جا دخل وهو زهجان طوالي طلع سجاره وولعها وبينفخ بزهج وقاعد ومكشر جا داخل أنس رمى مفتاح العربيه وجا قعد جنبو
أنس:ارحم نفسك يا عزام
عزام عاين ليهو بالجنبه وواصل تدخين طوالي أنس شالها منو ورماها في الارض وطفاها عزام عاين ليهو وشال علبه السجاره وطلع وقف جنب باب الشارع وبقى يسجر فجأه سمع صوت احمد رفع راسو وسلم عليهو
احمد: اخبارك شنو ياخ؟
عزام: الحمدلله كلو تمام
احمد استأذن منو ومشى وهو لسه واقف فجأه سمع صوت اولاد بيتشاكلو وفي واحد كان هيفلق واحد بالحجر عزام طوالي اتدخل ومشى على جهتهم
عزام: هييي في شنو يا شباب؟
امجد: ياخ جاي من بعيد عايز يفلقني بالحجر!
الولد بقى يكورك وقال ليهو: م تفتري علينا عشان عندك عجله عايز ترفع نخرتك؟ هسي بجيب 10 زيهم
امجد عايز يرد طوالي عزام سكتو وقال ليهو: هوي في شنو م خلاص قفلو الموضوع
امجد عصب شديد وبقى بعاين لعزام قال ليهو: انت الدخلك شنو؟
قبل عزام يرد جاهو صوت واحده من ورا وكان معاها ولد،
هتون: الحاصل شنو يجماعه
عزام التفت عليها ولسه السجاره في خشمو اول م التفت نفخ الدخان وجا في وشها وكرده فعل هي كحت وكشرت وشها وقبلت منو وعاينت لأمجد مسكتو من يدو وجرتو ومشت وهي بتتكلم معاه قالت ليهو: مش قلت ليك خلي الشكل ؟
امجد: الولد هو الجا وقل ادبو معاي
هتون عاينت ليهو ومشو البيت، عزام عاين كدا لقى الشفع اتلهو في اللعب طوالي رجع ودخل البيت ورزع الباب بقوه وولع سجاره تانيه هو في الحوش سمع صوت هتون وهي بتكورك في امجد ابتسم ودخل جوا..
_______
هتون: ميه مره قلت ليك م تعمل لي مشاكل في الحله صح؟
امجد رد لي: انتي م فاهمه شي م تكوركي فيني من غير سبب
قبلت على هاني قلت ليهو: االحصل شنو يا هاني مالو اخوك؟
هاني قال لي: امجد كان حكى لي في واحد يومي بيجي بيشاكلو وهسي جا عليهو وعايز يفلقو بالحجر من غير سبب وامجد عايز يجيب حقو وعشان الحق الموضوع جيت ناديتك
عاينت لأمجد وقلت ليهو: بتعرف الولد دا؟
حرك لي راسو بمعنى "لا" وواصل وقال: بس غير انو معانا هنا في الحي م بعرف عنو شي
قبلت منو ودخلت وقلت ليهم: طيب امشو اتوضو انت وهاني عشان تصلو مسافه احمد وقصي يجو
مشو وانا مشيت المطبخ طفيت النار ومشيت لشجن في الغرفه لقيتها قالبه الغرفه فوق تحت عاينته ليها وربعت يدي قلت ليها: خير لزومو شنو كل دا؟
