' نِـسْيـان '

يَـوم

•••••••••••

واقف بتشتت يتلفت بضياع مع ناس كثير حوله وكلهم يتكلمون بس ماكنت اصواتهم واضحة وفيهم تعابير الصدمة ، عقد حواجبه بأستنكار وتقدم لشخص وهو مستغرب وسأل بصوت منخفض..

-" ليش الناس متجمعين هنا ؟ "

ناظره الشخص وهو ساكت ونظراته كانت غريبة عليه ثم تجاهله ومشي من قدامه بدون يجاوبه حتى ! أستغرب اكثر ومد يده عشان يمسكه بس فجاءة سمع صوت بعيد بس كان واضح وضوح الشمس

الصلاة على الميت يرحمكم الله

قرب اكثر وشاف الشيء الي الناس متجمعين عليه وانصدم صدمة جعلت من قلبه يتألم لما عرف او بالاحرى تذكر الكفن يرجع لمن و..

"""""""""""
الرياض
-١:٥٢-

فزيت من نومتي وانا أتنفس بسرعة وقابض على جهة قلبي بألم وعاقد حواجبي بخوف ! حسيت بأطراف جسمي ترتجف بذعر..لازال نفس الكابوس يزورني من ليلة لليلة ! انسدحت على ظهري وانا اتنهد واغطي عيوني بذراعي ، من بعد وفاه ابوي وهذا الحلم مايفارقني كأنه يستمتع بعذابي رغم مرت سنتين على وفاته الا اني احس الشعور كأنه من أمس.

تنهد بثقل شعور ووقفت بتمايل رايح اغسل وجهي ..حسيت بريقي جاف فا اتجهت للمطبخ اشرب مويه ...طفيت لمبات المطبخ ورجعت للغرفة حولت انام ثاني مرة بس ماقدرت !

ساعة ساعتين مرت وانا اتقلب على فراشي عجزت ! الله ياخذ الارق
فتحت عيوني وطالعت السقف بشرود ..شكل النوم انحاش ياليل والله مب وقته فجاءة داهم مسامعي صوت الاذان من المسجد القريب من بيتي ، رفعت جوالي وانا اشوف الساعة ٣:٣٠

أستغفرت وقمت من فراشي ، رفعت كفي امسك راسي بألم بعد ما سيّر علي الصداع المعتاد ، توضيت ثم اكلت مسّكن واتجهت للمسجد كعابي والحارة هدوء ما اسمع الا صوت السلق والقطاوي وهم يتهاوشون على الزبايل.

الحمدلله حسيت الصداع خف ..صفيت مع الناس وصليت ..خلصت وجلست مكاني وانا ادعي لابوي وان الله يفكني من هذي الكوابيس الا النهائية بعدها وقفت وجيت اطلع بس جزمتي مب موجودة ! بالله من يسرق مع ذا الفجر ! استهبال الوضع ؟ حسبي الله عاد هذي اغلى زبيرية عندي الله يكسر رجل الي اخذها ..تلفت ادورها منا مناك بس مالقيتها !

فجاءة قاطعني شخص مسكني مع كتفي وكان عزام خويي ناظرته مستغرب قال وهو عيونه مفقعه نوم ، مانتبهت لوجوده بالمسجد !

-" وش قاعد تدور؟ "

-" الزبيرية حقتي شفتها ؟ "