#مساء الخير #
"رغم كسرت قلبي احببتك"
زهرة: معقوله يمان طلب يتزوجني يمان اصلا مايباوع لوجهي ويكرهني منين اجاه الالهام وكعد يريدني ضليت رايحه جاية بالغرفه ماجاي استوعب هو بلسانه طالبني لا اكيد هاي بيبيته هي اجت خطبت مو هو ضليت افتر مااعرف شسوي شوية ودكت امل عليه
امل :ها زهورة شلونه معنوياتج فرحانه مو
زهرة: يافرحانه يامعنويات اني مجاي استوعب شنو زواج شنو يمان سولفيلي امل سولفيلي كلشي
امل : شسولفلج حبيبتي اني هم مامفتهمه
زهرة :اول شيء ليش ماكلتي انتم جاين وليش ماكتيلي ليش جاين معقوله تضمين عليه
امل :والله تدرين بيه مااضم شيء ويمان هم يدري فمن فتح الموضوع كلي لاتوصلينه لزهرة وترى هالموضوع صارله شهر من فتحه مو بارحه
زهرة: شنو شهر فهميني
امل: يمان قبل شهر اجه لامي وابوية وبيبي وكال اريد تخطبولي واني اقتنعت بالزواج اهلي كيفو وامي رادت تخطبلة اخت زينه بس هو رفض كال اني اختار الي اريده واني مختاره واريد ترحون تخطبون زهرة
زهرة: يعني هو كال هيج بلسانه مو اهلج اقترحو
امل :اي والله شبيج وراه اهلي اعترضو
زهرة: ليش
امل: مو اهلي قبل اجو وخطبوج لكرم وانتي رفضتي وهسة يمان يريدج يعني ماادري تفهمين عليه بس شلون يجيبون بنية لابنهم وجان رايده اخوه هيج قصدي
زهرة :جا شلون اقتنعو
امل: مو يمان قفل عليهم لو زهرة لو مااتزوج وهم كرم كال هو اصلا ماباله انتي وماعنده علم من اجت امي تخطبج اله مهم ملخص اقتنع ابوي وبيبيتي بس امي ضلت ماقابله لان رادت اخت زينه حتى تصير حنينة على طفل وداريه واخر شيء قنعت من سجلت ماجستير لان طفل ضل عليهه وهي ماتحب الجهال وكالت ازوج يمان واخلص
زهرة :اخوج ليش يريد يتزوجني مو يكرهني وماطايقني هو
امل: والله ياست زهرة هالسؤال يم يمان وحتى كرم كعد وياه وسأله وماجاوب
انتي شرايج هسة
زهرة :اني هسة حايره مااعرف شسوي وشريد اني مامفتهمه شيء وعقلي مشوش
امل :وافقي زهرة حتى تجين يمي ونصير اني وياج وبتول واسراء سوه على سيرة اسراء اكثر وحده مكيفه هي لان يمان خطبج
زهرة :امل هذا قرار مصيري هذا زواج مو لعب مو يومين ضجت ارجع لبيتي اخوج ماافهم كلشي منه غامض حيل وفوك كل هذا جان يكرهني هيج صحه من نوم حبني وراد يتزوجني
امل: ليش ماتخابريه وتسأليه كلشي بالج وبخاطرج وسمعي جواب
زهرة :والله يمان ماحصل منه لاحق ولاباطل خليني اصفي مخي وافكر اني رايحه
امل: الله وياج حبي
زهرة :سديته من تلفون ومددت على فراشي دايخه شويه وصار عشى وصاحتلي ضحى ابوية يصيحني نزلت على عشى وفتح موضوع
حسن: سمعتي ابن عمج رايدج شرايج بوية
زهرة: بوية نطيني مجال خل افكر احتاج وقت اقرر حياتي بيه
حسن: حقج بوية واني كلت لمحسن انطينه مجال بس هو كال اسبوعين وردولي خبر كافيات اسبوعين
زهرة: مااعرف وماادري سدو هالموضوع فدوه
ام مرتضى: والله اني رأي يمان مايتفوت يعني صح هو عنده طفل بس من كل ناحية ممتاز تتمناه الف بنية
ازهار: اي والله من كله جامعه اخلاق وادب وجمال وشغل وفوكهن كلهن متدين ويخاف الله فكري زين بنيتي مايتفوت صدك
مرتضى: وزهرة هم ماتتفوت شنو حاصله ياخذ بنيتنه الصغيره وزهرة البيت
زهرة :حبيبي مرتضى
نهينه الحديث وكمت نمت داومت ثاني يوم ومشه يومي ملل رجعت للبيت ميته تعب مشه اسبوع بهالملل واني مارديت خبر لاهلي يوم جمعة اجونه ناس والي عرفتهم جانو اخو جمانه صديقتي اجه تقدم لخطبتي وبدال مايفرحني هالشيء زود حيرتي امي كبت عليه بالملحه حتى اوافق على اي واحد واني مدري شبيه من تفكير زايد تمرضت صار عندي التهاب بالامعاء وتأزمت وضعيتي ابر وعلاجات مر سبوع الثاني واني قررت اخصمه وارد خبر لاهلي وبلغتهم بقراري بيوم نزلت على عشى ورة عشه ابوية صاحني يمه وحجه
حسن: بوية صارلج اسبوعين وتقدمولج اثنين اختاري تردين واحد منهم لو ترفضيهم اثنينهم اني مااكدر اقرر عنج لان هاي حياتج ومااكدر اجبرج بس اذا تردين نصيحتي ابن عمج احسن من غريب على الاقل نعرفه باجر عبكه صارتلج مشكله نتعاتب ونتصافه غريب مااحزر رداته اريدج تنطيني رأيج واذا تردين بعد وقت تفكرين براحتج
زهرة: اني قررت يابة اني صارلي اسبوعين موضوع بالي وينخر بيه وكد ماتعبت تمرضت
حسن: وشنو قررتي نكلج مبروك لو لا
زهرة :اني قررت اتزوج محمد وارفض يمان
ام مرتضى: ليش يمه شقاصر ابن عمج
زهرة :مايعجبني ومااريده
ام مرتضى: شنو هالحجي رجال شقاصر حتى مايعجبج رفضتيه ليش كولي السبب
حسن: باباتي لان عنده طفل رفضتيه مايأثر عليج طفل تكسبين بيه اجر وثواب دنيا واخره راح تكونين كافلة يتيم بوية
زهرة: والله مو هذا السبب بالعكس اصلا احب ابنه حيل ومو بالي هيج بس اني ويمان شخصياتنه متضاده ومتنافره مانكدر نجتمع سوه يعني بالنهاية زواجنه فاشل
ازهار :وانتي شلون حكمتي عليه بهالسرعه يمه خطبو ولبسو حلقات وتعودو على بعض وتفاهمو
زهرة اعرف نفسي وقابليتي واني يمان مااكدر اتحمله عصبي ومتسلط واني مااحب هيج شيء بابه انت تفهمني اني مااريد زوجي يكون هيج شخصيته
ازهار يمه لاتاخذين بشخصيته هسة تختلف لان ابن عمج بس من يكون زوجج غير
حسن :خلص يابة يروح يمان زين قرارج بزواجج من محمد متأكده منه هذا زواج للعمر مو لعب شلون فاهمته هم لو لا تعرفين شخصيته لو لا
زهرة :كلت اطلب منهم سنه خطوبه حتى اتأقلم واعرفه ودور اذا عجبني اكمل واذا مارتاحيت انفصل
ام مرتضى لحظه حسن واحنه نظل يوميه مطلكين مو
ازهار وشنو فرق هم ضلي ويه يمان فترة خطوبه وتعودي عليه
زهرة : يمه جا هي بيدي يعني شلون اعيش ويه شخص مامتفاهمه وياه
ام مرتضى: هاي سوالف الافلام عوفيه ازوجي ابن عمج وسكتي كافي بزعتيني شنو تردين مثل ياسمين تصيرين شلعت جبدي لحد ماتزوجت وخلصت منه نايمه على گلبي
زهرة :والله بيت ابوي مو بيتج من يصير بيتج طرديني لاتلحين عليه مثل سالفة سجاد تاليه طلكني بسببج
حسن: زهرة لاتتجاوزين
زهرة: اني مامتجاوزه يابة بس امي تحسسنه عيشتنه هنا ذلة جاي تشفق علينه بيه اني انسانه واحس وعندي مشاعر يعني شنو كل خطوبه تسويله سالفه شكبره شكده تحسيني هم وتريد تشمره ولا مرة محسستني اني مهمه اله وتحبني بس بده تزوجني
مرتضى :خلص زهرة روحي لغرفتج وسدو سالفه هي كالت رأيه بعد وهي مسؤوله عنه
زهرة: صعدت لغرفتي ودمعتي بخدي دوم امي هيج سوالفه تحسيني اني لاشيء ابد ماتوكف ويانه وحتى لو احنه اصحابين الحق
ضحى: لاتزعلين زهورة تدرين بخالتي هيج طبعه
زهرة: دوم تضوجني وتتقصد هالشيء يعني كل حنية ماعده ماما ازهار احن منه علينه
ضحى: هي طبعه ماتضهر حنيته بس هي تحبكم اكيد اكلج عوفينه منه انتي ليش رفضتي يمان مو تحبيه
زهرة :وشيفيد حبي ضحى اني يمان مافاهمه كلشي منه اروح اورط روحي وياه شلون
ضحى: كلت راح توافقين راح تحصلين حب حياتج
زهرة: حبي من طرف واحد اني مااعرف مشاعر يمان شنو ولاادري بيه هو لو فعلا يحبني جان اجه وكلي حتى استوعب مو كبل اجه خطب خطوبه تقليديه
ضحى :يجوز مايحب هالسوالف
زهرة :مااعرف الي اعرفه مااريد اورط نفسي واتندم مااريد امشي وره هفوات الحب وانسى هو شجم مرة اذاني وجرحني وقلل من احترامي
ضحى: صح بس قرار ارتباطج من محمد مو مستعجل
زهرة :لا اشرط عليهم خطوبه نضل فدم كم شهر او سنه لحد مااقتنع بيه
ضحى: الله يسهلج يارب تستاهلين كل خير
زهرة :كعدت على فراشي وبلغت جمانه بقراري حددو باجر يجون يتفقون على مهر والمشيه وعساس اكو عقد بس رفضت عقد مااعرف متردده وخاف اتورط بلغت ابوية وعمتي وابوية بلغ عمي محسن برفضي ليمان وعمي ضاج وانقهر وعاتب ابوية بس ابوية ختم الحديث كلشي قسمه ونصيب وزهرة مو قسمت يمان وان شاء الله يلكه غيره
خابرتني امل تعتب
امل: ليش ولج شناقصه يمان
زهرة :ماناقصه بس اني مااريد
امل :مو هذا الحب الي جنتي تنوحين عليه شصار بيج من خطب وتزوج مو دخلتي مستشفى زهرة ليش هيج رفضتي
زهرة: امل كلمن وطاقته واني ماعندي طاقه اتحمل يمان احنه مامتناسبين لبعض
امل :بسلا تسويه جياد وياه تردين تشلعين قلبه يالله توافقين
زهرة :لاوالله مو هيج قصدي اصلا
امل: قهرتيني وحتى يمان ضاج من كله ابويه خليتي امي تشمت بيه
زهرة: ليش تشمت عادي هي خطبه وماصارت
امل :تشمت لان كالتله مراح يقبلون بيك كون عندك طفل اخذ اخت زينه رهف راح تقبل
زهرة: لا شله علاقة والله مو لان عنده طفل اني رفضت بس فكرت احنه من اولاد عم نتعارك كلما نحجي حديث سوه هسة شلون اذا تزوجنه شهر ماندوم
امل: اوف ضجت ونقهرت حيل ردتج بكل طرق يمي
زهرة: الله يكتب الخير ان شاء الله ادعيلي اني وافقت على محمد
امل :شنو شنو ليش ولج
زهرة: شفته مناسب اليه
امل: ليش هيج زهرة صدك تحجين ولج يعني يمان مامناسب وهذا مناسب وج فهميني ليش هيج سويتي
زهرة :يمان اذا تزوجته راح ادوس على مشاعري واذي نفسي بأيديه لان كلنه نعرف هو مايحبني ومايكنلي اي مشاعر على الاقل اخو جمانه معجب بيه يعني اخذ الي يحبك ولاتاخذ الي تحبه
امل :لا مو هيج زهرة دمرين حياتج بقرارج وبتسرعج شمدريج يمان مايحبج جا هو ليش اصر اله انتي يتزوجج غير اكو شيء بداخله
زهرة: اخوج يكرهني من نظرات عيونه مبين واذا هسة اكو شيء بداخله جان حجه شغله لخ اني مستحيل اقبل بيه لان اخر موقف سواه بيه اذاني حيل وماسامحته ابد
امل: مااعرف شكلج هي حياتج بس احسج استعجلتي
زهرة :اوف مااعرف هي تصفه بعدين
امل: اتمنى ماتندمين
زهرة :ان شاء الله
سديت تلفون وحضرت روحي اجو اهل محمد وتفقو ويه اهلي على الجمعه المشيه ابوية خابر عمي محسن يتعذرله وعزمه على مشيتي صح عمي باركله بس جان ضايج وعزم الكل على مشيتي .
