Alter The Game

Chapter 11

Chapter 11

"Mauro—"

Halos mapa-talon ako sa kinauupuan ko nang marinig ko iyong boses ni Papa. Hinihintay ko na matapos sa pagkulo iyong tubig dahil magluluto ako ng pancit canton. Midnight snack ko. Kailangan kong mag-aral pa dahil sayang naman effort ni Atty. Marroquin kung hindi mataas grades ko ngayong finals. Mahilig pa naman manumbat iyong isang 'yon.

"Bakit po?" sagot ko nang maka-recover na ako sa gulat. Kasi naman! May sine-search ako sa Google. Kanina pa ako nagbabasa ng results sa Quora. Hindi ko alam kung bakit ginagawa ko pa iyon kahit parang alam ko naman kung ano ang sagot sa tanong ko.

O baka hindi?

Ewan ko ba!

Sa dinami-dami ng oras kung kailan ako mag-o-overthink, ngayong exam period pa! Pakiramdam ko talaga e sinasabotahe ako niyang si Atty. Marroquin.

"May pagkain sa ref. Puro ka noodles," sabi ni Papa sa akin.

"Di ko po nakita," sabi ko na lang kahit nakita ko naman. Mas gusto kong kumain ng noodles, e.

Tumango lang siya. "Malapit na exam mo," he stated.

Accountant talaga kasi si Papa na nagtrabaho sa NBI tapos eventually, nag-aral na rin siya ng law. Ang talino ni Papa. Sinisisi ko si Mauve dahil napunta ata sa kanya iyong talino na dapat ay share kami.

"Oo nga po."

"Nakakapag-aral ka naman?"

Tumango ako. "Okay naman po."

Tipid lang siyang tumango sa akin. Naramdaman niya ata na maoovercook na iyong canton ko kaya iniwan niya na ako. Pagkalagay na pagkalaya ko sa mangkok e umakyat na ako sa kwarto ko agad.

Ewan ko ba... 'di talaga kami close ni Papa. Saka ang weird na bigla siyang nagtanong tungkol sa school ko e 'di naman kami talaga nag-uusap. Kasi siguro alam niya na kampi ako kay Mauve at ayoko sa ginawa nila ni Mama.

Pagdating ko sa kwarto, nanood lang ako ng lecture doon sa sinend ni Atty. Marroquin habang kumakain ako. Ewan ko ba kung may sa maligno talaga iyong taong iyon dahil bigla siyang nagtext habang nasa kalagitnaan ako ng panonood.

'San nga tayo natapos?' bigla niyang tanong. Kitang-kita ko sa gilid ng screen iyong pangalan niya. 1AM na. Maligno siguro talaga 'to. Dis oras ng gabi e nanggugulo.

'Sabi ko weekend, di ba?'

'Friday ngayon.'

'Saturday at Sunday ang weekend.'

'Ah akala ko kasama Friday.'

'Now you know,' sagot ko sa kanya.

'Bakit gising ka pa?'

Tss. Istorbo talaga 'to. 'Di ako makapagconcentrate sa pinapanood ko kasi ang bilis niya magreply sa akin.

'Lecture.'

'Obli?'

'Yup.'

'May naguguluhan ka pa ba?'

'Wala naman. Bawal ba manood sa ibang lecture?'

'Mas magaling ba yan magpaliwanag sakin?'

'At least ito walang kasamang attitude.'

Imbes na makinig ako sa lecture e nakipag-usap ako sa kanya. Akala ko e mga five minutes lang ang lumipas pero nagulat ako na isang oras na pala kami magka-text. Tss. Panira talaga sa magandang kinabukasan ang taong 'to.