في يوم كان الجو نو و الشمس قوية و ما تلقاش حد البرا الناس كلها الداخل و على تكيف ويلي يميز هدا اليوم انه كانت نتيجة شهادة الاعدادية
في حوش وتين كان الكل متوتر و خايف لان اليوم نتيجة صهيب خو وتين وهذا احد شخصيات روايتنا
طبعا صهيب اخر العتقود في عيلة مواليد 2007.
صهيب: شني صار رابط فتحوه او مزال تي قولو حاجه وتين تعالى شوفي رابط نبيك انت تشوفي نتيجتي بسرعة
وتين: باهي تو نشوفها خيرك بعدين قاعد رابط ما اشتغلش شوفته هدي روحك لان حتى اني متوترة تقول نتيجتي
نجمة: غير ان شاءلله ناجح يا وليدي يا رب شني يا وتين مزال
(طبعا نجمة هذي ام وتين طيبة وحنينه 1968)
وائل: اصلا اني عارف انك جايب يا مادة يا اتنين امت قريت انت باش تستنى تنجح
(وائل خو وتين ما قبل الاخير مواليد 2005)
صهيب بسخرية: اصلا لقراية خلينهالك انت حنى نجاح يجينا بلبلاش ههه
وتين: اس نتيجة طلعت رابط انفتح اعطيني رقم الجلوس هيا بسرعةة
صهيب: هيااا اكتبي عندك بسرعة شني صار شني ناجح او لا هيااا
وتين: شوي خلى يتحمل اهي طلعت ناجح اي ناجح نجحت يا صهيب و جت وتين تحضن في خوها
نجمة: الحمدلله يا رب نجحت و افتكيت يا ولدي ربي يخليك ليا وبدت تحضن في ولدها وتبوس فيه
وائل: مبارك خوي حتى كان نجاح بلا جهد لكن هي فرحتلك وقعد يحضن في خوه ويتبورد عليه
ايهم: خيركم متخلوش الواحد راقد لازم تنوضوه من نومه مش بشر حنى ولا كيف.
(ايهم خو وتين الكبير مواليد 2000)
وائل: انت اربعة وعشرين ساعة راقد يا راجل متشبعش منه النوم تى امت نضت انت بااش مخليناكش ترقد.
ايهم: تمشي من بحداي او نجيب اخرتك اليوم شكله تجري على نهايتك انت
نجمة: ياسر عاد احترمو امكم شويه انتم زي صغار خيركم لا تكبرو لا تعقلو خوكم كيف ناض خيركم معاه العفو يا ربي.
ايهم: شفتيهم كيف يا امي حتى في نوم الواحد حاسدينه
وتين: محامي دفاع دايما موجود كيف عاد متيقش في ولدها.
صهيب: اسمعو اني نجحت ونبي العاب نارية و اسمع يا ايهم نبيك ترمي برصاص اليوم نبي دنيا تولى نهار مدخليش.
ايهم: مشي جاب كلاش و قععد يرمي، تقول عليه عرس مش نجاح.
وتين: يا وائل شوف الباب اشبح منو يلي جاينا
وائل: اووو سي محمد جي كيف حالك
محمد: خليني ندخل الجو برا نو ساد من بسالتك، صهيب وينه
( محمد بو وتين والكل يخافو منه لانه صعب عدا وتين لانه مدللها هلباا ويحبها ، مواليد 1965)
جي صهيب وقعد بوه يحضن فيه ويباركله و ضحكو شوي مع بعض
وتين: هيا بنحط لغدي راهي الكل يجمع هني نظام جيش دايرتلهم هههه 😂
نجمة: شوفي جاد وينه طلع من صبح معش جي الولد هذا بيرقيلى ظغط.
وتين: ها جاد وينك بنحطو لغدي راهي وين انت بوك روح ويسأل عليك روح بسرعة فكنا من مشاكل
جاد: باهي اني حاليا ندور خلولى لغدي تو روح وكان سألك بوي قالك وين قوليله يصلح في سيارة باهي
(جاد خو وتين اصغر منها مواليد 2003)
وتين: مش كاذبه بنقله يدور من صبح ولغدي مش مخليتلك.
جاد: وتينتي عارفك اني تحبيني و بتخليلي و قولى لى بوي زي ما قتلك باي
وتين: اوف من ها الفرخ لازم يديرنا مشكلة كل يوم.
اجتمعو العيلة كلهم على سفرة لغدي و تغدو و كانو فرحنين لان صهيب ناجح و ما خلو ما دروله لانه ناجح غير شن يبي بس .
ناضت وتين غسلت ماعين لغدي و بخرت الحوش و قالت لى ايهم يجيب شكلاطة وعصير لان اكيد ناس سمعت بصهيب نجح فا بتجي تبارك.
وائل: وتين حبي نطلب منك طلب
وتين: مش فاضيه تو نضم في الحوش ناس بيجو بعدين
وائل: طلب صغير خيرك هكي، خيرني اني منرفضلكش في طلب و ديما نساعد فيك هيا وتينتي
وتين: تفضل شني تبي بسرعة.
وائل: نبي تعطيني عشرين دينار و ردهملك غير معنديش اني تو مفلس هيا 🥺
وتين: بعدين نعطيك تو مش فاضيه تعالى ساوي معاي الحجات.
وائل: باس وتين من عندي اني غيرك في دنيا اصلا وقعد يضحك.
طبعا وائل وتين قراب هلبا من بعض تقول ااصدقاء مش خوت بس، ولان وتين معندهاش اخت شيء هذا خلى فراغ كبير في حياتها لذلك وائل دائما كان قريب منها وصندوق اسرارها وديما يهدرزو ويفضفضو لبعض وهذا يلي خفف شوي من مُعاناة وتين.
في مكان اخرر.
انور: كيف حا تتصرف قولى وبعدين هما علاش يبو يزيلوك من منصبك شني مشكلتهم معاك.
( انور صديق طارق المقرب مواليد 1987)
طارق: مش فاهم بس هما هكي ناكرين للمعروف بعدين مستشفى هذي اني يلي كونتها و اني يلى خليتها هكي و مش حا نخليهم يتهنو باها و بينا الايام ولما نخليهم يندمو ونخليهم يعرفو منو طارق.
الممرض: دكتور طارق في حالة تبي تشوفك.
طارق: اوكي شوي و نشوفها قلها تستنى.
لافكار قعدت تمشي وتجي في بال طارق و مش عارف تصرف صح يلى لازم يديره بين مستشفى يلي هي كانت شاهده على بدايته و على تعبه يلي بسببه صاارت كبيره وليها اسمها بعد ما كنت مجرد مبنى صغير مفيش اقل لاحتياجات .
هل طارق يستسلم بعد ما زالوه من منصب المدير ويتقبل الواقع، اما انه بيحارب وبيدير المستحيل باش يرجع للمنصب متعه؟
هذا يلي حا نعرفو في الحلقات الجايه ##
