' نِـسْيـان '

تَرَدُّد

•••••••••••

ناظرت لعساف وعقدت حواجبي من نظراته اللي شوي وياكلني !؟ وقفت وانا حاط يديني بجيوبي ومشيت متجاهل له الا انه وقفني وهو يمسك ذراعي ونطق بنظرات غريبة

-" وينه ؟ "

رفعت حاجبي ورديت

-" شعليك ؟ "

سحبت يدي منه وطلعت برا الشقة وانا اودع رايد اللي اصلاً مو منتبه لي وهو يناظر لخاله بأستغراب ، وش يبي فيه مثلاً ؟ هو مباحث اكيد عارف ببلاويه ويبي يسوي له تم القبضة.. اللي يضحك بالموضوع اني ماعرف وش بلوته كل اللي اعرفه انه هو السبب في محسن انه ينسجن ليش ؟ مادري ..ليش هالعداوة ذي ؟ ما ادري ..وش السبب في بداية هالحرب كلها لنهايتها؟ مادري..بعدين ليش استغرب انه اخوي ؟ عشاني منبوذ ولا وش ؟

قلعته عن افكاري وطلبت اوبر لان يبدو ان رايد سحب علي ، انتظرته ولا طول جاء اخيراً وركبت معه وانا اوصف له البيت اللي ما كان بعيد اساساً عن العمارة ، كان اللي يسوق سعودي ..كنت احس بنظراته بأتجاهي ثم يرجع يناظر للطريق ثم يرجع يناظر فيني !؟

-" يالاخو معجب ؟ "

نطقتها بدون لا اناظر فيه ورد بسرعة وهو مبتسم، كيف عرفت انه مبتسم؟ لان نبرته توحي ذلك

-" وجهك مألوف بس "

يوم سمعت صوته على طول حسيته مألوف ! التفت له بسرعة وانصدمت انه اخو عزام ! هذا اخو عزام الكبير ! سويت نفسي غبي ولا علمته من انا ، بعدين فيه غباء كيف مايعرف من انا وانا نص عمري مخاوي اخوه الدلخ ! الغباء فيهم وراثة مايحتاج يخمن الواحد اذا هم اخوان او لا .. وصلني للبيت ونزلت جيت امشي بس نسيت ادفع له ! لفيت جسمي للشباك وجيت انطق لكنه سبقني وهو يقول بدهشة

-" ولد عبدالله ! "

قالها وهو يأشر على البيت ثم رجع يناظر فيني ، ابتسمت بتسليك ورديت

-" الله الله وصلت "

-" وانا اقول انك مألوف ! "

وضحك.. ضحكت معه بضحكات تسليكية تسد النفس ، والله عاد مالي خلقه شوي يوم مديت يدي عشان احاسبه لكنه وقفني وهو ينطق بسرعة وبحزم

-" لا يارجال علي بالطلاق ماتدفع ريال "

يحسبني برفض ؟ سويت خير يارجال..قلت

-" الله يجزاك خير "

-" على راسي ، اي خدمة شيء ؟ "

-" ابد سلامتك "

قلتها وحرك ، دخلت البيت وانا افكر ، عرفني بسرعة بسبب بيت ابوي ، ابوي كثير معارفه ، الكل يعرفه حرفياً وللحين خوياه مانقطعت اخبارهم يتواصلون مع يوسف ويشوفون الاخبار والحال بس ..اما الباقي عشان ماعندهم اخلاق محد التفت لهم ، دخلت للصالة وشفت صالح جالس على الكنبة وساند راسه على حافة الكنبة ومتكتف ويتنفس بهدوء !؟ نايم ؟ جيت ازعجه بس وقفت لما لمحت يوسف وهو يتجه له وهزه على خفيف عشان يصحى بس فجأة اجفل صالح يتفاجئ ونط مكانه خايف !!