عزام صحى تاني يوم اول شي مشى لهتون في غرفتها لقاها متغطيه جا عليها لقاها بطنطن براها زحا منها البطانيه لقاها محمومه شديد طوالي سندها ووداها الحمام فتح فيها الدش وهو زاتو دخل معاها طوالي حضنها عليهو وبقى مثبتها وهو زاتو تحت الدش بقت تفوق لقت عزام في وشها وقريب منها شديد عاين ليها بحنيه تاني حساها زي المدروخه شالها ووداها السرير غير ليها هدومها ورقدها وهو زاتو مشى غير هدومو وبقى يعمل ليها كمادات بقى قاعد معاها لحدي م بقت تصحصح💙.
_____
صحيت لقيت عزام خاتي يدو في راسي وفي حاجه بارده في جبهتي ورفعت راسي عزام زحا مني عاينت ليهو بعدو سألني قال لي:كيف بقيتي؟
قلت ليهو: مالي كنت؟
قال لي: كنتي محمومه شديد وهسي نزلت
شكرتو وخلاص عايزه انزل زحيت البطانيه لقيت روحي م لابسه نفس البجامه وعاينت لشعري لقيتو مبلول بس كوركت وانا مخلوعه : دا شنو دا؟
قال لي وهو مخلوع زاتو: بسم الله في شنو
قلت ليهو: دا شنو العملتو دا؟.
قال لي: لقيتك محمومه دخلتك الدش وهدومك اتبلت وغيرت ليك وين المشكله؟.
قلت ليهو: وكمان بتقول لي وين المشكله ؟
وقفت على حيلي وبقيت بضربو بيدي وبرجعو لورا وبقول ليهو: اطلع من هنا اطلع من هنا برا برا
بعد طلعتو رجعت سريري وبقيت ببكي تاني سكت بعد زمن واتذكرت هو عمل لي شنو وانا قابلتو بشنو بس برضو يستاهل قعدت مسافه في الغرفه حسيت روحي عطشانه طلعت مشيت شربت مويه وانا راجعه لقيتو طالع من البلكونه وريحتو سجاير جا ماشي بجنبي وقف وعينو في الارض قال لي: كيف بقيتي؟
قلت ليهو:تمام الحمد لله
م عمل شي مشى من غير م يعاين لي بقيت بلوم في نفسي عشان عاملتو كدا بس تاني اتذكرت هو قال متزوجني ليه صليت ورقدت نمت تاني 💙...
______
المره دي احمد صحى ولقى رنا نايمه بقى يعاين ليها ويهبش في خصلاتها الواقعه في عيونها وبيهمس ليها : رنا يا رنا
قالت:همممم
قال ليها: يلا قومي كفاك نوم م نفسك نتفسح؟
فتحت عيونها براحه وقالت ليهو: صباح الخير
باس جبهتها وقال ليها: صباح النور
هي بقت مخلوعه من تصرفو دا وملامح الاستغراب في وشها ظاهره قال ليها: مالك مستغربه مش مرتي؟
حركت راسها وقالت ليهو: مرتك
قال ليها : يلا ارح هنفطر برا الليله
ووقف في السرير واشر بيدو على العضلات وقال ليها بتحدي: هأتحدي حبيبك داك وانا الهأفوز
رنا ضحكت شديد هو زاتو بقى يضحك لضحكتها بعدو كل واحد مشى الحمام ولبسو ونزلو طوالي كانو اصلا نازلين في اوتيل قعدو وفطرو بعدو بقو يتمشو ويوريها المناطق وهي مبسوطه انها معاهو واثناء م هم ماشين وبيتونسو فجأه قال ليها: حبيبك اسمو منو؟
قالت ليهو: احمد انت ليه خاتي الموضوع في راسك
سكت وقال ليها: طبيعي اختو في راسي مش مرتي بتحب وانا اصلا اتزوجتها وعارف انها م بتحبني
وقفت وقربت منو شديد قالت ليهو: وكيف عرفت اني م بحبك؟
احمد قال ليها: ببساطه لأنك بتحبي
قالت ليهو : طيب اعمل رايح من الموضوع دا
سكت منها وبقو ماشين فجأه ضماها عليهو وهي ابتسمت وختت راسها في كتفو وبقو ماشين وفرحانه انو احمد الموضوع شاغلو معناها في مجال يحبها ودا البسطها زياده💙...
______
شجن صحت تاني يومي نزلت تحت لقت عمتها اقبال قاعده وبتشرب في الشاي قالت ليها: صباح الخير عمتي
قالت ليها: صباح النور مره ولدي
شجن خجلت ونزلت راسها اقبال قالت ليها: قصي منتظرك عشان ماشي الشغل
شجن قالت ليهة بإستغراب: منتظرني انا؟
اقبال حركت راسها وقالت ليها: شيلي صانيه الشاي جاهزه واشربي الشاي معاه
شجن قامت على حيلها وشالت الصانيه ومشت لقصي برا ختت الصانيه وقالت ليهو بخجل:صباح الخير
ابتسم ليها وقال ليها: صباح النور
قالت ليهو:عمتي قالت انت منتظرني "وقعدت"
قال ليها: بالظبط كدا عايز اشرب معاك الشاي واتناقش معاك في موضوع
شجن وهي بتكب الشاي قالت ليهو : احكي طيب
قال ليها: بالنسبه لموضوعنا انا وانتي طبعاً زي م عارفه هننزل السودان وهنعمل خطوبه بس وبعدها بإسبوع العقد وهيكون باقي اسبوع لمدرستك تنزليها ونحن عاقدين عشان خالي يطمن ونحن في البيت وانا هأكون مسؤول من قرايتك وكلمت خالي برضو وهو حاليا بيفتش لي شغل وان شاء الله كلو هيتسهل وبعد تالت هنعمل العرس اتفقنا؟
شجن كانت مركزه معاه ومركزه مع تعابير وشو وعن جديتو قالت ليهو وهي مبتسمه: اتفقنا
وشربو الشاي واتونسو وضحكو وكل واحد مشى يشوف شغلو قصي مشى الشغل وشجن مشت تقرا زي م وعدت قصي💙..
_______
"'جمِيلة هي بكل حُزن العالم💙.
*"عزّام"*
#يتبع💙🪐.
