ابتهال صحت الصباح لبست وهي طالعه لاقاها ابوها قال ليها: على وين؟
قالت ليهو: ماشه اشوف الاولاد
قال ليها بإستغراب: يادوب اتذكرتي اولادك؟
عاينت ليهو ودنقرت راسها وقالت ليهو: اشتقت ليهم واشتقت لحسهم في البيت
ابوها قال ليها: وانتي فاكره انهم هيرضو يقابلوك؟ بالذات هاني؟
ختت يدها في وشها وبقت تبكي وقالت: اعمل شنو يا ابوي والله الفيني انتهى هسي اولادي م هيرضو يجوني ولا بيتي اللاتخرب يا ابوي
قال ليها: بيتك دا خربتيهو بيددك ماف زول ضربك على يدك وقال ليك اعملي كدا واهملي اولادك
مسحت دموعها وقالت لابوها: بس يا ابوي هو زاتو ابراهيم م كان مساعدني في البيت
ابوها عاين ليها بإستغراب وقال ليها: عايزاهو يعمل شنو يا ابتهال يتقطع نصين عشان بيتك وبيت اولادو؟
ابتهال سكتت ابوها طوالي قال ليها: عايزه تشوفي اولادك امشي ليهم حسسيهم انك بتحبيهم
ابتهال قامت على حيلها ومشت ليهم اول م وصلت فتح ليها الباب امجد سلمت عليهو عادي ودخلت البيت جوا اول م شافتها وسن طوالي جرت دخلت لهاني جوا ووشها مليان دموع ابتهال قلبها وجعها عديل دخلت لقت ابراهيم قاعد وجنبو كبايه شاي سلمت عليهو وقالت ليهو: كيف صحتك ان شاء الله كويس
قال ليها: الحمدلله كويس الجابك شنو؟
قالت ليهو: جايه اشوف اولادي
ضحك وقال ليها: اولادك م عايزين يشوفوك
نزلت راسها وقالت: فعلاً وليهم حق العملتو فيهم م بسيط وهاني اكيد بيكون كرهني ووسن بقت تخاف مني
سكت ابراهيم وعاين ليها وم قال شي بعدها طوالي هي قامت ومشت البيت اول م ابوها جاها سألها قال ليها: كيف لقيتيهم؟
قالت ليهو والدموع في عيونها: م لاقيتهم يا ابوي ، وسن اول م شافتني خافت وجرت مني ولاقيت ابراهيم وقال لي هاني م نفسو يقابلني "دنقرت راسها وبقت تبكي وقالت" عملت شنو في نفسي وفي اولادي
ابوها جا عليها وقال ليها: اللبكاء م بيفيدك بشي انتي لازم تصلحي غلطك وم تقعدي تندمي كدا
قالت ليهو: كيف بس يا ابوي واولادي بقو يكرهوني
قال ليها: يابتي ماف شافع بيكرهه امو والحاجه دي مؤقته انتي هسي امشي ارقدي وبنلقى طريقه نرجعهم في صالحك
ابتهال حركت راسها ودخلت الغرفه ورقدت تلفونها اتصل ردت وقالت: م جايه انا اشربوها براكم
وقفلت التلفون ورقدت نامت وهي بتفكر في اولادها...
_____
شجن صحت استحمت ونزلت تحت الجنينه وكانت شايله دفتر في يدها بقت تحل في تمرين اداهو ليها قصي امبارح وفي قعدتها جات اقبال قعدت جنبها وهي مبتسمه وقالت ليها: القرايه كيف يا بتي
