ابتهال مشت طوالي على اولادها اول م دخلت سلمت على ابراهيم وهاني وشالت وجن الا وسن ابت تجيها ابراهيم بيتكلم معاها براحه وبعد تحانيس مشت ليها لبستهم وساقتهم ومشت وصلت بيتهم دخلت الاولاد وطلعت طوالي هنا هاني قال لجدو:امي لسه م خلت الطلعات؟
جدو قال ليهو: والله يا ولدي امك دي م كانت بتطلع ليها اسبوع تقريباً كدا
هاني سكت ونزل راسو بعدو بشويه جات امهم داخله سلمت عليهم وكانت شايله اكياس كتيره هاني سألها بإستغراب: كنتي وين؟
قالت ليهو:تعال كدي اقعد جنبي
جا وقعد جنبها وطلعت ليهو من الكيس بلايستيشن ولبس كوره
هاني وهو مخلوع قال ليها: كل دا لي؟
قالت ليهو:اكيد مش ولدي الكبير؟
حضن امو وابتسم وقال ليها:بحبك يا امي
ابتسمت ليهو وقالت ليهو: اجري نادي لي وسن
مشى نادا وسن جات وقعدت بعيد من امها مشت قعدت جنبها ولمن جات تقعد وسن زحت منها ابتهال ابتسمت ليهو والدموع في عيونها وقالت ليها: شوفي جبت ليك شنو؟
"ورفعت ليها الكيس"
طلعت ليها لعبه زي عده طبخ كدا وعروسه وسن بقت تنطط وابتسمت وشالت الالعاب ومشت ابتهال عاينت ليها واتنهدت ومشت لوجن قعدت معاها ونومتها في حضنها ونامت طوالي، ابتهال طلعت برا وبقت سرحانه جاها ابوها قال ليها: الحمدلله يابتي اولادك رجعو ليك باقي ترجعي لبيتك
ابتسمت ليهو وقالت ليهو: زهجت مني ولا شنو يابا؟
قال ليها: معقوله يابتي م عندي غيرك في الدنيا دي بس بكون مرتاح لمن تمشي بيتك وتكوني وسط راجلك واولادك
نزلت راسها وقالت ليهو: يابا م اعتقد انا وابراهيم نرجع تاني
قال ليها: لو لقاك كويسه مع الاولاد ومهتمه بيهم صدقيني هيرجعك
سكتت مسافه وبقت تفكر قالت ليهو: اها ولو م رجعني!
قال ليها: تمشي بيتك وتقعدي هناك بأولادك في النهايه داك بيتك
ابتهال حركت راسها بمعنى"طيب" وقامت دخلت لقت هاني بيلعب بالبلايستيشن ابتسمت لمن لقتو بيلعب مشت قعدت جنبو وقالت ليهو: باقي شهر وشويه على المدرسه
قال ليها: اي احمد سجل لينا انا وامجد في نفس المدرسه
قالت ليهو: رأيك شنو اجيب ليك امجد هنا؟
قال ليها بفرح:بجد ممكن يجي ويقعد معانا هنا؟
قالت ليهو: ممكن يجي يقعد هنا بس م طوالي كم اسبوع ويرجع عشان المدارس
قام على حيلو وقال ليها: عايز تلفونك اتصل عليهو
مدت ليهو تلفونها وقالت ليهو: كلمو وقول ليهو هأجي اسوقو بكره
