سهى: دكتور مراد لو سمحت
مراد: نعــم تفضلـــي
سهـــى: دكتور بنسألك المستشفى امت حا نبدو نمشو
مراد: غير نتم الورقة ونختمها و حا نقلكم
سهى: باهي دكتور نمشو اي يوم بظبط باش نسقو مع دكاترا تانين على محاضرات.
مراد: تمام حا نشوف ونسق اموري ونرد عليكم
سهى: تمام دكتور
مراد: وتين جت اليوم؟
سهى: اي دكتور جت
مراد: ناديهالي ممكن
سهى: حاضر
مراد: تلقاني في قاعة
سهى: تمام
امل: شني يبي دكتور مراد من وتين
سهى: علمي علمك مش عارفه، بس هي وين قبل
امل: مع لبنويت تشرحلهم في محاضرة
سهى: هيا نمشولـها نقولولها
امل: هي.
زياد: السلام عليكم
علي: وعليكم السلام، كيف حالك يا زياد
زياد: كويس الحمد لله انت كيف حالك و حال العيلة
علي: كلهم في نعمة الحمدلله
زياد: كويس هذا مطلوب
علي: كنت في طرابلس يا زياد وله
زياد: اي
علي: خوك هذا الباين انه مش ناوي على خير بكل ويجيب في لمشاكل لروحه وبيتعب وبيتعبنا في جرته
زياد: ولله يا خوي عيت واني نقله فكك وابعد وراك بطيح روحــك في مشاكل لكن خوك وتعرفه كان سكر راسه.
علي: نصحته منه درته منه شي لا ياخذ في لكلام لاشيء
عارف بيجيه يوم وبيحصل وتو تشوف
زياد: ان شاءلله لا، ربي يستره وخلاص
علي: لعب مع دولة مش ساهل، و انه يتهم مدير بإختلاس مش ساهل يا زياد تي خوك يلعب بنار
زياد: المشكلة انه هما هني يتمنو يشوفوه طايح ومتمرمد و دارو المستـحيـل باش ينحوه من ادارة المستشفى، ولوو عرفو بمخطط يلي في راسه وعلى شني ناويلهم حا يديرو نفـس شيء وحا يتهمو بإختلاس حتى هو وهكي يكون فتح على روحه باب جهنم
علي: قتله نبهت راهي مش ساهله انك دير هكي قتله ابعد عليهم هذم محسديه ما يحبوش حد احسن منهم لكن خوك دماغـه مسكر.
زياد: حا نحاول ندير جهدي باش نقنعه رغم عارف انه مستحيل لكن نجرب وربي يجيب لفيه الخير
علي: لاحول ولاقوة الابالله العلي العظيم
سهى: وتين وتين
وتين: نعم شني فيه
سهى: دكتور مراد يبيك
وتين: يبيني اني
سهى: لا يبيني اني
وتين: و مقالش شنو يبي
امل: لا مقالش قال نبي وتين وقلها تجيني للقاعه
وتين: تمام تو نمشي نشوف شني ان شاءلله خير
سهى: ان شاءلله، قوليلي شني يصير، تبي نمشي معاك
وتين: لالا تو نشوفه ونجي
سهى: تمام
وتين: دكتور ممكن ندخل
مراد: تفضلي يا وتين ادخلي
وتين: شكراً، دكتور قلت انك طالبني فيه شيء
مراد: شوفي يا وتين انتي طالبة شاطره ومتميزه تعرفي شي هذا
وتين: اي نعرف
مراد: اني نخدم في مستشفى طرابلس و نقري في كلية طب البشري برضو، و فيه عندنا بعثه الطلبة باش يقدرو يكملو قراية برا، ولصراحه ولانك شاطره ويمكن ظروف مسمحتلكش تقري تخصص لتحلمي بيه لهو طب بشري فا اني حبيت نبادر ونعطي اسمك للكلية باش تكوني ضمن طلبة يلي حا تجيهم بعثة، وبعثة هذي لطلبة المميزين فقط و تكون لطلبة كليتنا فقط بس ولاني عارف قداشك موهوبه عطيت اسمك و دخلتك بمعرفتي
وتين: يعني كيف بعثة برا، بس اني مش تخصصي طب بشري
مراد: نعرف، لان مش تخصصك انتي حا تمتحني قبل في خمـس مواد ضمن هلبا مواد حا يتم اختياره من قبل مجلس الادارة
وتين: هما يعني يقبلوني عادي يعني نقدر نكمل في طب بشري هكي لاني مفهمت شي
مراد: لا متقدريش تكملي في بشري طول تبي اعادة من سنة اولى، بس اني دخلتك في برنامج تاني يلي هو انك تمتحني قبل وبعدين ندخلك بمعرفتي يعني طريقة مش نظاميه
وتين: باهي ليش بدخلني لو مش نظامية
مراد: احياناً نطرو نستخدمو الاساليب هذي يا وتين
وتين: بس مرات تصيرلك مشاكل او يفصلوك او اني تصيرلى مشاكل
مراد: لو عارف انه بتصير مشاكل مكنتش قتلك وفتحتلك الموضوع هذا
وتين: باهي امت نقدر نسجل
مراد: رح نفتحو برنامج هذا بداية سنة اول ما نفتحوه نقلك بس انتي موافقة لان حا يكون في بعثة برا
وتين: وكـم سنــة نقرا برا
مــراد: من سنتيــن لى ثلاثة سنوات
وتين: اوكي اني موافقة
مراد: اني مقدر طموحك و رغبتك، بس اهلك مش حا يكون عندهم اعتراض
وتين: ما اعتقدش
مراد: تمام، معناها الموضوع بينا لان ما نبيش حد يعرف وتصير دوشـه
وتين: حاضر دكتور، وشكرا هلباا لانك تساعد فيه
مراد: لانك شاطره وطموحه هذا واجبي
وتين: صحيت دكتور
مراد: المهم متتخليش على حلمك يا وتين اتفقنا
وتين: حاضر ان شاءلله
مراد: ان شاءلله تبي اي شيء اني موجود
وتين: حاضر
مراد: ان شاءلله، تقدري تمشي تو و اقري كويس لامتحان الاسبوع الجاي
وتين: ان شاءلله
وطلعت وتين والفرحه كانت ماليا عيونها حلم حياتها في امل انه يتحقق ويصير واقع و انها تكون دكتورة وتقررا برا وتسافر كان حلم طفولتها ويلي كانت تدعي دائما انه يتحقق، بس في شيء قطع فرحت وتين وهو اهلها هل حا يوافقو او لا، ويلي ضايق وتين ان اهلها بعد تخرجها يبوها تتزوج وهني كانت نقطة لابد ما تعرف وتين كيف تتصرف فيها، بس الغريب انه وتين ما فكرتش في طارق فا ليش يا ترا؟
سهى: شني وتين دكتور خيره
وتين: لا شيء بس بيحط اسئلة لامتحان وقعد يقلى ذكرني بمحاضرات لخذيناهم بس
سهى: مقالش لاسئلة كيف بتكون
وتين: لا، بس قال اقرو باهي
امل: ولله المادة هذي صعبة يا بنات
سهى: مش صعبة هلباا تبي شوي تركيز
مروى و لمياء: لا صعبه هلبا تبي هلبا وقت وتين انتي قارية شني المادة كيف
وتين: ساهله تبي تركيز بس
سهى: وتين خيرك في حاجه
وتين: لا مافي شي، بس بابا يتصل بنروح نتلاقو غدوا
سهى: وتين نبي نقلك شي
وتين: احكي فيه شيء
سهى: غدوا نحكو بتروحي تو انتي
وتين: ياريتك قلتي بكري راهي هدرزنا
سهى: لالا خلاص خلها غدوا احسن
وتين: صاير معاك حاجه خوفتيني
سهى: صاير شيء بس ميخوفش غدوا نحكو بوك يستنى
وتين: تمام غدوا نحكو مع بعض، ردي بالك على روحك
سهى: حاضر و انتي زاده
وتين: انا ما ينخاف علي
سهى: عارفه، وفي خاطرها يا ريتني زيك قوية
وتين: سلام
سهى و باقي لبنات: سلام
