ابتهال جات داخله وهي بتعاين لبتها بإشمئزاز وعاينت لهاني قالت ليهو بكواريك: اختك دي م شايفها وسخانه كيف؟ امشي سريع غير ليها
عاين ليها وقال ليها: كنتي وين؟
جات عليهو ومسكتو من يدو ورفعتها فوق وبتهز فيهو قالت ليهو: ابوك م بيسألني كنت وين جاي تسألني انت؟
هاني فكا يدو بسرعه ومشى لاختو شالها ونادا وسن ومشو الحمام عشان يحموها ويغيرو ليها هاني قال لوسن: وسن انتي كبي لي مويه عشان الدش م شغال وانا هأجيب الطشت لانو وجن عادي ممكن تقع مني
عاينت ليهو وحركت راسها بمعنى "طيب" بعد حماها وغسل ليها شعرها قال ليها: وسن جيبي البشكير
بعد جابتو ليهو نشفها وغطاها وطلعو قال لوسن : يلا سرحي وجن وانا هأمشي الدكان اجيب شيبس ولبان مش بتحبيهم؟
قالت ليهو: اي 🥺
خت يدو في راسها ومسح بيها على راسها براحه وقال ليها: يلا سرحي لوجن انا بمشي وبجي💙..
طلع هاني عاين بقى يفتش امو بعيونو م لقاها عرفها بتكون طلعت تاني للجيران طبيعي هي حايمه في الحله طلع مشى وجا لقى وسن بتلعب مع وجن ابتسم مشى عمل البزازه وجا ادها البزازه وبقى يلعبها ووسن بقت تحضر التلفزيون قال ليها: وسن امشي حضري كم غيار كدا وختيهم في شنطه المدرسه بتاعتي عشان هنمشي لناس هتون
طوالي ابتسمت وجرت مشت حضرت الهدوم وجات لهاني وبقو بيحضر التلفزيون وبياكلو الشيبس بعدها بشويه جا داخل ابوهم هاني رفع راسو ومشى سلم عليهو وقعد
ابراهيم: وين امك يا هاني؟
قال ليهو: م عارفها بتكون عند الجيران
ابراهيم مسك تلفونو وبقى بيتصل عليها ابت ترد
ابراهيم قال لهاني: كلمت اخوك يجي يسوقكم؟
هاني حرك راسو وقال ليهو: بيجي الصباح بكره قال
ابراهيم حرك راسو يعني"تمام"بعد شويه سمعو صوت ابتهال بتكورك وجايه من برا قالت : ابراهيم؟ ماشي تودي اولادي هناك بيت الفقر ديل؟
ابراهيم طوالي قام على حيلو وقال ليها:كنتي وين يا مدام
قالت ليهو : انا بسألك اول هتودي اولادي هناك؟
قال ليها بعد قعد والتفت على التلفزيون: اديت الاولاد كلمه وهاني واختو عايزين يمشو وهاني قال هيسوق وجن معاه
قعدت في الكرسي جنبو وقالت ليهو: وجن صغيره م هتمشي من جنبي
هاني طوالي قال ليها: اختي بسوقها معاي عشان تطلعي براحتك انتي
وقبل منها وبقى بيحضر في التلفزيون
طوالي ابتهال قايمه عليهو عشان تضربو ابراهيم وقف قدامها وقال ليها: م عمل شي عشان تضربيهو وبعدين انتي كنتي وين؟
