......
أحياناً تجبرنا الحياة على عيش واقع لايناسبنا و لا يتلائم معنا
نظطر أحياناً لتخلى عن احلام لطالما راودتنا من طفولتنا، نظطر لنخفض سقف توقعاتنا لنستطيع النجاة بما تبقى منا، والمؤلم اننا مجبرون على رؤية احلامنا لدى غيرنا ولا نستطيع فعل شيء سوء البكاء، ربما حتى الدموع سئمت منا وتود تركنا في حين غفلة......
مراد: Good morning
الطلبة : Good morning
مراد: كيف حالكم
الطلبة: الحمدلله كويسين دكتور انت كيف حالك
مراد: الحمدلله بخير، شني جاهزين المحاضرة
الطلبة: نص بنص يا دكتور
مراد: مني اليوم يلي بيشرح محاضرة
امل: دكتور انت مقلتناش من قبل انه بنشرحوها حني
سهى: اي دكتور معطيتناش علم
لمياء: شني عنوان محاضرة دكتور
مراد: Kidney failure، مني يلي بيشرح
ايمن: فشل الكلوي
مراد: اي الفشل الكلوي شنهو اسبابه اعراضه مضاعفات يلي بسببها على الاجزاء الاخرى للجسم مني يلي بيبدا
الطلبة كلهم قعدو يتناقشو بين يلي قال انه وخذينه سنوات لفاتو و بين يلي قالو انهم نسو وبين يلي متحشم مش قادر يشرح لان خايف يكون غلط وبين هذي دوشه قطعهم صوت الباب..
وتين: صباح الخير، اسفه دكتور ع تأخير ممكن ندخل
مراد: صباح النور مش من عاوايدك تتأخري يا وتين
وتين: مع لاسف المرة هذي تأخرت
مراد: مش مشكلة، زملائك يا وتين يتناقشو مني يلي بيشرح محاضرة اليوم بس مافيش حد يبي يشرح شكله
شني رايك تشرحيهالنا انتي
وتين: اني، وشنهيا المحاضره
مراد: Kidney failure شني تقدري
وتين: اكيد نقدر نشرح، بس حسب ما نعرف بطريقتي
مراد: انتي تو دكتور وحني طلبة هيا ابدي
حطت وتين شيتاتها ومذكرات و شنطتها على طاولة وقفت قدام المدرج باش تشرح وشعور توتر كان شوي عندها
وتين: عنوان محاضرة الفشل الكلوي اول شيء حا نعرفو شنهوا، Kidney failure، And its symptoms، And its reasons، And its complications
الفشل الكلوي هو عجز او عدم قدرة الكلى على انها تتخلض من الفضلات والسموم من الدم، وطبعا تسمم هذا حا يتراكم ولما يتراكم حا يسبب خلل في الجسم وظيفته........،
كملت وتين شرح بطريقة انبهرو بيها طلبة والدكتور وقعد يصفقولها وقعد دكتور يشكر فيهااا وهني تأكد مراد انه مغلطش لما اختار وتين تمشي للبعثة للبرا.
معتصم: زعما هذي من وين تعرف عمي مرات زميلته في المستشفى و مرات صديقة مرات تطلع حبيبته، بس معقولة عمي رجع يحب من جديد بعد هديكا يلي حرام الواحد يذكر اسمها مرات باهي علاش محكالناش عمي علها..
امل: نجيبلك تتغد عصومة
معتصم: لالا امي تو ناكل بعدين مانبيش تو
امل: باهي تلقاه مغطى في المطبخ
وتين: فتحت لقت رسالة من معتصم ردت عليه
قولى تو كيف انحبس وعلاش شني صاير معاه
معتصم: ولهى متهمينا في قضية اختلاس
وتين: اختلاس! اختلاش شني بعدين طارق مستحيل يدير هكي
معتصم: اي عارف بس هو تو نحبس وقضية قاعده مستمرة في محكمة
وتين: باهي وين محبوس وما شفتوشي
معتصم: في الردع طرابلس، لا ما شفناشي وبوي وعمي حاولو يشوفوه لكن مافيش فايده بكل
وتين: باهي لى امت بيقعد محبوس، اني خايفه عليه شني يكون صاير معاه تو
معتصم: المحبوس مطلوق، بعدين الحبس لرجال متخافيش عليه
وتين: الحبس لرجال معناها الجوامع لمن لى نساء مثلا، مافيش طريقة تشوفوه باها باهي لقو دليل ضده
معتصم: لا مالقو شيء ضده قاعد تحت تحقيق
وتين: بس اني نبي نشوفه منتحملش نخسره ياربي بس اكيد محامي يقدر يشوفه
معتصم: درنا محامية ولتو مافي شيء، بس نسألك سؤال
وتين: شنهو
معتصم: انتي تحبي عمي
وتين: من قلك اني نحبه
معتصم: واضح من خوفك عليه وسألانك عليه مهتمه بيه هلبا ومتقوليليش انك زميلته او صديقة لان مستحيل يدير شيء هذا إلا وحدة تحبه هلبااا
وتين: بس شني الفايده كل شيء بدي ينتهى قبل ما يبدا
معتصم: علاش انتهي تفائلي خير تجدوه
وتين: بس اني مالحقتش نعبرله على يلي نحس فيه مالحقتش نقله يلي في قلبي مشبعتش منه
معتصم: الواضح انك عاشقتيه مش تحبيه بس، خلى ايمانك ب ربي كبير حا يطلع وتعبريله على مشاعرك ووتشبعي منه انتي غير تفائلي
وتين: صابره رغم تعبت من صبر حاسه دنيا ضايقة بيه
معتصم: فاهم عليك وخيتي كلنا نفسـ وضع، باهي كم عمرك انتي
وتين: كم في نظرك
معتصم: نعطيك مواليد 90/94 يمكن هكي
وتين: لا غالط مواليد 2001
معتصم: بشهقة مستحيل
وتين: وعلاش مستحيل
معتصم: قصدك اصغر من عمي ب 14 سنة
وتين: اي، فـ مشكلة في موضوع او لانه اكبر مني بهدم سنين ميجيش نحبه مثلا
معتصم: لالا، العمر مجرد رقم، غير صغيره انتي بس
وتين: اي صغيرة بس اكبر منك ب اربع سنين
معتصم: ميعتبروش فرق كبير
وتين: زي عمر خوي
معتصم: مني خوك
وتين: متعرفاش حتى كان قتلك عليه
معتصم: اي مزبوط، باهي وين تعرفتي انتي وعمي
وتين: قصة طويلة، بس احكيلي على طارق شوي
معتصم: شني بنحكيلك
وتين: كل شيء بتفصيل
معتصم: اممم في مقابل تحكيلي كيف عرفتي عمي
وتين: باهي
وقعد معتصم يحكيلها على طارق و انه طيب ويحب يساعد الناس و انه ذكي وقري برا و انه الكل حاربوه بسبب غيرتهم منه و انه بوه وامه ماتو وهو في عمر صغير و كيف عاش وكبر و انه كان يحب وحده وخطبو وبعدها فسخو و في مقابل وتين حكتله كيف تعرفت هي و طارق..
معتصم: معناها من هكي اعتبريني خوك وتبي اي شي اني موجود
وتين: ان شاءلله، و حا تكون احسن اخ متاكده المهم اسمع بنقلك شي
معتصم: تفضلي
وتين: متقولش لطارق اني نحبه باهي
معتصم: امم وعلاش باهي
وتين: هكي نبي نعرف هل يحبني هو قبل او لا
معتصم: باهي، بس متأكد انه يحبك
وتين: وكيف عرفت
معتصم: عمي ونعرفه
وتين: ان شاءلله، المهم نحكو غدوا اني بنسكر
معتصم: تم نتلاقو وخيتي
وتين: ان شاءلله.
نجمة: وتين شديري
وتين: شي
نجمة: ديرنا بيتزا من يدياتك
وتين: حاضر يا امي
نجمة: يحضرلك الخير يارب
وتين: وائل ترا تعالى
وائل: شني فيه
وتين: بنديرو بيتزا
وائل: بديرنا بيتزا قصدك شكله لعشي اليوم متكم
وتين: قلت بنديرو مش بندير افهم قبل لاتفسر
وائل: قصدك اني بندير معاك
وتين: يس انت
وائل: بتسهويك من كاذب عليك قلك كنت نطيب
وتين: ماحد بس بتساعدني هيا لاني تعبانه و مش قادرة
وائل: انتي ديريها واني نحط فوقها جبنه وحجات هذي
وتين: وصالصة
وائل: صالصة شني باقي
وتين: هههه صالصة بيتزا صالصة شني
وائل: باهي هيا بسرعة، اخرها بنبدا ندير بيتزا وبنطيب عليك حاله وخلاص لوين وصلت يا وائل لوين وصلت يومين ثانين وبيخلوني نغسل لماعين
وتين: هههههه ولله كان هذا تريحني يا وخي
وائل: غير زيدي احلمي اخرها نطيب بطيحلى سمعة متعي
وتين: احم احم هيا هيا نبدو
مرو الايام والاسابيع والشهور على نفس الوضع وما فيش اي خبر على طارق وما فيش اي حد شافه وكل يوم وتين تكلم في معتصم وتسأل عليه بس مافيش فايده لان ماحد يقدر يشوفه نهائي ومر الوقت وصبر وتين قريب ينفذ بس ثقة وتين ب ربي و انه مستحيل يخليها خلتها متحمله و رغم انه وتين ما قالت لحد وما شكت لحد شيء هذا خلاها تكتم في قلبها ولان معندهاش اخت معرفتش لمن تشكي او ع كتف مني تبكي ولان متبيش تبين وماتبيش اهلها يحسو قعدت تمثل في دور الانسانة سعيدة وكانت تمشي في اليوم عادي بكل قوة وصبر بين اهلها وقرايتها والحوش وضمان وتطيب هذا كله وقلبها من داخل مكسور بس مكانش عندها خيار تاني واكيد كلكم فاهمين الوضع
بس شيء الحلو ان علاقة وتين ومعتصم قوت هلبا ولو زي الخوت تماما بس فراق طارق اثر بشكل كبير على صحة وتين...
# معقولة بعد لانتظار هذا كله وفي الاخير نساني #
