اكحل عيوني فيه لا صابني ضيق ويطيب م في خاطري من عيونه

بسم الله الرحمن الرحيم ( ٢٥ )

ذياب لو ما الحيا قام سجد سجود شكر قدامه بس مثل الحزن : مو مشكله اهم شيء انتو ما يكون بخاطركم شي
معاذ : لا والله ما بخاطرنا شي وابوي لو ما كبر سنه وعجزه كان جاء لعندك يعتذر منك
ذياب : الحمد الله ما يحتاج جيتك تكفي
معاذ قام واستاذن منه وطلع ذياب ورفع راسه لسماء والابتسامه شاقه وجهه مستحيل يقدر يخبيها وش صار قبل شوي يعني خلاص انتهت السالفه
خلف ناظر فيه وضحك : تجملت وسلمت
ذياب حط يده على قلبه : اي والله الحمد الله والله ما تدري ي عم كيف الموضوع كان قاعد يقتلني كان فوق طاقتي
خلف : عارف انه كان كبير بس الحمد الله ربي يحبك وفرجها عنك يالله استانس ما بتتزوج
قاطعهم دخول هزاع والعيال بسرعه يبون يعرفون السالفه
ذياب قال لهم وصقر اكثر واحد كان مستانس كل الي صار بسببه هو

العيال قررو يجلسون مع ذياب ويكملون سهرتهم عنده بمناسبه الخبر الجميل ذا وذياب ما كان بالعهم يبي نجد تجي عشان يقول لها الي صار ما يبي احد يقول لها غيره حتى اصر على عمه خلف قبل يدخل عندهم ما يقول لهم الي صار
وفعلا خلف ما قال لهم وراح لغرفته ينام وهم تفرقو

بغرفه الهنوف ندى كانت نايمه وحاطه راسها على رجل نجد الي كانت تلعب بشعرها
الهنوف : قسم بالله صاير شي لازم اعرف احس بنتحر
نجد : روحي اسالي هزاع حتى انا جاني فضول
الهنوف : تبين تاكلين لحم ثلاث ايام على حسي
نجد : بعيد الشر خلاص اجلسي اصح صح ذياب كلمني
الهنوف اعتدلت بجلستها وقالت بصدمه : نعم بذمتش وش قال
نجد ناظرت اختها : نقصي صوتك ندى نايمه
الهنوف : معليش بس تحمست
نجد تنهدت : قال لي اقابله يبي يتكلم معاي
الهنوف بحماس : تمام وانتي وش قلتي له
نجد : طبعا ما بروح ما رديت وش تبيني اقول له اكيد بقابلك خلاص مابي اسمع شي ينكد علي اكثر
الهنوف : طيب يمكن انتي تقدرين تمنعينه يتزوج قوليها له اعترفي له مثل ما اعترف لش قولي له لا تتزوج
نجد ضحكت بسخريه : لما عطيتيني الشاهي وقلتي اوديه سمعته يقول لابوي انه راح يتزوجها وهو اعطى الرجال كلمه وما يختلف عنها
الهنوف تنهدت : يعني الي جاء اليوم اخوها اكيد بيتكلمون عن الزواج
نجد قلبت عيونها بغيض : ايه زيدي علي ما تقصرين
الهنوف : اسفه مو قصدي المهم روحي قابليه تكفين عشان نتاكد مين الي جاء وش يبي يمكن يطلع كل كلامنا وهم يالله نجد عشاني
نجد بعد تفكير اخذت جوالها وشافت الساعه صارت ٣ : انا بروح بس مو عشان اسمع منه عشان هو يسمع لي ما بخليها بخاطري راح اطلع كل الي بقلبي
الهنوف : بس نجد حبي لا تجيبين العيد وترفعين صوتش وتمدين يدش عشان سلامتش بس

نجد بعدت ندى عنها : معليك انا اوريه قامت تلبس عبايتها بتنزل له

بالمجلس ذياب متمدد بعد ما طلعو الشباب من عنده كان يشوف الساعه وفاقد الامل نزل غترته وحطها تحت راسه بينام ما غمض عيونه الا وحس بالباب الي فتح اول ما شافها فز وقام
نجد ما كانت تحسب انه نايم جت بتطلع بس ناداها : نجد
نجد وقفت وناظرت له وهي تحاول تجمع قوتها لازم تبهذله وما تضعف قدامه دخلت له
ذياب قرب منها والفرحه بانت بوجهه بس انصدم من صوتها العالي
نجد شالت كل مشاعر الحب على جهه ناظرت له بحده وكانت تناظر جبينه ما تبي تشوف عيونه لنها بتتلبك : اسمعني ولا تقاطعني انا مو لعبه بيدك وقت ما انت تبغى تلعب فيها لعبت اذا انت الشيخ ذياب انا نجد بنت خلف اذا انت نسيت ما ارضاها على نفسي من جهه تقول لي احبك ومن جهه تبغى تتزوج
بس تصدق الشرهه مو عليك علي انا الي كنت واثقه انك تنتظرني وتحبني صدق مثل ما انا احبك