تاني يوم ابراهيم قرر يمشي لإبتهال في بيتهم طوالي بعد صلى الضهر لبس جلابيتو وفات، خبط الباب فتح ليهو بعد مسافه ابوها دخلو وضيفو وقعد
ابوها: كيفك ياولدي ان شاء الله بخير
ابراهيم خت الكبايه وقال ليهو: بخير ياحاج انت اخبارك وصحتك كيف؟
ابوها: بخير نحمدالله
سكتو شويه بعدو ابراهيم قال: بس معليش ممكن تنادي لي ابتهال
فجأه الباب دقا مرتين بورا بعض ابوها اشر على الباب وقال: ياها بتكون هي
وكان قايم يفتح الباب ابراهيم قال ليهو يقعد وفعلاً مشى فتح الباب ابتهال اول م شافتو اتخلعت قالت ليهو:اجي يا راجل متين جيت؟
وقف عاين ليها مسافه وقال ليها: انتي طالق يا ابتهال وورقتك بتصلك بكره وم عندك اولاد عندي
زحاها وكورك لابوها وقال ليهو: يلا يا حاج انا مشيت
وفات بعدها وصل البيت اول م دخل قعد شويه وهتون جابت ليهو الدواء بتاعو فجأه جو داخلين احمد وهاني
ابراهيم قال لأحمد: اها الدكتور قال شنو
احمد قعد ومد ليهو الكيس وقال ليهو: دي مراهم بس يمسحها هاني والمواعيد مكتوبه في الروشته
ابراهيم شال الكيس واداهو لهتون وقال ليها: معليش يابتي هاك الدواء وسوقي هاني لاخواتو ومسحي ليهو المرهم ولاحظي للمواعيد
هتون حركت راسها وساقت هاني وفاتت
ابراهيم قعد على حيلو وقال لأحمد: طلقت ابتهال
احمد بإستغراب قال: ليه في شنو؟
ابراهيم عاين ليهو وقال ليهو: ابتهال اتزوجتها قبل امك تتوفى وكانت مسيطره علي بي كلو وامك الله يرحمها م قصرت منها شديد بس قصرت وغير كدا بعدتني منكم ويا ولدي عايز اعيش الباقي من عمري بين اولادي واطمن عليكم قبال افوت
احمد سكت مسافه وقال ليهو: ربنا يطول في عمرك يا أبوي بس اخواني الصغار ذنبهم شنو يعيشو بعيدين من امهم وهي عايشه ؟ كان تفكر فيهم
ابراهيم قال ليهو: فكرت فيهم ولقيت احسن العيال يكونو بعيدين من امهم م شايف ضربت اخوك هاني كيف؟
احمد وقف على حيلو وقال ليهو: الفيهو الخير يحصل، عن اذنك يا ابوي
وطلع من الغرفه ومشى على غرفتو بقى ينادي هتون جاتو بعد زمن وهي شايله وجن....
____
اول م ابوي جا داخل حسيتو زي المهموم كدا فات وقعد في غرفتو بعدو بشويه جا احمد داخل ومعاه هاني وكتبو لهاني مراهم وكدا ابوي قال لي امشي مع هاني غرفتي وفعلا مشيت غرفتي ولقيت امجد قاعد مع اخواتو وبيلعب معاهم قعدت انا وهاني قعد جنبي وبقيت امسح ليهو جسمو قلت ليهو: بتوجعك؟
