اول م دخلت المستشفى هبط عديل احمد مشى سأل الاستقبال من ابوي ونحن لسه واقفين جا قصي جاري علينا انا واحمد خلينا الاستقبال ومشينا معاه، طلعنا الطابق التالت لقيت شجن وامجد واقفين جو علي حضنتهم وقعدنا احمد وقصي واقفين وانا اتكلمت مع شجن قلت ليها: شجن الحصل شنو وكيف عرفتو انتو؟
مسحت دموعها وقالت لي: هو اتصل على احمد وم رد عليهو واتصل لي وكان تعبان حسيت بيهو م طبيعي وعرفت من كلامو انو ابتهال م معاهو "حركت راسي نظام عارفه في بيت ابوها وواصلت" ومشيت لقصي وكلمتو وجينا على هنا
نزلت راسي وبقيت بفكر في الحصل بين ابوي وابتهال وفي نص سرحتي الدكتور جا طالع مشينا عليهو كلنا احمد قال ليهو: اها مالو الوالد؟
الدكتور قال ليهو: كويس الحمد لله بس هسي اديناهو منوم عشان التوتر الهو فيهو وشكلو م نام لانو مرهق وماف شي بس السكري ارتفع شديد عشان كدا وهيصحى بالكتير بعد ساعتين
شكرنا الدكتور ومشى عاينت لأحمد وقلت ليهو: اكيد السوسه دي سبب في البيحصل دا!
احمد سكت وعاين لي عين" نظام دا م مكان للنقاش" مشيت منوو وقعدت جنب اخواني وبقيت بستغفر مرت ساعه بس حسيت امجد خلاص عايز ينوم ناديت احمد وقلت ليهو:احمد امشي انت واخواني وانا بقعد مع ابوي هنا ومعاي قصي
احمد حرك لي راسو وقال لي: لالا م ينفع امشي انتي وخلي شجن مع قصي عشان تعملي الغداء لأبوي بكره ونجيبو معانا
عاينت لقصي هز لي راسو طوالي مشيت لشجن وقلت ليها: خلي بالك من نفسك وانا بجي بكره بعد الضهر "وقربت منها وهمست ليها في اضانها وقلت ليها براحه" اوعك تتهوري وتعترفي خليك ثابته مفهوم؟
حركت لي راسها بمعنى"طيب" غمضت ليها عيوني وسقت امجد ومشينا مع احمد وصلنا البيت دخلت غرفتي وطوالي رقدت نمت💙...
_____
اول م هتون مشت قصي جا قعد جنب شجن، وشجن كانت بتفكر في الحاصل معاهم دا قصي قطع تفكيرها وقال ليها: اجيب ليك شي تاكليهو؟
حركت ليهو راسها وقالت ليهو: م عندي نفس
سكت منها وعاين قدامو وبقو ساكتين مرت زي ساعتين جا الدكتور طالع من الغرفه، قصي مشى عليهو وسألو قال ليهو: ااها طمنا يا دكتور!
قال ليهو: اطمن الوالد صحى وهسي هو كويس الحمد لله
ابتسم قصي وقال: الحمدلله ... تشكر يا دكتور
مشى الدكتور وهو جا لشجن قال ليها بإبتسامه: خاالو صحى والحمدلله
شجن رفعت عيونها وابتسمت ليهو ودنقرت راسها جا قعد جنبها قال ليها: مالك يا بت مش مفروض تكوني مبسوطه؟
قالت ليهو بصوت متقطع: فعلاً مبسوطه بس وجعي وتعبي اكتر من اني اكون مبسوطه "ومسحت دموعها "
