عُقدة الذَنب

البارت ال15

عقـدة الذنـب

• ريام الساعدي

• البارت الـ  15

🌼..

ـ مثل ماي النهر خابط
يبالي شبيك ماتصفه

لـ عريان 💚

،،،،،

علياء: هااا ابن عمي اظاهر الي
بالي صح راح نشوف عدڪم
عزا عن قريب مو..

انمار: اي يجوز عزاچن انتن قابل
جديده عدچن نرجع الأيام الخوالي
ايباااااه وين رجعتيني نار نار..

علياء : الي يجي من ايده الله يزيده
احرگ الإخضر واليابس

ـ حرگي منو لازمج نارڪم تاڪل
حطبكم يطبكم مرض فوگ مرض
محد خسر شي عدنا عايشيـن
ومكملين حياتنه ماوگفت الدنيا
؏ احد وربك ياخذ منا وينطي
منا بعد شڪوو  ..

ـ هههه حچي يفيدك مبين عليكم
هواي عايشين..

ـ هنه ثلاث شغلات الأنسان مايكدر
يعيش بدونهن.. الهوى.. المي.. و
الأكل لو عافهن يموت يبت عمي
وغيرها اهله بالدرجه الثانيه هم
نعمه يعيش وياهم وعدج بعد هسه
نت.. موبايل.. شاحنه وسماعات
اصليه ماتنگطع وتشغل سعد الحديثني
ويغنيلك ويطربك ولچ عرنه ولج
رانه يولي وين ربينانه واطگلك
الأصبعتين وتنسـم لو تخابر ربعك
تروح للشمال تتونس وتگضيها ويه
بنت حليوه تنسيك هموم العالم كله
وهاهيه جيبك مليان والله منعم
عليك بفضله تلف راسك وتنام وانت
ملك زمانك منو يحاچيك..

ـ اممم بس تبقى عازه المره عازه

ـ مزبلات بكد شعر ࢪاسي اتونس
براسهن شرايحلي ايد لو رجل
بعدني شباب شوكت مايعجبني
اشوفلي بت حلال حليبها صافي
بت اصل وفصل ومتربايه احسن
تربيه وتصون العشره وتعرف
امور دينها وماتغلط شريفه بت
اوادم وعينها ع بيتها اخذها و
اگعدها ملڪه عندي..

ـ والله اشوف راح تضل بلا زواج
طول عمرك ولل انت قفلت بعد

ـ اني قفلت وانتي؟ متگدرين
ضاله تهوبزين وتنفخين بسمچ
للرايح والجاي كفي شرج يا
علياء عنا وارڪدي وگولي يالله
مادام النفس طيبه عليج لاتنغرين
انتي واختج وتطيرن بالعالي تره
اطيحچن واڪسر جناحچ كسر
بيدي ومدام فتحتي الموضوع
جياتج حسبيلها الف حساب و
كلامج ثمني و وزني عدل يلا
تگولينه ولوو اني متأكده العدنه
كفوو ومايردها شي وتعرف شلون
تاخذ حقها تره ماتشبهه الي هنا
تلعب بيج لعب توديج للشط و
ترجعج طايح حظ حظ اكثر ما
هو طايح بس انطيها اشاره ولو
هي سباعيه واليدوس الها ع طرف
الله ما خلقه بعد وتعرفين احنه
مانتدخل بمڪاون النسوان ولا
ننحاز لطرف معين وهسه السالفه
الجديده الي طلعت من بيتڪم
لو بيت اهل نجلاء ؏ ابو چناين
ال سعد هم عدهن سوالف وبالذات
مرت شبل مخلياته برأسچن المعفن
وتذبن تهتم كلشي وصلني..