...؟......
معتصم: مني هذي يلي بعتتلى رسالة منعرفهاش خلي نردو عليها نشوفها مني ولما تفتح ترد عليه، وعليكم السلام تفضلي اختي،
(طبعا معتصم يكون ولد خو طارق 2005)
علي: شني معندكش مدرسة انت اليوم
معتصم: لا يا بوي عندي غير مزال شوي بس
علي: متتأخرش وصل اختك في شورك
معتصم: حاضر يا بوي
مريم: هيا يا ابتهال متتأخريش على خوك عنده مدرسة حتي هو
معتصم: بنتك وتعرفاها يام ديما هكي تطلع بطلوع روح
ابتهال: خيركم ديما تحطو في راسكم من راسي انتم
معتصم: هيا بنمشي بنتأخرو
ابتهال: بس اني قعده مفطرتش اكيد مش ماشه بلا فطور خوي حبيبي
مريم: باهي افطري سلم بنيتي استنا اختك يا معتصم
معتصم: حاضر يا امي هاني نسانا كالعادة
ابتهال: ماما بابا وين
مريم: ناض صلى فجر ومعادش جاه نوم وظغطه مرتفع البارح
ابتهال: ع خاطر عمي وله، اني استحشته هلبا
معتصم: حتى اني، ربي يفك اسره
مريم: ان شاءلله يا رب، هيا سقدو لا تتأخرو
وتين: رد عليه شني بنقله تو، كيف حالك يا خوي انت ولد خو طارق مش هكي
معتصم: شاف لتليفونه لقاها رسالة من وتين، الحمدلله اي اني ولد خو طارق تفضلى مني انتي
وتين: شوف اني نتصل بيه تليفونه مقفل و نت مسكر و بالي مشغول عليه و معرفتش كيف نتواصل معاه طمني عليه هو بخير
معتصم: من وين تعرفيه عمي و من وين جبتي ايميلي
وتين: لقيتك صديق ليه وعرفت من تعليقات انه عمك طمني عليه
معتصم: باهي من وين تعرفيه عمي
وتين: هو سؤال تقدر تجاوب عليه
معتصم: عمي محبوس
وتين: وبصدمة كيف محبوس وعلاش باهي امت قولي وين
معتصم: ليه اسبوع محبوس عند ردع منقدش نعطي معلومة تانية
وتين: بس شنو سبب امت صار هكي وليش قولى لو سمحت راهي حالتي يعلم بيها ربي يا خوي
معتصم: شوفي اني تو ماشي للمدرسة لكن اول ما نروح نشرحلك علاش محبوس
وتين: قولى تو تو
معتصم: بس عندي قراية تو وبنوصل خواتي لما نروح نكلمك
وتين: لما تروح كلمني بلهي عليك ارجوك
معتصم: حاضر يا اختي لما نروح نكلمك
ابتهال: خيرك عصومة في من تكلم
معتصم: شي صاحبي، هيا كان وتيتي خلى نمشو
ابتهال: هيا، سلام ماما
مريم: سلامتكم ردو بالك من رواحكم
وتين: كيف صار هكي وليش امت صار هذا كله يا ربي امت ليش هكي صار... وقعدت وتين تبكي بدون صوت لان دنيا صبح ومتبيش حد يسمعها ومقدرتش ترقد طول ليلة الماضية من تفكيرها ويلي خايفه منه صار.
خلينا نرجعو شوي لتالي لى ما قبل اسبوع...... 1/12
.. 20 ساعة 12:00 AM
الحوش وين بظبط يجي يا 01
01: مزال القدام قريب نوصلو
وصلو المقنعين للحوش وكانو هلبا وكانو كلهم مقنعين ويخوفو وقعد يطقو ع الباب بقوة شبه سمعوها اهالي المنطقةةة انفتح الباب انت طارق......
طارق: اي اني مني انتم
المقنعين حنى الردع ومعانا امر بإعتقالك ومطلوب لدى نائب العام بتهمة الاختلاس. وهني كانت الصدمة
طارق: عملية اختلاس، هاني ماشي معاكم تفضلو
.... تم حبس طارق لدى نائب العام بتهمة الاختلاس اموال الدولة وطبعا يلي قدمو شكوى هذي هما الاشخاص يلي كانو مع المدير يلي كان ماسك المستشفى بعد طارق ويلي طارق قبل فترة قدم فيهم شكوى انهم يقومو بعملية اختلاس اموال يلي تجيهم من قبل الوزارة، يعني ردو نفس شيء يلي داره طارق فيهم بس الفرق انهم هم محبوسين في توثيق ومعلومات و طارق عند الردع.
في نظركم هل طارق بريئ من تهمة هذي او العكس صح؟ و يا ترى شني يلي ناطر وتين و طارق لى امت حا يقعد محبوس؟
طبعا الجزء هذا قصير هلبا بس لاجزاء الجاية حا تكون حلوه
«طبعا رواية هذي حقيقة بس اسماء شخصيات لا»
الاشخاص يلي يتابعو في رواية اكتبولى هل عجبتكم ام لا وشني ملاحظاتكم ليه لطفا اكتبولى 🥺
