' نِـسْيـان '

عِتَاب

•••••••••••••

١١:٣٠
مساء

منسدح على فراشي اطالع السقف بدون اهتمام وبالي مشغول ، اليوم ؟ اقش عفشي؟ قمت من السرير وفتحت دولابي ، يالله ملابسي كثيرة ! مالي خلق اقعد ارتب كل ذي الحوسة! طيب وش اسوي ؟ تنهدت بتعب ..مو الملابس وبس حتى اغراضي وش كثرها اظن حتى ماتكفي لدولابي القديم !

-" الله ياخذكم "

همست فيها بكره قاصد السملق عيال ابوي ، مادري وش دخلهم بس يستاهلون الدعوة ، سكرت الدولاب ورجعت انبطح على بطني مغمض عيوني احاول انام بس مخي ماوده ينطم وبعز هواجيسي فجاءة
رن جرس البيت ! غريبة من الي يجي بذي الحزة ؟ مالي خلق اقوم فقررت اتجاهل الي يدق الباب للحين ، يمكنه عزام يبي شيء ؟ عاد ينقلع يدز امها احد قاله اني جمعية خيرية؟

استمر طق الباب فاقمت من مكاني ماتأفف عاقد حاجبي ، اتجهت للحوش ولازال الجرس يرن

-" جااي جاي "

قلت بأنزعاج وفتحت الباب بسرعة ورفعت عيوني

وانصدمت !
اتسعت عيوني وتصنمت مكاني مو قادر اتحرك ! قدامي بالضبط واقفه وعيونها بعيوني!

امي!!

ماقدرت انطق حرف واحد متشنج من الصدمة ! وبمجرد شوفتها الحين قدامي حسيت بدمي يثور ! تقدمت لداخل متجاوزتني بصمت واتجهت للصالة ! كنت بسكر الباب بس شخص وقف الباب بساقه ! ناظرته ولا ارادي كشرت متقرف ..زوج امي ! وش صاير اليوم ! ليش جت الحين !!

-" لا حشيمة ولا ادب ! ابوك ما رباك زين يوم تقفل الباب في وجهه عمـ..."

قاطعت كلامه ومسكته مع ياقته دفعته ملصقه على الجدار خلفه بعصبية وهو يطالعني متفاجئ! بذات ذا الكلب مابلع له حرف !

-" انطم لاقص لسانك ! لاتجيب سيره ابوي على لسانك ياقذر تسمع !"

قلت له وهو مسك كفوفي ودفعني عنه بغضب

-" اقول اقول ترا متحمل اني مادفنك عشان امك بس ولا انت والتراب سوا "

قالها وانا حسيت بأصابعي تنفلت ! رفعت يدي ناوي الكمه بس الكلب مسك يدي ودفعني ورا وقال

-" ماني رايق لك الحين فارق لامك بس "

نسيتها ! رجعت شعري على ورا وتفلت عليه ثم مشيت بسرعة مسكر باب الحوش الثاني تحت سبه ودعاويه علي الله يمحقه ..مشيت للصالة ووقفت مكاني وانا اشوفها جالسة على الكنب بكل هدوء وفاكه حجابها ! نزلت عيوني بسرعة ! حسيت بلحظة ضعفت لما شفت وجهها ! مابي احط عيني بعينها ويبان علي الضعف ! حسيت بنوبة مشاعر غريبة ! عتاب او لوم او حقد او يمكن شوق ؟! مافهمني !