الكاتبــــة ياقــــــــــوت ✨
نجمة: وتين تعالى جنبي بنقلك حاجه
وتين: شوي خلى ندير قهوة وجاية
نجمة: باهي
وائل: بلهي وتينتي احسبيني باهي
وتين: اوكي
صهيب: حتى اني وتينو
وتين: اوكي
وائل: بصوت واطي بنقلك حاجه لكن متقوليش لى امك
وتين: شني فيه؟
وائل: فيه وحده جت لى امي لاسبوع لفات تبيك لى ولدها اسمها فتحية
وتين: و امي شن قالت
وائل: امي خلت ايهم يسال عليه وقالوله كويس و امي موافقة وتبي تقنعك لكن تبي نصيحتي يا اختي فكك منه
وتين: علاش شني فيه
وائل: فكك منه وخلاص اني مش مستريحله بكل وبعدين مايمشيش معاك
وتين: من وين طلعت قصة هذي تو
وائل: لما بتناديك امي تو ديري روحك متعرفيش باهي
وتين: باهي باهي
نجمة: وتين شني صار
وتين: هاني جيت، فيه حاجه
نجمة: اسمعي نبي نقلك حاجه عمتك فتحية جت تبيك لى ولدها وليد ماشاءالله عليه صلاة على نبي شني رايك
وتين: قاعدة ساكته
نجمة: شني قلتي
وتين: خلي نكمل مشروعي قبل بعدين عندي بعثة
نجمة: اي بعثة
وتين: بنقرا برا بنكمل طب عام يعني لازم تحطي كل حد في صورة ومش مطرة نتخلى على احلامي على خاطر حد
نجمة: وعلاش مقلتيش ومنين طلعتي بهذي قصة تو
وتين: اليوم دكتور قلى
نجمة: باهي قوليلي انتي تو موافقة او لا لو موافقة تو نقلهم بتقري برا بعدين بوك مقلتيلاش
وتين: ما قلت لحد كيف عرفت اني اليوم قولى انتي لى بوي
نجمة: باهي موافقة او شني
وتين: بعد نكمل نفكر بنمشي نكتب
صهيب: قهوتك
وتين: ما نشربش فاها
وائل: استني وتين بنجي معاك
معتصم: كيف حالك عمي
طارق: الحمدلله كيف حالك انت وحال بوك
معتصم: كلهم كويسين الحمدلله
طارق: كويس، شمداير شني قرايتك
معتصم: ماشه يا عمي انتي شني امورك
طارق: كويسه مرا هكا مرا هكي
معتصم: المهم صحتك كويسه
طارق: صحتي الحمدلله يا رب
معتصم: شني جو مستشفى
طارق: ماشا امورها
معتصم: كويس ميه ميه
وتين: اني لازم نحكي معاه ونفهم هو يحبني او لا احسن ما نضيع ورا امل على فاضي بس لو طلع مايحبنيش كيف بنتحمل منتحملش نفقده مرا تانية يا رب ارحمني المرا هذي يا رب
امير: ماردوش عليك يا امي
فتحية: قاعدين ماردوش اكيد يبو وقت باش يسألو و يستفسرو
امير: مايبوش الوقت هذا كله
فتحية: انت علاش مستعجل
امير: الواحد يبي يتزوج بعدين خايف تضيع مني البنت
فتحية: نصيب حد ما ياخذه حد
.....
ســاعة 8:00 AM
انور: صباح الخير
محمد: صباح النور والسرور
انور: شني سمعنا الفرح الشهر الجاي مبارك
محمد: اي الله يبارك فيك يا قدر
انور: نبو عرس سمح عاد
محمد: غالي وطلب رخيص
انور: زعيم ولله
محمد: ماشفتش طارق وينه اليوم
انور: على جيه
ابتسام: اليوم امتحان جاهزين
الطلبة: اي دكتورة
ابتسام: هيا ادخلو باش نبدو
المدير: صباح الخير
طارق: صباح النور
المدير: طارق بنقلك لاسبوع جاي بيبدا تدريب بعثة
طارق: اي سمعت و اني جاهز
المدير: تمام موفق
طارق: ان شاءلله
ابتسام: كويس يا وتين ممتازة ناديلي على طالبة لبعدك
وتين: تمام، رؤيا دورك تبيك دكتورة
رؤيا: تمام ادعيلي
وتين: موفقة يا ربي
غادة: شني لاسئلة وتين
وتين: صعبة بس حلوه
غادة: بلهي شن
وتين: كيف ما نقلك
غادة: ربك يستر
وتين: اني بنمشي شوي ونجي كان سألت دكتور اتصلى بيه
غادة: باهي وين ماشه
وتين: بنقيس ظغطي نحس روحي مريضة
غادة: ان شاءلله خير
وتين: وين بنلقاه اني تو زعما جي، لو سمحتي ممكن سؤال
دكتورة: تفضلي
وتين: دكتور طارق..... موجود
دكتورة: اي في مكتب متعه
وتين: شكرا دكتورة
دكتورة: العفو
وتين: هذا هو زعما مكتبه او لا من نسأل زعما، لو سمحت خوي
ممرض: تفضلي
وتين: هذا مكتب دكتور طارق
ممرض: اي
وتين: تمام شكرا
ممرض: عفواً
وتين: تشجعي يا وتين تشجعي علاش خايفه هذا طارق نفسه يلي كنت نحكي معاه هيا ع خاطر قلبك لازم ديريها، وطقت على الباب
طارق: تفضل
وتين: صباح الخير
طارق: كان متفاجئ صباح الورد
انور: صباح النور
وتين: دكتور لو فاضي نبي نحكي معاك من فضلك
طارق: ابتسم فاضي تفضلي
وتين: شبحت لى انور
انور: فهم ان وتين تبي تحكي مع طارق ومتحشمه منه، اني طالع بنشوف الحالات نتلاقو بعدين طارق
طارق: تمام
وتين: قعدت ساكته و قرييه من الباب لانها خلاته مفتوح
طارق: شني فيه يا وتين احكي
وتين: بخوف وتوتر هو اني كنت نبي نقول اني اسفه
طارق: علا شن اسفه
وتين: ع اي تصرف كان غلط بدر مني
طارق: اي غلط تحديداً
وتين: اني ماكنش قصدي نخلف بوعدي بس ظروف والله
طارق: بس اني مقتلكش برريلي تصرفك
وتين: حست انه رجليها معادش يقدرو يحملوها اني ما نبررش اني درت يلي شفته صح
طارق: وقف وقرب من وتين وقعد يشوف لعيونها لو اني تصرفت هكي شني كانت ردت فعلك
وتين: كانت خايفه وايديها يرعشو مقدرتش ترد عليه، بس كانت تحاول تخفي خوفها
طارق:قعد يقول في قلبه خايفه مني اني، خايفه من شخص يلي يخاف عليك حتى من روحه آه لو نقدر ناخذك لى حضني وننسى الهم هذا كله
وتين: وهي تمتم يعني ماتبيش تسامحني
طارق: مهم عندك هلبا زعلي؟
وتين: حركة راسها بمعنى اي
طارق: معناها ماتسافريش
وتين: قامت راسها وجت عيونها في عيونه وقاعدة حايرة، وعلاش
طارق: في قلبه لاني نبيك تقعدي بحدايا، انسي شيء
وتين: اني جيت نعتذر منك و ان شاءلله تكون قبلت اعتذاري
طارق: لما تجرحي حد الاعتذار بدون فايدة يولي
وتين: بإنفعال بس اني قتلك لو تبيني تعالى لى اهلي بس انت ما اهتميتش بالموضوع فاعلاش تو جاي تحط في لوم كله عليه و انت اصلا غالط
طارق: لما تحكي معاي خلي صوتك واطي لاني نحكي معاك بهدوء
وتين: اصلا نقاشنا غلط من اساسه و اني اصلا غالطه مفروض لا جيت ولا تكلمت معاك اصلا انت شخص اناني
طارق: زاد قرب من وتين اكثر وحس بنفسها عليه، صح اني اناني في الحاجات لنحبها و ندير اي شيء باش ماياخذها مني حد فاهمه
وتين: خافت لان طارق قريب منها هلبا ومعادش عرفت تتكلم قاعدة تشوف لعيونه بس وكان فيهم عتب كبير
طارق: في قلبه نبي نخليك انتي و عيونك ما يشوفكمش حد إلا اني لكن انتي اخترتي غيري علاش يا وتين علاش، لو كملتي كلامك تقدري تمشي
