شجن وقصي اول م وصلو استقبلتهم ام قصي وسلمت عليها سلام حلو وشجن اطمنت شويه رغم التوتر الفيها اول م ركبو العربيه شجن بقت تعاين للشوارع وقصي مبسوط ومرتاح عشان جنبو 💙.
ام قصي"اقبال": كيف خليتي ابوك واخوانك يا بتي ان شاء الله كويسين
شجن ردت عليها وقالت بإبتسامه: كويسين الحمد لله بيسلمو عليك
اقبال قالت ليها: الحمد لله
وبعدها سكتو وشجن رجعت تاني تعاين بالشباك وصلو البيت اقبال قالت للسواق يرفع الشنط وهم دخلو ،شجن بقت تتلفت برضو وماشه جنب قصي وبتعاين للبيت اول م دخلت لقت جنينه صغيره كدا وفيها مرجيحه، وصلو البيت جوا اول م دخلو اقبال قالت ليها: غرفتك فوق جنب غرفه قصي
شجن عاينت لقصي وابتسمت ليها اقبال طوالي قالت لقصي:امشي وصل شجن غرفتها وانا هأعمل كم حاجه وهأطلع فوق والسواق رفع الشنط فوق
قصي قال لشجن:يلا؟
شجن ابتسمت ومشت ورا قصي اول م طلعت لقت في زي ممر كدا فيهو مزهريات واضاءه خافته وحلوه حتى في الغرف اول م وصلو قصي قال ليها: بعد دا البيت بيتك ومن وقت للتاني هأطلعك وهأقريك وكلو
شجن قالت ليهو: طيب
شجن عايزه تدخل وقصي قبل عايز يمشي شجن وقفتو وقالت ليهو: قصي
قصي قبل عليها وقال ليها براحه: عايزه حاجه؟
قالت ليهو: انت ليه بتعمل معاي كل دا؟
قصي سكت مسافه وسرح في عيونها وقال ليها: عشان انتي بت خالي الصغيره"وضحك"
شجن عاينت ليهو وقالت ليهو بإبتسامه: انا م بت خالك الصغيره لسه في وسن ووجن
قصي ضحك تاني وقال ليها: وانتي زيك زيهم واحد
كشرت وشها وقالت ليهو:شكراً شديد
قصي قال ليها: يا ساتر يا رب خلاص م زيهم م زيهم ابتسمي يلا
ابتسمت وقالت ليهو:شكراً تاني
قصي ابتسم هو كمان و قال ليها: وانا م عملت حاجه💙.
وبعدو اي زول مشى غرفتو، شجن اول م دخلت الغرفه عجبتها شديد مرتبه ولقت حمام جوا طوالي فتحت الشنطه ورتبت هدومها في الدولاب وبعدو شالت غيار ودخلت تستحمى بعد طلعت لبست عبايه وطرحه ومشت خبطت الباب لقصي، فتح ليها الباب وقال ليها: اهلا اهلا في غرفتي
ابتسمت وقالت ليهو: عايزه التلفون بس اتصل على هتون اطمنها علي
حرك راسو وقال ليها: انزلي تحت وانا هأركب الشريحه وهأجيك تتكلمي براحتك
قالت ليهو: طيب
ومشت نزلت لقت عمتها بترتب المطبخ طوالي دخلت وبقت تساعدها اقبال قالت ليها: الليله البت م جات عشان كدا
