صحيت وانا مسخنه عاينت للتلفون لقيت الساعه 3ونص ولعت الكشاف وطلعت برا لقيت احمد في الحوش كان جاي من الشارع قلت ليهو بإستغراب: الحاصل شنو ؟
احمد وهو محتار قال لي: والله م عارف الكهررباء مالها بس بيتنا وناس خالتو سميه وكم بيت قاطعين
ختيت يدي في راسي وحركت راسي وقلت ليهو: طيب والحل شنو نحن مش طالعين بعدين؟
احمد قال لي:اي وين المشكله هسي؟
قلت ليهو : م عملت الفطاير وفرن الغاز م شغال
عاين لي وانا بقيت بفكر فجأه احمد قال لي: رأيك شنو تمشي انتي وشجن وقصي البيت الورانا دا؟
قلت ليهو وانا مخلوعه: نمشي بيت العزابه دا وبرانا ؟
عاين لي وقال لي:معاك قصي وانا هأقعد مع الاولاد
سكت شويه م لقيت حل غير كدا قلت ليهو:طيب اتصل عليهم كلمهم هنجيهم بعدين زي الساعه7 كدا
احمد قال لي وهو داخل البيت: حاضر بكلمهم
بقيت قاعده في الحوش وبهبب بطرف توبي وقاعده فجأه جات شجن سألتني:الحاصل شنو؟
قلت ليهو: شكلو عطل
هزت راسها وقالت: غريبه .. المهم هنبدا قرايه متين نحن المره الفاتت قلتي لي نبدا امبارح وم بدينا
قلت ليها:م مشكله نبدا من بكره ان شاء الله
شجن قالت لي: يا زوله؟ اخر كلام؟
ضحكت وقلت ليها: اخر كلام ... اااا صحح ذكرتيني م سألت احمد اذا سجلكم ولا لا
شجن قالت لي: بيكون سجلنا لانو طلع امبارح لكن الصراحه م عارفاه طلع وين😂.
قلت ليها: خير بس ذكريني اسألو
حركت راسها وقامت وهي ماشه قالت لي: صحيني للصلاه ماشه انوم انا
قلت ليها: طيب واعملي حسابك هنمشي نعمل الفطاير والبيتزا في البيت الورانا دا
قالت لي بإستغراب:م كأنو البيت دا بيت عزابه؟
قلت ليها: اي صح كلامك بس هنمشي نحن وقصي
حركت لي راسها ومشت طوالي انا زاتي زهجت من القعده دخلت جوا طوالي سمعت صوت وجن بتبكي مشيت عليها شلتها وبقيت حايمه بيها في الغرفه لحدي م نامت بعدو بشويه الاذان الاول اذن مشيت اتوضيت وفرشت المصلايه وبقيت بقرا قران لحدي م الاذان اذن قمت مشيت صحيتهم واحمد وقصي والاولاد طلعو ونحن صلينا ومشينا المطبخ طوالي عملت الشاي وجهزت حاجات العجنه وبقينا منتظرين ناس قصي يجو لحدي م جو شربنا الشاي وقعدنا شويه وبعدها قلت لقصي: هييي ارح قدامنا امشي خبط ليهم الباب وانا وشجن بنحصلك
قصي حرك لي راسو وطلع بعدو مشيت لشجن كلمتها اننا ماشين قامت لبست توبها ومشينا ليهم لقينا الباب فاتح خبطناهو ودخلنا لقينا قصي واقف مع واحد كدا في الهول وبيتكلم معاه اول م دخلنا انا قلت: السلام عليكم
