"احياناً قرارات كتيره بتكون سبب في اذى غيرنا، وبرضو القرارات دي نفسها بتخلي الزول يحسد غيرك على وجود شخص تاني في حياتهم، دا نفس الاحساس البحسو لمن اتذكر انو ابوي قاعد مع اولادو من مرتو التانيه ونحن قاعدين هنا مسؤولين عن نفسنا من ونحن صغار!، م بحسد اخواني بالمعنى الحرفي بس بقول ليه هم ونحن لا؟، صح تفكيري غلط وكل شي بس دا الواقع الانا عايشه فيهو، ساعات بحس بالنقص عشان معاهم وم معانا، علاقتي حلوه مع اخواني وابداً م بلومهم بالعكس انا بلوم ابوي عشان اخد قرار وفي الاخر نحن الضحيه" م قدرت امسك دموعي وللاسف نزلت زي كل مره وملت الدفتر، طوالي قفلتو ودخلتو في الدرج الجنب السرير بتاعي،واتغطيت بالبطانيه بتاعتي وبقيت بعاين للسقف وبتذكر في الفات، وتاني دموعي خذلتني ونزلت، فجأه الباب اتفتح بقوه وكان دا احمد اخوي طوالي بحركه سريعه مسحت دموعي قبل يفتح النور اول م فتحو جا علي وهو مبتسم وقال لي : هتون حبيبتي مالك لسه صاحيه؟
قلت ليهو: كنت هأنوم بس انت صحصحتني😂😂💔.
عاين لي وابتسم تاني وقال لي: طيب يلا النوم عشان بكره هتصحي بدري وراك نضافه مش بكره النضافه عليك؟
عاينت ليهو وقلت ليهو: طيب... تصبح على خير
قال لي: وانتي من اهل الخير
وطلع وقفل النور والباب معاه وانا حاولت انوم م قدرت تاني مسكت الدفتر بتاعي وعايزه اكتب اتذكرت البيت بكره علي ولازم انوم وفعلاً قفلت الدفتر ورقدت نمت...
#اعرفكم_علي💙!.
معاكم هتون انا البت الشايله مسؤوليه خالص م قدرها اليوم كلو بنضف وبطبخ وبقري اخواتي، ببساطه عايشه حياه اكبر مني بكتير كأني "أم"، عمري 18 سنه بس خليت الدراسه لأسباب، عندي اخت اصغر مني بسنتين اسمها شجن بتقرا تانيه ثانوي، وتاني عندي اخوي الكبير اسمو احمد ودا عمرو 24 سنه وشغال في العياده بتاعتو وشايل معاي البيت، واصغر واحد اسمو امجد في سادس وعمرو 11سنه عايشين في بيت برانا وامي متوفيه من امجد كان عمرو 5 سنوات، وابوي ابراهيم للاسف عايش بس م معانا عايش في بيتو التاني 💔 ونحن مرميين هنا"
#نرجع📌...
صحيت على صوت المنبه وعاينت كانت الساعه4:30 قمت مشيت غرفه شجن عشان اصحيها للصلاه
انا: شجن .. يابت اصحي
شجن: همممممم خليني انوم مالك ياخ!" واتقلبت على الجهه التانيه بعد غطت وشها بالبطانيه"
جيت عليها بعد فتحت النور وزحيت البطانيه من وشها قلت ليها: قومي الصلاه عارفه م فيها اتنين تلاته
ابت تقوم طوالي كوركت فيها قلت ليها: شجن انتي واحده كبيره قومي الصلاه
قامت وبقت بتأفف عاينت ليها بعد اتأكدت دخلت الحمام مشيت على غرفه امجد عشان اصحيهو كمان لقيت احمد ماشي الصلاه قلت ليهو:احمد اصبر خلي اخوك يمشي معاك
