قال جملته الاخيره
ذياب كمل وابتسامه جميله مزينه ثغره : من بعد ذا الحضن صرت احاول اتجنبها مع ان كل مره تطيح عيني بعينها يرتعش قلبي كنت اقاوم بكل ما فيني ما انجذب لها ولا اسمح لنفسي اطيح بغرامها بس قلبي كان اقوى من إرادتي كل ما ابعد عنها انجذب لها اكثر
تعلقت فيها واستسلمت لمشاعري ذياب الي معروف بقسوته وبروده قدرت ذي البنت توصل لنطقه بقلبه محد وصلها
رفع يده ومسح دموعها الي نزلت : ما تدرين ي نجدي وش سويتي ب ذيابش
نجد ما قدرت تتحمل كلامه وحضنته وهي تدفن وجها بصدره
ذياب حاوطها  بكل قوته ولو ما يخاف عليها تتاذى كان دخلها بين ضلوعه
نجد كانت تشد عليه ودموعها علمت على ثوبه الابيض
بعدت عنه مع انها ما كانت تبي
ناظرت له ودها تقولها تبي تقول له احبك بس ما قدرت
ذياب مسح دموعها : خلاص مابي اشوف دموعش خلينا
سكت لما سمع الباب يدق ناظر لنجد وقال : اذا ما طلعت الهنوف ماني ذياب
نجد ضحكت وسحبت يدها من يده وهو راح فتح الباب وشاف بوجهه الهنوف والعنود وحصه والجده وامه وعمته كوثر
ولو ما الحيا منهم سكر الباب بوجيهم
دخلو لنهم كانو يبونه يلبسها الدبله وكانت حصه تبي تصور كل شي وتوثق

الساعه ١٢ الكل راح وبدت القاعه تخلى من الناس ما عدا اهل ذياب ونجد
وعند الرجال نفس الشي ذياب لما طلع من عند نجد راح لهم وجلس معاهم شوي و ودع رجال ديرته و صقر والعيال راحو معاهم لن ذياب راح يطردهم

لمو عفشهم ورجعو البيت ذياب كانت نجد معاه و الود وده ما يرجعها البيت ويهربون لابعد مكان بس امه كانت موصيته انه ما يقدر ياخذها الا بعد حفل الزواج وذياب ما بيده حيله دام كذا عاداتهم ماله الا الصبر
وقف سيارته قدام بيت نجد وناظر فيها وهو ساكت
ونجد توترت من نظراته واستحت منه
ذياب طول وهو يناظر فيها ونجد ما تحملت وفتحت الباب بتهرب
ذياب ضحك ونزل معاها وسكر سيارته ومسكها قبل تدخل : ما تبين تقولين لي شي
نجد ناظرت فيه لثواني وقالت بصوت خافت : تصبح على خير
سحبت نفسها ودخلت البيت بسرعه
ذياب سند ظهره على الباب وقال بنفسه : كان ودي تقولينها لي ي نجدي

نجد اول ما دخلت البيت شافتهم كلهم جالسين بصاله وياكلون كانت ميته جوع وجلست معاهم تسمع لكلامهم ومتجاهله الهنوف الي تسالها مليون سوال

اليوم الثاني بعد صلاه الظهر كلهم جالسين بصاله
الا البنات بسبب انهم نامو متاخر وللحين نايمين
الجده حصه : ها دامكم متجمعين كلكم شرايكم ناخذ نجد معانا ونسوي لها حفله بسيطه عندنا وانتهى

كوثر : لا ي عمه لازم اسوي لها زواج كبير مثلها مثل اختها
الجده حصه : وش هو له الخساير مره ثانيه تكفي الحفله الي سويناها لها
ذياب تكلم منهي النقاش : الزواج راح يصير بديره ولابد منه بس انتو حددو الوقت المناسب وحنا مستعدين
خلف : الانتظار ماله داعي وانا عمك اذا تبي الاسبوع الجاي ما اتوقع عندنا مشكله ولا ي كوثر
كوثر : اكيد ما عندنا مشكله ونجد باقي لها اشياء بسيطه بتخلصها ان شاء لله
عفاف : لا لا تستعجلون عليها خلوها على راحتها وقت ماهي تكون جاهزه عطونا خبر
الجده حصه : قالو لش انها جاهزه خلاص الاسبوع الجاي اجل احنا بكره ماشين وانتو الحقونا الاسبوع الجاي
خلف : ان شاء لله