احمد بينادي في رنا وم بترد مشى المطبخ وم لقاها ومشى الغرفه قعد بزهج وقال بينو وبين نفسو" تكون مشت وين وهي م بتعرف زول هنا" اتأخرت شويه وقال ينزل تحت يشرب قهوه، فجأه جات رنا داخله ومعاها واحد وبتضحك احمد لمحها من بعيد بقى م قادر يتحرك قاعد وبيعاين ليهم وقفت مسافه معاه واحمد قام مشى عليهم وقال ليها: شرفتي يامدام
رنا خافت زميلها دا يحس بشي طوالي قالت ليهو: دا عادل ويا عادل دا احمد زوجي
مد يدو احمد عاين ليدو ورفع عينو ومسك يد رنا وبقى ضاغط عليها وطلعو فوق اول م دخل البيت فكى يدها بقوه وقال ليها وهو معصب وبيكورك: دا حبيبك الحكيتي لي عنو صح؟ جايباهو لحدي هنا؟
رنا عايزه تتكلم قاطعها بعصبيه وقال ليها: م ممكن تكوني واطيه للدرجه دي
وعايز يضربها هي نزلت الاكياس من يدها وختت يدها في وشها قبل م يدو تصل وشها مسك يدو وضغط عليها عاين ليها لقى الدموع في وشها طوالي دخلت الغرفه وهو طلع ولسه معصب
_____
قصي صحى وهو مبسوط عاين للخاتم الفي يدو والساعه كمان نزل طوالي ولاقى امو سلم عليها في راسها وقعد وهو مبتسم
اقبال قالت ليهو: م كانت هديه منها يا ولدي
قال ليها وهو مبتسم: محظوظ بيها شديد يا امي
اقبال ابتسمت ليهو وقالت ليهو: ربنا يجمعكم بحلالو
قال ليها: امييين يا امي
جات نازله شجن ولسه نعسانه صبحت عليهم وقعدت
اقبال قالت ليها: مالك يا بتي
قالت ليها:نعسانه والله
قصي حب يهزر معاها قال ليها بنبره حاده: تنومي هسي وتصحي تقري عشان لمن اجي م تنومي لي زي يومتها
ابتسمت شجن بخجل وقالت ليهو: بمشي بعمل قهوه وبقرا م تخاف قوم امشي شغلك بس
قال ليها: دي طرده ولا شنو يا بت؟
رفعت حاجبها وقالت ليهو: مش من حقي ؟
وقف على حيلو وغمز ليها وقال ليها: من حقك يا ست البنات
امو قبضتو طوالي شالت المسند وفنتو وقالت ليهو: خلي عندك ادب ياولد وامشي لشغلك شليتنا من الصباح
وهو ماشي خلاص قال ليهم:هتشتاقو لي عارفكم انا سلام سلام
امو ضحكت وشجن ابتسمت
اقبال قالت ليها: دا ولدي الوحيد ياشجن
عاينت ليها بإستغراب واقبال واصلت وقالت ليها: غالي علي شديد علاقتنا م علاقه ام وولدها علاقتنا علاقه واحد وصحبتو، حنين علي شديد وم بيرضى فيني شي ولا في ابوهو الله يرحمه ولدي بفتخر انو ولدي بجد راجل وحمش وبيسد عين الشمس
