*مساء الخير*
"رغم كسرت قلبي احببتك "
زهرة : مرت ايامي متشابه ماكو اي حدث بيه نفس الروتين وعلاقتنه اني ويمان نفسة لاطورت ولا تحركت عمتي ام يمان بدت تلح عليه اسوي طفل واني مسايرته كالت تاخذني دكتورة وخذتني صدك نطوني مقويات ومنشطات ودكتورة كالت ماعندي اي مشاكل اني العلاج مابلعته وضميته لاتشوفه عمتي يمان من سمع تعارك ويه عمتي وماقبل وجان عذرة يوسف صغير ماتكدر عليه ويه حبله بيوم جنت متمدده بالغرفه اخابر بضحى دخل يمان راجع من شغل نهيت حديثي ويه ضحى وكمت سلمت عليه
يمان: زهرة اني اريد اسافر لدبي عندي مشكلة بالشغل هناك كلت اكلج حتى ماتزعلين وتكولين بابلغني
زهرة: توصل بالسلامه خير خو مو مشكلة قوية
يمان :صايرة خربطات هناك ويراد اروح ارتبه لازم فوك راسهم
زهرة: الله يسهله عليك شكد تضل تتأخر
يمان: مااعرف والله بس احاول ارجع من وكت ان شاء الله
زهرة: ان شاء الله احضرلك جنطتك
يمان :متعرفين شاخذ وياي بس اذا تردين ساعديني
زهرة :تمام اسويلك عشى لو متعشي
يمان: لا متعشي تعاي نحضر جنطه لان مالحك بعد
زهرة: اي بعيوني رحت وراه هو طلع جنطة السفر وكام يختار بالملابس واني اصفطله وارتبله بالجنطه ضلينه هيج لحد ماكمل وغلق الجنطه وراح يسبح اني رحت ارتاح هو طلع من حمام وراح لغرفة تبديل اجه يمي وحجه
يمان: هذا مصرف الج وليوسف واذا احتاجيتو بعد اخذي من ابوية واني من ارجع انطيه
زهرة: مااحتاج اني هو كاعده بالبيت شصرف
يمان: حتى لو اخذي كلشي احتمال يصير طبيب او طلعه لازم يكون جوه ايدج فلوس
زهرة: عندي والله اني مصروف الي تنطينياه مجاي اصرفه
يمان: زهرة لاتعلين كلبي اخذي فدوه
زهرة: اخذتهم منه وسكتت
يمان: مااوصيج زهرة مااريد مشاكل بغيابي اذا امي ضوجتت تحملي وسكتي لخاطري ويوسف ديري بالج عليه اي شيء يصير خابري كرم او ابوية
زهرة: ان شاء الله تروح وترد بالسلامه
يمان: من رخصتج اريد انام تعبان
زهرة: تصبح على خير
يمان: وانتي بخير
زهرة :كمت عن قنفه ونطيته مخده وغطى ورحت للجرباية نمت كعدت صبح متاخره يمان طالع خابرته جهازه مغلق مبين بالطيارة راسلته اطمن عليه وكمت مثل كل يوم اسوي روتين البيت مشت الايام والاسابيع يمان طول شهرين وكلما اخابره يكلي بعدني ومشغول ومااكدر ارجع بدون مااصفي شغلي ايامي تمر بضوجه وخنكه ضايجه وحدي ومشتاقه ليمان وكلما اريد اسولف وياه بسرعه ينهي الاتصال طكت روحي كل يوم انام دمعتي على خدي جنت اتمنى كلمه وحده حلوه منه كافيه تعيشني شهر بأمل بس مستحيل لان يمان جاف ومجاي افهم يتقصد لو هو طبعه هيج اخر اهتمامه اني
يوم قررت اروح لاهلي وابات كم يوم يمهم لان هنا ضوجه وامل عده امتحانات مااكدر اسولف وياه خابرت يمان وماعترض كأنو بس يريد يخلص مني غلست وبلعته بمر وكمت رحت بدلت اليه وليوسف ورحت لاهلي استقبلوني وكيفو بيه جانت ضحى راجعه بس ماتحجي ويه مرتضى
زهرة: شوكت رجعتي ولج ماكتيلي
ضحى: بارحه باليل اجه عمي حسن رجعني
زهرة: بس هو جا ومرتضى
ضحى: وين معبرني مرتضى ماكلف نفسه واجى اجو عمي وخالتي رجعوني
زهرة: وشمقرره شلون حياتج تضل هيج
ضحى: لا قررت اولد وانطي طفل واطلع من حياته خلي هو وايناس يربوه اني ماالي مكان بكلبه ولابعقله
زهرة :شلون ينطيج گلبج وج ابنج ضناج مستحيل تكدرين
ضحى: شسوي كوليلي راح ادخل بالثامن وهو مارايدني ولارايد طفل كل عقله ايناس مو تكول اني بشر واحس لا عبالة اني حيوان ميشوف كدامه معمي
زهرة: انطي مجال هو هم كثرة مشاكل يتعب خلي فترة يرتاح ودور تفاهمو شذنب هالطفل تعوفيه شذنبه ينحرم منج
ضحى: ذنبه ابوه مايريد امه ذنبه بركبت ابوه مااريد احجي وازود بكلامي لاانهار بس اني جاي اموت زهرة والله جاي اموت محد يحس بيه اني انسانه ماقاصرة من شيء من حقي احب وانحب من حقي اعيش ويه زوجي هو ليش دمرني وخلاني على الركن ليش يأذيني
زهرة: اوف يايمه كافي تبجين محد يستاهل دموعنه محد يقدر مشاعرنه وتعبنه يردونه نخدمهم ونكون تحت طوعهم وهم مقصرين
ضحى: تعبت تعبت واني اكتم الأه بصدري واكول باجر يتصلح كلشي وكل يوم يمر اتعس واتعس اني لو ماحامل دقيقه مااضل بس وين انطي وجهي اضل حمل على اخويه لشوكت ودور وياي طفل
زهرة :كولي يالله واهدي لكل حادث حديث منا لمن تجيبين احتمال يتغير كلشي توكلي على الله انتي والله يسهلج
ضحى: امين ادعيلي زهرة
زهرة: والله ادعيلج كومه كومي مددي ظهرج تكسر من كعده
كومته مددته بفراشه وطفيت الاضويه وطلعت فطرت گلبي ضحى فوك قهري اني انقهرت عليه احنه مالنه نصيب لا بالحب ولابالزواج ياريت ضلينه عوانس ولا هالشلعان گلب
رحت لغرفتي نمت اني ويوسف بعد ماراسلت يمان وطبعا مارد ساعات اكول من يرجع اكعده واتفاهم وياه على حياتنه وليش مبتعد عني وساعات اكول لا لاتنزلين نفسج محد يستاهل
كرامتج اهم نمت واني الافكار تهاجم مخي كعدت الصبح على صوت يوسف نزلنه جوه اني وياه ضحى هم نازله كاعده بالصالة بس ضحى من القهر مو نفسه ضحى القديمه وجهه اصفر وذبلان وجسم ضعفان بس بطنه كدامه جبيرة سوبت ريوك وجبرته تاكل اجت عمتي ازهار: تقلم بانية يمنه كمت اساعده دك تلفونه رفعته جانت عمتي ام احمد ردت عمتي عليه
ازهار: ها عيني ام احمد شلونج الولد والبنات شلونهن
زهرة: ضلت ساكته تسمع للطرف الثاني شويه وصاحت
ازهار: يا صدك الف الف مبروك يارب يتممله على خير والله فرحتله حيل يلة براحتج حبي خل اخابره اباركله
سدت تلفون واني حجيت _ماما شكو عليش تباركين
ازهار: بتول يوم واكعه بالدوام وماخذيه للمستشفى طالعه حامل
زهرة: الف مبروك يارب
ضحى: مبروك اله يارب الخلقه التامه وتكوم بالسلامه تستاهل بتول الله يوفقه
زهرة :تجمعت غصه بلعومي مو لان بتول حبلت لا بالعكس فرحتله بس تمنيت اني هم احبل مثله بس اذا يمان نافرني شنسوي اكيد مااروح اذب روحي عليه
اوف وين تريد توصلنه يايمان ليا محطه اخاف نهاية الدرب تكسر بخاطري
كملت شغل بالكوه حيل ضايجه ومقهورة امي رجعت من السوك وعمتي بشرته وامي راحت خابرت عمتي ام احمد باركتله من خلصت اجت عليه
ام مرتضى شسالفتج انتي راح يصيرلج بالسبع اشهر عدهم وانتي لسة ماكو شيء وهاي بتول صلوات شهرين وحبلت
زهرة: قابل بيدي يمه امر الله
ام مرتضى: خاف بيج شيء ولج خل ناخذج للدكتورة
زهرة: مو كتلج عمتي خذتني وكالت اله طبيبه كلشي مابيه بعد رزق ربج
ام مرتضى: جا ليش ماصار حبل اكيد او صوج منج ورجلج عنده طفل يعني انتي السبب
زهرة: يمة والله مابيه حيل شسوي يعني الله ماكاتب النه هسة وترة حتى يمان مايريد اطفال هسة حتى كال لامه هم
ازهار: وليش يمه بعدكم صغار جاشوكت تردون تخلفون من تشيبون
زهرة: ماادري هو مايقبل
ام مرتضى: ولج بسلا يبلعج مانع
زهرة: لا مااخذ اي شيء اني
ازهار: خاف مانع طبيعي مسوي اكيد ليش ماصار عندج
ام مرتضى: اي صدك راح من بالي
زهرة: شنو هذا عود
شرحلي الموضوع واني اهز بأيدي بگلبي كلت هو مسوي مانع ابدي اذا كتلهن بس مرة وحده متقربلي غير ينجلطن كدامي سايرتهن وسديت موضوع وهن بلشن نصائح اليه حتى احبل ومدري شنو دوخني شردت منهن بالموت كعدت بالحديقه اني ويوسف شفت يمان داك عليه رجعت دكيت عليه رفعه بسرعه
يمان: هلو زهرة شلونج يوسف شلونه
زهرة :الحمد لله انت شلونك هذا يوسف يمي الحمد لله زين مشتاقيلك
يمان: واني هم مشتاقلكم وين انتي
زهرة: بيت اهلي شوكت تجي
يمان: بس هالشهر صفيت اموري وارجع ان شاء الله
زهرة: ان شاء الله الله يسهلك
يمان: شتريدن اجيبلج هديه
زهرة: مااريد سلامتك
يمان: لا كولي اريد اطلع اليوم اشتري
زهرة :مااريد والله بس ارجع هاهي صدك سمعت الخبر
يمان: ياخبر
زهرة: كرم راح يصير اب
يمان: صدك شو ماكلي الادبسززز
كبر صغير وراح يصير اب الله يتممله
زهرة: امين
نهى المكالمه يمان ورجعت جوه بالبيت صار غده وتغدينه للعصر رجع مرتضى من شغل سلم علينه كمت صبيت اله غده
مرتضى: يمه ايناس مريضه ترحين وياي نروح نشوفه
ام مرتضى: شبيه
مرتضى: نشلة قوية ومصخنه ماخذته امه للطبيب البارحه انتي حضري روحج فد شويه نطلع
ام مرتضى: مااروح اني روح وحدك
مرتضى ليش يمه فشلة منه ومن اهله البنية متخربطه
ام : فشلة منهم بس من ضحى تتمرض وتحتاجك يمه وهي حامل ماتروح ولا تسأل ماتكول فشله من اخوه لو شفته يتيمه مستكوي عليه
مرتضى :هسة شجاب هاي على هاي يمه
ام مامجذبه اني هاي تركضله ركض بس هاليتيمه مامعبره وشايلة بطنه ابنك الي منتظره سنين وسنين هالطفل الي بطنه فرحتك الي يشيل اسمك خاف الله بيهم
لاتطغى
مرتضى: استغفر الله يمة لاتزودين حملي بالكوه اني لازم نفسي حياتي متخربطه بسببج
ضحى: عفوا استاذ مرتضى بشنو حياتك متخربطه انت الي مخربطه لاتتهم خالتي انت الي تتحمل نتيجة كلشي كله بسببك
مرتضى: شسوي شسوي يعني مااكدر هاي طاقتي اني اتخبل بدونه فهموني احبه ياعالم احبه ماابدله بكنوز الدنيا حتى بالطفل الي شايلته والي فرحتي بيه
ضحى: بصياح واني شنو ذنبي اني شنو ذنبي شسويتلك ماقصرت وياك بشي تدوس عليه وتأذيني ليش تدمر مستقبلي وحاضري وحياتي ليش علمود حبك تكسر بروحي وبگلبي ليش هيج
مرتضى: ماجنت اريد اتزوج ولااريد طفل بس انتي يمه جبرتيني انتي الي خليتيني اختار هالزواج خليتي غضبج عليه حاجز بينه
ام مرتضى: هاي فوك زينتي ردتك تصير اب ماردت نسلك ونسل ابوك يندثر ولك انت ماحامد النعمه الي بيه هسة مرة صغيرة وحلوه وخادمتك وحامل منك ورايح تركضلي وره ذيج
مرتضى: اركض وراه لان گلبي يمه گلبي دك اله وبس ليش مجاي تحسون بيه ليش ماتعذروني
ضحى: لا اني احس بيك احس بيك لدرجة اريد اتخلى عن ابني وانطيه الك تربي ويه مرتك شفت ليا درجه وصلتني اتخله عن قطعه من روحي بس حتى ماينولد ابني ويشوف تصرفاتك ويه امه حتى مايشوف امه وهو منبوذين منك
ام مرتضى: ولج انتي شجاي تحجين غصبا عنه يرضى بواقعه ويسكت هو المسؤول
ضحى: لا خاله مااريده بعد لان طاقتي وصلت لحافة الانهيار اني تعبت منه ومن اسلوبه وياي اني من حقي اعيش ويه واحد يحبني يقدرني مو يحسسني اني فضالة زايده عليه مو يحسسني اني هم عليه وبس يريد يزيحه
زهرة: كعد مرتضى لازم راسه وساكت امي وازهار يحجن ويه ضحى وهي قافله تريد تنطي طفل بس تولد ان شاء الله الهم وكالتله بلغ مرتك ابني اله وهي امه من صدك ضحى تخبلت ونهارت
مرتضى: كافي مااخذ طفلج انتي تربيه ايناس هذه قسمته من دنيا والحمد لله على كل حال
ضحى :ليش ماتاخذه حتى هو كاره لان اني امه لهدرجى تكرهني مرتضى حاقد عليه ليش
مرتضى: سدي موضوع ضحى كافي بعد مااتحمل
ضحى: مااسده اني من حقي احجي واعرف مصيري ماتسكتني اليوم صارلي اشهر ساكته ومتحمله بس هسة مااكدر بعد
مرتضى: شتريدن ترديني كوه احبج مو بيدي هي دكمه وادوسه قابل كافي عاد بزعتيني من اول يوم زواج كتلج اني مااحبج ومن ينحط ميزان راح تميل الكفه لايناس
ضحى: شكد اناني وظالم ليش هيج تسوي بيه من ماتحبني ليش تممت زواج واحنه اشهر كاعدين سوه مثل الاخوان ومن تممته ليش خليتني احبل منو الي يلح عليه ايام ويزعل لان مااقبل ابزواج يتم كتلك راح تندم مرتضى كتلي مااندم اني ادرس خطواتي خوش دراسه دراستك هذا الجرح الي بگلبي منو يداويه صرخات روحي منو يسكته بسبب منو اني جاي اتعذب واموت ولكم كلولي شسويت بحياتي حتى اتعاقب بيك انت عذاب نزل عليه شسويت حتى اتجازه هيج لااذيت احد ولاكتلت احد بريت بأهلي لاخر نفس عدهم ليش اني اتعذب بحياتي ليش اني فقدت اهلي وسندي واجيت يمك ملطشه كوليلي خاله اني مذنبه بشي اني مسويه شيء وماادري
ام مرتضى: وج كافي يمه راح تموتين كافي مو زين على الطفل انتي حامل سوده بوجهك مرتضى خليت البت تنهار
ازهار: كافي يمه شيفيد الحجي ياعيني تعاي
ضحى: گلبي مسكور ياخاله والي كسرة ابنج كرهت حتى ابني من وراه لان يحمل جيناته لان من صلبه ولك نار مشتعله بداخلي عساه هالنار بيك الله لايوفقك الله لايوفقك ماشفت الراحه بيتك كبرت فوك عمري عشر سنين
زهرة: متنه كلنه من البجي من تحجي ضحى ماتجرءت ودخلت لان حقه بكلشي ولازم تحجي لاتخنكه العبرة بس ضحى تعبت كلش وكعت على القنفه ترعش ودايخه ركضت اله اني وامي وعمتي ومرتضى راد يلزمه دفعت ايده وحجت
ضحى: روح مااريد اشوفك بعد لهنا وتتفرق طرقنه اسامحك على الي سويته بيه بس على الطفل وحملي الي كاسر ظهري بيه مااسامحك روح رجع الي تحبه وبشره راح اتطلك منك
زهرة: مرتضى انسحب بهدوء وطلع جان كلش مقهور كلام ضحى قهرنه كلنه كومته غسلتله ونيمته بغرفة عمتي وهي بس تبجي بحركه ضليت يم راسه اقره ايات اهديه لحد ماغفت من تعب ودموعه جفت بخده عفته وطلعت
ازهار ها شلونه شلون صارت
زهرة: ضلت تبجي لحد مانامت من تعب
الام: اوف اوف يامرتضى شلعت گلبي يايمه ساعة السوده الي خطب بيه ايناس اوف ياحسن منين جبته اليه
ازهار :كافي لاتظلين تحركين بروحج ومنا ضغطج صاعد
الام :شلون مااحرك روحي واني سبب بعذاب هالبنية كلت راح يشوفه حلوه وصغيرة يكيف عليه اتاري ابني معمي عيونه مدري شمسويتله ذيج البومه
ازهار: خل يرجع ويرتاح واحجي وياه بكت مغير رأيه
الام: ولج شحجي راسه يابس جنه حجار اني وحسن طلع على لسانه شعر ومااقتنع شكول لاختي من الكاه بالاخره شكول اني كسرت كلب وحيدتج وبنيتج امانته هاي سوده بوجهي لو مزوجته لاي واحد ومأمنته ليش جبته ليش
زهرة: امي كامت تبجي وتنحب بقهر عافتنه وكامت للغرفه اني من احداث اليوم تعبت صعدت ويه يوسف ونمت بلا عشى بس قبل لاانام خابرني مرتضى طمن على ضحى وراح نمت للصبح فزيت نزلت اشوف ضحى جان مرتضى نايم بالصالة رحت لضحى جانت كاعده تقره قران صبحت عليه وعفته دك تلفون مرتضى كعد رفعه وصاح
مرتضى: شدكول ياسر تحجي صدك وهسة وين هي بيامستشفى
ولك عايشه لو ميته كلي بروح امك احجي يلة جاي اني
زهرة: شكو خير شبيك
مرتضى: ايناس واخوه رايحين للمستشفى ومكلوبه سيارة بيهم اني رايح اشوفهم ادعيله فدوه زهرة
زهرة الله يشافيه ويرحمه برحمته طمني
عافني وطلع واني كلت لامي وعمتي وضحى جانت كاعده
ضحى: الله يشافيه ويكومه بالسلامه
الام: هاي حوبتج خالة فرفحج مرتضى البارحه والله فرفح گلبه صح ابني بس هذا الحق
ضحى: معليه بيه الله يوفقه ويسعده اني خابرت سجاد يجيني لاتحاولون بعد ترجعوني خاله اذا اني صدك امانة امي عندج اوكفي وياي وطلكيني من ابنج خلصيني من عذابي
ام مرتضى: اوف يمه ماردت انطيج للغريب حتى مايأذيج ويستقوى عليج لان يتيمه تالي ابني اتعس من غريب روحي يمه اني بظهرج بأي قرار ارتاحي خل ترتاح امج
زهرة: كامت تجمع غراضه ورة ساعه اجه سجاد اخذه ودعتنه وراحت ولليل اجه مرتضى عرفنه مابيه شيء بس كسر بالايد وخدوش وهو درة ضحى راحت لاهله ابوية استلمه رزايل وهو ساكت ماحجه لان معنده اي شيء يحجيه
اني من توتر الاجواء والكأبه قررت ارد لعيالي خابرت كرم اجاني ورجعت
