ကာဇဲအင်းနှင့်သူ၏ဧကရီများ (ပူးတွဲရေးသားခြင်း)

V1 Chapter 27

ကာဇဲအင်းနဲ့ဧကရီများ : အတွဲ ၁
အခန်း ၂၇ : ဂမ္ဘီရ နဲ့ နိုင်ငံရေး

ကာဇဲအင်းလက်ထဲက စာအုပ်နှစ်အုပ်လုံးက
စာရေးသူတစ်ယောက်တည်း။ ကလောင်နာမည်က "ဗီယာ ကပ်ဖ်ကာ" တဲ့။
"နေပါဦး ဖရန့် ကပ်ဖ်ကာရဲ့ မျိုးဆက်များလား"
ဒါပေမယ့် ဖရန့်ကပ်ဖ်ကာ က ဂမ္ဘီရတွေရေးတဲ့လိုင်းမှမဟုတ်တာ။ ပြီးတော့ အရင်ကမ္ဘာမှာ သူသိတဲ့ ကမ္ဘာကျော်ဂျာမန်စာရေးဆရာ ဖရန့်ကပ်ဖ်ကာက အိမ်ထောင်လည်းမပြုခဲ့ဘူး။ နာမည်တူတာပဲ ဖြစ်မှာပါလို့ တွေးရင်း
"သဘာဝလွန်ဖြစ်ရပ်အမျိုးမျိုး" ဆိုတဲ့ စာအုပ်ကို စဖတ်ကြည့်လိုက်တယ်။
စာအုပ်ရဲ့ မာတိကာမှာ ခေါင်းစဉ်ငါးခုပါတယ်၊ ပထမဆုံးတစ်ခုက စာအုပ်မျက်နှာဖုံးမှာ သရုပ်ဖော်ပုံပါတဲ့ "ပျောက်စေ ဆရာကြီးရက်ပြုတင်" အကြောင်း၊ ဒုတိယတစ်ခုက
"ဟော်လန်ပြည်မှ အကြားအမြင်ဆရာမ
ကက်သရင်းဇဲရို"တဲ့၊ တတိယတစ်ခုက "မဟာစစ်ပွဲကြီးအတွင်းမှ သဘာဝလွန်ဖြစ်ရပ်များ"၊ စတုတ္ထတစ်ခုက "စိတ်တန်ခိုး"၊
နောက်ဆုံးတစ်ခုဖြစ်တဲ့ ပဉ္စမ တစ်ခုက "အိပ်မွေ့ချခြင်း"။ ဒီစာအုပ်က ဝတ္ထုဆိုတာထက် ဆောင်းပါးစုစည်းမှုဆိုရင်ပိုမှန်မယ်။
ရက်ပြုတင် အကြောင်းဖတ်ကြည့်တော့
အရင်ကမ္ဘာကဟာနဲ့ မခြားဘူး။
ပိုဆိုးတာက ဒီကမ္ဘာက မိန်းမတွေအုပ်ချုပ်တဲ့ကမ္ဘာကြီးဆိုတော့ ဇာဘုရင်မရဲ့ညီမ
အိမ်ရှေ့စံမင်းသမီး ကအစ အစေခံအဆုံး
သူနဲ့ လွတ်တာကိုမရှိဘူး၊ လိင်ပွဲတော်တွေကျင်းပတယ်၊ အကျင့်ပျက်ခြစားတယ်၊
ဘုရင်မကပေးထားတဲ့ ကိုယ်ရေးအကြံပေးရာထူးကို အသုံးချပြီး တိုင်းပြည်ကိုပါလုပ်ချင်တိုင်း လုပ်တယ်။ နောက်ဆုံး မခံနိုင်တော့
တော်ဝင်အုပ်စုထဲကလူတွေကိုယ်တိုင် သူ့ကိုရှင်းပစ်ဖို့ လုပ်ကြတယ်၊ လေးခါလုပ်ကြံဖို့ ကြိုးစားတယ်၊ မအောင်မြင်ဘူး။
နောက်ဆုံး လက်ယာအစွန်းရောက်နိုင်ငံရေးသမား ဗလာဒီနာ ပိုလီနာကယ်ဗစ်၊
နယ်စားအရှင်မ ဒရီယာ ပါဗလိုဗစ်
မင်းသမီးအီရီနာရဲ့ ကြင်ယာတော်
မင်းသား ဖီးလစ် ဦးဆောင်တဲ့ အဖွဲ့က
လုပ်ကြံမှပဲ အောင်မြင်တော့တယ်၊
အောင်မြင်သွားတော့လည်းဆိုင်ယာနော့ဒ် အဆိပ်ခတ်တာတောင် တော်တော်နဲ့မသေလို့ ခြောက်လုံးပြူးနဲ့ တေ့ပစ်လိုက်ရသေးတယ်။ အဲဒါလည်း မသေသေးလို့ ရေခဲနေတဲ့ မြစ်ထဲ
ပစ်ချလိုက်မှပဲ နိဂုံးချုပ်တော့တယ်။
ကာဇဲအင်း ဓာတ်ပုံမှတ်ဉာဏ်က မှတ်မိသလောက်ဆို အရင်ကမ္ဘာက သမိုင်းထဲမှာ ရက်ပြုတင်ကို လုပ်ကြံတာက လက်ယာအစွန်းရောက် နိုင်ငံရေးသမား ဗလာဒီမာ
ပြူးရစ်ကယ်ဗစ်၊ နယ်စားကြီး ဒီမီထရီ ပါဗလိုဗစ် နဲ့ မင်းသား ဖီးလစ်။ သုံးယောက်လုံးက ယောင်္ကျားသားတွေချည်းပဲ၊ ဒါပေမယ့်
ဒီကမ္ဘာမှာတော့ မင်းသားဖီးလစ်က လွဲပြီး
ကျန်တဲ့လူတွေက မိန်းမတွေဖြစ်နေပုံပဲ။