وتين: اوف تاخرت على لامتحان يا ربي ما يكونش بدي
محمد: غير هدي روحك يا وتين تو لقريتيه تنسيه مازال في وقت للامتحان اصبري
وتين: لا يا بابا يكون بدي اليوم اصعب مادة وخايفه و بدايتها تاخرت ان شاءلله خير يا رب
محمد: تفائلي خير و عارفك قدها وبتجاوبي
وتين: ان شاءلله ان شاءلله يا رب.
سهى: وتين خيرها تاخرت بندخلو قريب
لمياء: تو كلمتها قتلى في طريق
سهى: غريبه اول مره تتأخر
لمياء: اكيد خوها ناضلها متأخر
سهى: اي اكيد نفس يلي عندي، بس تعرفي حاجه يا لمياء، وتين الفترة هذي مش على بعضها نحس فيها شي ومتبيش تقول
لمياء: اي حتى اني حسيت انها متغير هلباا، بس يمكن من لقراية او مرات عندها ظروف عائلية
سهى: اي يمكن و المشكلة ان وتين متحبش تشكي لحد
لمياء: هذا يلي يعجب فيا فاها انها بنت قوية و شخصيتها قوية مش ضعيفه او جبانه ياريتني زيها 😔
سهى: و انتي خيرك ماشاءالله عليك بنية عسل وطيبه وشخصيتك الكل يحبها .
لمياء: ضحت ضحكه حلوه، شكرا حبيبتي على الدعم
سهى: مش مجامله الكلام فعلا من قلبي و انتي هكي فا متخليش يأثر عليك.
وائل: اي تمام ههههه خيرك ياودي ولله كنت نبصر عليك تعرفيني انتي اني كيف مش متع الامور هذي حبي
ساجدة: اني معنديش فيك ثقة اصلا انت كل مره دير في نفس تصرف
وائل: ولله منغير قصد و مش نيتي شيء تاني ولله غير انتي فهمتي غلط يا سجو
ساجدة: ساجدة اسمي مش سجو و معادش تتصرف بطريقة هذي تعصب فيه راك.
وائل: باهي حقك عليه وعد معادش نتصرف ونحكي هكي خلاص اخرر مره لو عاودتها دير لتبيه
ساجدة: حاليا بنسكر مش فاضيه و معنديش نية نحكي معاك
وائل: تي خيرك يا همي لازم تنكدي يعني
ساجده: لا واضح مني يلي ينكد اصلا
وائل: اخ يا ربي وخلاص معادش عرفت كيف نتصرف معاك
ساجدة: معناها لما تعرف كيف تتصرف معاي وقتها نهدرزو مع بعض وتو سلام
وائل: غير اسمعيني، سكرت الزفت تفاهم معاها حاجه مستحيله بكل.
صهيب: هههه بنت دارت فيك هكي يا خسارة وخلاص
وائل: تو نشوفو انت شني يصير فيك
صهيب: اني سريب هذا مش شوري خليناهولك انت
وائل: اي اي صدقتك يا متع نظارة ههههه
صهيب: صدق يلي قال ان دمك ثقيل
وائل: تو نخففه بالميه ههه
محمد: مدام بنت قالت لا معناها لا شني يعني بسيف
نجمة: الولد هذا معادش يتعوض ومعادش نلقو زيه
محمد: زواج قسمة ونصيب ويلي كاتبه ربي بيصير
نجمة: كلمها انت حاول تقنعها بيه مرات تسمع كلامك
محمد: اني منقنعهاش مش بسيف توافق تو غدوا تصير معاها مشاكل نبدا نلوم في روحي ولا تبيني نكسرها في صغر سنها، فكك من لامور هذا يا مرا وخلى البنت تكمل قرايتها وبعدين ساهل
نجمة: انت وبنتك زوز روسكم مسكرة ربي يهديكم وخلاص
محمد: ان شاءلله
ايهم: اي مزالي الزواق و لاثاث والحوش يكون تام يعني من هني لى اربعة شهور يكون الحوش جاهز ونديرو العرس شني رايك.
اريام: عادي امت يجهز الحوش نديرو العرس و اني نبدا نجهز من تو كان في حاجات ناقصتني و هكي باش لما يجي العرس نلقى روحي واتية يقعدلى ذهب وحجات خفيفة وخلاص.
ايهم: كويس، حتى اني بنمشي بعدين بنشوف عمال لزواق وبنشوف باش بنزوقه الممرات بزواق طالع جديد بنشوف بقداش يخدم باش ندير حساباتي.
وقعد ايهم و اريام يحكو على الحوش و كيف بيكون وشني الالوان يلي بيختاروها و وشني الفرش يلي بيديروه.
سهى: وتين تليفونك من بكري يرن
وتين: منو
سهى: مكتوب دكتور منو دكتور
وتين: الو
طارق: السلام عليكم
وتين: عليكم السلام
طارق: كيف حالك
وتين: تمام
طارق: ان شاءلله منكونش اتصلت في وقت غلط و سببتلك ازعاج
وتين: لا ما سببتش ازعاج تفضل
طارق: كنت نبي نحكي معاك في موضوع وتين
وتين: نسمع فيك تفضل
طارق: اني اسف على تصرف يلي بدر مني
وتين: اي تصرف بظبط
طارق: اني مسحت ايميلي و مقتلكش
وتين: لا عادي مركزتش هلبا على الموضوع.
طارق: آه تمام المهم قلت خلى نعتذر
وتين: باهي ليش اختفيت فجأة وبدون ما تقول
طارق: ابتسم، حس انها فعلا مهتم بوجوده عكس ما بينت، خفت يا وتين
وتين: بإستغراب! من شن خفت وليش.
طارق: نخاف من الارتباط
وتين: يعني انت مرتبط وصاير معاك مشاكل
طارق: لا مش مرتبط
وتين: معناها كنت قبل مرتبط و الموضوع هذا قاعد مأثر فيك
طارق: حاجه زي هكي
وتين: بس تفكير في الماضي مش حا يغير شيء وتجربة سيئة صارت معانا قبل مش لازم نخلوها تأثر علينا وعلى حياتنا شوف للموضوع من زاوية تانية
طارق: مش ماضي
وتين: حاضر يعني؟
طارق: مش عارف، بس خايف من قصة لارتباط
وتين: معناها اتزوج ليش ترتبط
طارق:: يا ريت بس منقدش
وتين: ليش شنو المانع
طارق: ما فيش مانع ، بس جربت حظي وطلع مش حلو
وتين: اممم مش عارفه اني قتلك وجهة نظري
طارق: في الوقت تو ولو يحبو الماديات اكثر
وتين: هذم الناس سطحيه هكي تفكيرها، في حاجات احلى من هذم بهلبا
طارق: زيك مثلا
وتين: تحشمت وقاعدت ساكته
طارق: شني قرايتك
وتين: كويسه اليوم كان عندي امتحان و جاوبت
طارق: شاطره ان شاءلله نشوفك دكتورة
وتين: ان شاءلله يا رب
طارق: كيف حالك اهلك
وتين: كلهم بخير، دكتور نطلب منك طلب عادي
طارق: عادي، تفضلي
وتين: انه لو في يوم من الايام قررت تختفي فجأة ولى اي سبب قولى.
طارق: حاضر مش رح نختفي، والعكس صحيح ☺️
وتين: شكرا على المسايرة
طارق: انتي طيبة هلبا وبريئة
وتين: صح قلبي طيب بس معنداش حظ
طارق: كيف معنداش حظ
وتين: لان طيب فا معظم الناس مش طيبين يأذوك ويحبو يجرحوك وهكي
طارق: معادش نخلي حد يأذيك
وتين: وعد
طارق: وعد
وتين: دكتور تو لما بناديك مثلا شني نقلك نقلك دكتور او طارق شنو يلي ريحك
طارق: طارق
وتين: كنت نقول دكتور نبي شويه وقت باش نتعاود على طارق
طارق: تتعودي تتعودي مع الايام
وقعدو يهدرزو وكأن ليهم سنين محكوش مع بعض
طارق كان خايف من قصة لارتباط لان انجرح مره و محبش ينجرح مرة تانية وهذا ليش اختار يبعد على وتين بدون ما يجرحها لانه كان عارف لو طول اكثر بيكون جرح اكبر بس لان شاف وتين مميزه و مختلفة مقدرش يقعد بعيد عليها لان في حالتين كان حا يتعذب و كان لازم يختار بين انه يتعذب وهو بعيد عليها او يكون جنبها وميعرفش شني داستلهم الايام، عكس وتين يلي كانت رافضة فكرة الحب من اساسها وكان تركيزها على قرايتها ومستقبلها.
زعما شني مستنى وتين الايام الجايه، وهل تفكير طارق بإنه وتين مستحيل تأذيه صح او الايام حا تثبتله العكس
حا نعرفو الحلقات الجاي شنو بيصير في هلبا احداث بتصير و شخصيات جديدة حا تطلع استنونا.
