ابتهال اتغيرت تماما وبقت مهتمه بأولادها وابوها بينق ليها في موضوع الرجعه بس هي خجلانه تتكلم مع ابراهيم، وسن بقت عادي معاها بتلعب واي شي وهاني ككان نفس الشي وطبعاً معاهم امجد واخر ونسه وضحك وهزار جا ابوها قعد جنبها وقال ليها: يابتي م كفايه خلاص ترجعي لراجلك عشان اولادك
حركت راسها ابتهال وقالت ليهو: انا واولادي هنعيش هنا
ابوها سكت منها وقام قعد في العريشه وشال تلفونو واتصل على ابراهيم رد بعد زمان: الو
ابوها "عبدالمنعم": كيف يا ولدي ان شاء الله عافيه
ابراهيم قال ليهو: الحمدلله بخيير وانت كيف صحتك وابتهال والاولاد؟
عبدالمنعم قال ليهو: الحمدلله بخيرر بس باقي الاولاد وابتهال
ابراهيم رد ليهو بإستغراب: مالهم ان شاء الله خير
عبدالمنعم سكت شويه وقال ليهو: مش بعد يفترض ترجعهم؟
ابراهيم اتنهد وقال: انا فعلاً بفكر نرجع بيتنا تاني
ابتسم عبدالمنعم وقال: الله يكملك بعقلك ياولدي
ابراهيم قال ليهو: بس هأرجعها بعد ولدي يجي من السفر ان شاء الله
عبدالمنعم قال ليهو: خير يا ابراهيم
وقفل منو الخط جات ابتهال وهي مستغربه قالت ليهو: دا منو يابا؟
قال ليها: دا ابراهيم
قالت ليهو: وقال ليك شنو ؟
عبدالمنعم قام على حيلو وقال: قال كل خير يابتي كل خير
ومشى وخلاها وهي بقت قاعده ومُتمِحنه..
_____
طلعت لقيت البيت هادي والصاله انوراها مطفيه طلعت البلكونه لقيت عزام قاعد وبيسجر قعدت جنبو قلت ليهو: ممكن اتكلم معااك!
قال لي: ممكن
سكت شويه وقلت ليهو: ماف حاجه عايز تحكيها لي؟
عاين لي بإستغراب وقال لي: حاجه زي شنو؟
قلت ليهو: اي حاجه حاسه فيك شي ووانت كان قلت لي بتسجر عشان تنسى بيها همومك طيب وريني المتععه في الموضوع شنو عشان اجرب معاك
قال لي:تجربي شنو ؟
قلت ليهو: السجاره عشان انسى همومي زيك
حمر لي وقال لي:م تهزري معاي في كلام زي دا
قلت ليهو: اديني مره واحده بس م بتعمل شي
عزام عصب ووقف على حيلو وقال لي: ماف كلام زي دا وسريع خشي جوا
وقفت وقلت ليهو: في شنو لدا كلو ياتو هموم دي وريني طيب؟
قال لي: هموم وخلاص وبعدين وريتك ليها مالك تاني
