السلام عليكم ياحلوين شخباركم اليوم راح نبلش باول بارتات القصة ونتمنى ان تنال اعجابكم وتستمتعون بيه 😊❤👋
# زهرة :-
كعدنه الصبح كالعادة لازم نكعد من وكت ونتريك ورانه دوام اكثر شيء اكره هو الدوام وكعدة الصبح والجو شته يكص كص نزلت تريك ولكيت العسل مالي مسويلي ريوك عمة ازهار الحلوه
ازهار : صباح الخير واخيرا كعدتي ردت اصعد اشمر فوكاج دولكة ماي ادري ميته شكد صحت شكد حركتج وانتي ماكو ليش تسهرين والصبح ماتكدرين تكعدين
زهرة : على كيفج على كيفج اكلتيني بكشوري يمه شجاج جان عندي تقرير وسويته والله ماجنت سهرانه علمود مسلسلات او كتب هدي علية بعدين يهون عليج اذبين مي بارد على هاالخلقه الحلوه بهالشتا هذا
ازهار: هو اني لو اكدر حان سويته بس مدري انتي شمسوية لهذه الگلب يحبج
زهرة : اروح فدوه اله تعاي نطيني بوسه اموحح
ازهار : يلة تعاي اكلي وروحي بدلي مابقه وقت هسه يجي احمد ومتلحكين وتضلين تغردين
زهرة: اي تمام صبيلي جاي
ازهار : هاج وهذه جبن وقشطه ومربى اكلي
زهرة : يمه وين ابوية واخوي وامي والبنات اشو ماكو احد سنطه بس اني وياج
ازهار : ابوج واخوج طلعو يردون يجيبون ذبيحه ويعزمون عماتج وعمج علمود دورة سنة امنه لان انتصار كالت تريد تجي للمقبره وهم كالو نسوي عزيمه يوم الجمعه فراحو اليوم يجيبوه لان منلحك
زهره : ها زين عمة انتصار تجي هي وجهاله ومنى مشتاقه الهم كلش ؟
ازهار : ماادري ماكالت
زهرة : امي وين
ازهار : امج غسلة الملابس وراحت تعلكهن وتكعد خواتج
زهرة: شعده من الصبح تغسل ملابس!
ازهار: مو نريد نشتغل ونظف البيت ونقطع اللحم علمود باجر كلشي جاهز
زهره:ها اكول يمه
ازهار: كولي
زهرة : خلي اضرب الدوام اليوم واساعدجن
ازهار: انجبي وداومي وشعليج بالشغل انتي انتبهي لدروسج مالج علاقه
زهره: صوجي قررت اساعد
ازهار:خطية تريد تساعد اعرفج تردين تكملين نومج امشي روحي بدلي ملابسح يلة احمد على وصول
زهره: كايمه كايمه
زهرة: كمت لغرفتنه اني وعمه وبدلت ملابسي ولبست تنوره بينصل بيجي وقميص وردي عريض وفوكاه ستره سوده مقفله بيجي شتويه وقفلته بالحزام مالته وبوت اسود وجنطه اسود وبيجي وشويه ميكب وشال بيجي نزلت جوه ولكيت ابوي واخوي جاين وجايبين الذبيحه وامي مكعده خواتي ومرت اخوي حتى يساعدنه لان جوري ماخذه اجازه اليوم وصلت للصالة وسلمت
زهرة :شلونك يابه
الاب حسن : هلا هلا شلونج زهيره الخبلة
زهرة : ادري شجلبتو بهاللقب كافي مليت منه تره كبرت 😡
الاب : على كيفج شنسوي غير حلو عليج واحبه زهيرتي
زهرة: يلة شنسوي دوم يتعذب الصغير بالحب (بدلع)
بهالاثناء اجت ماما ازهار
ازهار: يمه زهيره اجه احمد ابن عمتج يلة طلعي اذا كملتي لبسج
زهره: اي يمه مكملة يلة باي
الكل: الله وياج
€€ طلعت ل احمد ابن عمتي يوصلنه للدوام اني وبتول وجوارينهم بنية اسمه منار ويه بتول بنفس المرحلة وروان الي تداوم بمدرسه اهلي ادرس
ركبت السياره وسلمت
في_ السيارة
زهره: شلونك حمودي
احمد: هلا زهوره شلونج
روان: شنو تكوليلة حمودي شنو اخوج الصغير احترمي شويه
زهره: هلا استاذه غثيثة العائلة مدري عمتي شمتنسيه بيج كلهم عسل الا انتي جنج بومه
روان: احترمي نفسج هاي على منو بومه على حورج انتي جنج نعال
زهره:اكول روان مزاجي اليوم يكول يريد يكتل واحد ليش تصيرين انتي ومجربه كتلي
روان: مو هي سايبه الا اكول لابوج عنج
زهره:خايبه طيرين تهددني عشتو
احمد: يمعودات شبيجن جنجن بارود ونار استجنن خلي نوصل بسلامه
زهره:والله يا احمد اختك غثه شنسوي
احمد: نتحمله هههه
سكتت روان وصار الجو سكيتي طبعا دوم نتعارك بالسياره ويامه تسمعني حجي عود ليش تجين وياه ودبري لروحج خط بس اغلس لان احمد ماكو مثلة حباب كلش وهو يوصلنه بسيارته مو بسيارته فأنطيه اذن الطرشه خلي اطير بره غثه مرات اشك بيه بنت عمتي لان كلهم طيوبين الا هي شيطان .
وصلنه للجامعه ونزلنه اني وبتول ومنار وصلنه لكليتنه وافترقنه
رحت لقاعتي ولكيت صديقاتي فاطمه وجمانه وزهراء وكعدنه نسولف وحظرنه محاضرات ورحنه للنادي ناكل ومشه يوم عادي وطبيعي ورجعنه للبيت وبتول وعمتي وست روان اجو العصر يساعدون امي بس طلعت امي وماما ازهار مكملين كلشي نادرات وحتى ايناس وياهن وكعدن يمنه يسولفن لان اذا ماكو شغل اكو سوالف هههه وجابن سوالف و وراحت سوالف لحد منتفخ راسي وبتول اجت تريدني ادرسه ودرسته بس علتني ساعه يالله تفتهم واضل بس صياح وياه بس هي تسكت تدري بروحه تعل ودور صار وقت العشه لازم نسوي كامت ايناس وياسمين وجوري واني عود رحت اساعد وياهن كضيته اكل بالاكل لحد ماطردوني ههه سوو كباب كلي وطماطه وبتيته وسلكن معكرونه وحمسن اله لحم وبتيته صغار وسون كبه وبورك وزلايط وخضره سفره معدلة بقت عمتي يمنه على العشه واجه مؤمل واحمد هم هو وجهاله بس بدون مرته
