احمد: هتوووون هتوووون انا طالع
جيت ماشه عليه وانا بتكلم في التلفون مع عمتي قلت ليهو: اصبر عشان تشيل معاك الزباله
احمد عاين لي بالجنبه كدا وانتظرني وانا مشيت جبت الكيس وجيت ولسه بتكلم مع عمتي شالو ومشى
انا: اي ياعمتي قاعدين برانا
قالت لي: طيب قصي ولدي دا جاي نازل السودان بعد بكره بخليهو ينزل عندكم يحرسكم وقت احمد في الشغل
طبعاً م قدرت اقول ليها لا قلت ليها: طيب بالسلامه يا عمتي
بعدو سلمت علي وقفلت الخط بقيت محتاره هنقعد معاه كيف انا وشجن واليوم كلو هنكون لابسين تياب او عبايات طوالي مشيت لشجن خبط الباب ودخلت ليها لقيتها مركبه السماعه شلتها من اضانها وقلت ليها: مش عارفه الزفت دي كعبه؟
قالت لي: عايزه شنو طيب
قلت ليها: قصي ولد عمتي نازل السودان بعد بكره وهينزل عندنا وطبعا م هأوصيك اللبس هيكون كيف
ركبت السماعه وقالت لي: طيب
طلعت مشيت المطبخ رتبتو بعدو جاني امجد شايل تلفوني قال لي: هتون امسكي دا احمد
حمرت ليهو وقلت ليهو: مش قلت ليك م ترد على التلفون من غير اذن؟
عاين لي ومشى وانا رديت لاحمد : مالك يا احمد
احمد: رسلي الحاجات سريع
انا: اااا طيب نسيت والله
احمد: يلا سريع
قفل مني ورسلت ليهو الرساله وبعدو مشيت غرفتي وبقيت قاعده وسرحانه طوالي شلت المذكره وبقيت بكتب " انا صح م محسسه اخواني بعدم وجود امي او يمكن حاسين او غيرو بس انا بجد اشتقت لأمي ولي هسي بلوم ابوي على العملو فيني اداني مسؤوليه اكبر مني وبسببها خليت دراستي، محتاجه راحه يوم واحد بس ارتاح فيهو، احمد يومي بيطلع االشغل وبيجي وانا طبيعي قاعده في البيت غسيل ومكوه ونضافه وشجن م بتساعدني الا بمزاجها وبعد دا كلو عمتي جايبه لي ولدها يقعد معانا وابوي جايب لي اخواني يقعدو معانا، ابداً م بزهج من وجود ضيوف معانا بس بزهج من تصرفاتهم، وان شاء الله الايام دي تعدي على خير💙.."
قفلت الدفتر وختيتو في الدرج جنبي وشلت تلفوني وعاينت لصور امي بعدو لمست رقبتي وعاينت للسلسل الانا لابساه دا كان اخر حاجه شلتها من امي ابتسمت واترحمت عليها وقفلت تلفوني وطلعت الحوش عندنا زي زرع كدا مشيت سقيتو ورجعت التلفزيون لقيت امجد بيحضر قعدت معاهو وانشغلت بتلفوني بعدو بشويه الجرس دقا قلت لأمجد يفتحو اتزهج كدا ومشى وكان دا احمد عاينت ليهو قلت ليهو: ليه اتأخرت كدا؟
امجد قال لي: بيكون لاقى الشباب تاني
احمد عاين ليهو واتكلم معاي وقال لي: والله لقيت في ناس جنبنا كدا بيرحلو جديد بس شكلهم عزابه
