اول م صحيت الصباح مشيت لشجن في الغرفه صحيتها وصحيت وسن قلت لوسن: يلا يحلوه امشي لهاني وامجد برا وخليني مع شجن شويه
وسن حركت لي راسها بمعنى "طيب" وطلعت وشجن بتعاين لي بإستغراب مشيت قفلت الباب وجيتها قلت ليها: شجن انتي واحده كبيره وعاقله وكلها سنه وهتدخلي الجامعه صح؟
حركت راسها وهي مركزه معاي واصلت طوالي: انا اختك وامك وصحبتك يا شجن، انا اختك وقت عايزاني اختك، وامك وقت انصحك واوعيك، وصحبتك لمن تجي تحكي لي اسرارك واي شي بيحصل معاك، انا كل ديل يا شجن صح؟
حركت راسها وقالت لي: اكيد
ابتسمت ليها وقلت ليها: طيب لو انا كل ديل ليه م بتجي وبتحكي لي؟
قالت لي بخوف: انتي عرفتي شنو؟
عاينت ليها وابتسمت ليها وقلت ليها: انا م عرفت شي بس عايزه اعرف منك واشوفك هتحكي لي ولا لا؟
سكتت مسافه وانا بعاين ليها لمن حسيتها م عايزه تحكي قمت على حيلي وقلت ليها: انا اختك الكبيره يا شجن وقت تحتاجيني بتلقيني وماف داعي للحواجز دي تعالي واحكي لي "ابتسمت" يلا نطلع برا عشان نشرب الشاي!
ابتسمت لي وطلعنا لقيناهم كلهم قاعدين وحتى وجن شايلها هاني صبحنا عليهم وقعدنا شربنا الشاي وشجن ساعدتني وحسيتها بتفكر وسرحانه في كلامي القبيل عاينت ليها وقلت ليها: شجنن
التفت علي وقالت لي: هااا!
قلت ليها: مش يفترض بعد دا نقرا لتالت؟
قالت لي: اي طوالي
قلت ليها: طيب بما انك ادبي يبقى التاريخ والقران هم العايزين حفظ والجغرافيا عايزه شرح طبعاً المهم نخلص ديل وبراجع ليك الانجليزي والرياضيات وكدا ممكن تنزلي المدرسه وانتي مرتاحه
عاينت لي وقالت لي: طيب امري لله نبدأ متين؟
قلت ليها: من بكره ان شاء الله
قالت لي: طيب حلو
وبعدو طلعنا هي مشت لوسن وانا مشيت سقيت الزرع واثناء م بسقيهو جاني كيس طاير من ورا وفيهو حاجه خفيفه مشيت قفلت الماسوره وشلت الكيس عاينت ليهو لقيتو كيس فيهو شويه سجاير بقيت محتاره جا من وين مشيت لأحمد جوا قلت ليهو: بتعرف واحد من جيرانا ديل بيسجر؟ "رفعت الكيس" دا لقيتو في الحوش
احمد بقى يفكر قال لي: اي واحد من الشباب الجنبنا ديل بمشي ليهم
قلت ليهو : طيب هاك "اديتو الكيس ومشى"
مشيت لقيت وجن قاعده وبتلعب في الارض وجنبها هاني وامجد عاينت ليهم وقلت ليهم: يلا امجد وهاني كل واحد فيكم يمشي حمام ويستحمى واتوضو بالمره عشان الضهر فعلاً قامو وانا شلت وجن ومشيت حميتها وسرحت ليها شعرها وبقيت بلعب معاها وهي بتضحك💙.. بعدها بشويه نزلت سمعت قصي واحمد بيتونسو
