عسـى نهاية أشواقي في حُضـنك

Part 35

دخلتهم غرفة نجود وهي تتكلم عن تفاصيل العرس ..
الجدة : خلصنا أغراض عروستنا الحلوه نجود ، وانت أغراضك جاهزه ، ورسلت دعوة لكل الي اعرفهم والي ما اعرفهم ، وان شاء الله زواجكم الخميس ذا بعد يومين بقاعة ***
تكلمت كثير عن العرس وتفاصيله ، وكانت نجود واقفه بجنبه وكل ثانيه تناظر فيه ..
طلعت الجدة بعدما فهمتهم كل شي ، وتكلمت عن مشاعرها وكيف انها مبسوطه لزواجهم الي بعد يومين ..
لفّ هاشم على نجود الي وقفت أمامه متكتفه ..
حط يدينه بجيوبه بهدوء مو عارف كيف بيبدأ كلامه
وبحركه مفاجئه من نجود قامت وحضنته ودموعها تنزل بكل هدوء
نجود : علقتني فيك وبالأخير حاط قلبك عند الي كانت اقرب الناس لي ؟ شسويت فيني انت ! دايماً افكر فيك وانا بين الناس والعالم ، وصلت حتى ادعي لك بصلاتي !!
شدّ بحضنها : والله تركتها .. والله
ناظرت فيه بعيونها الي صارت حمراء : لا هاشم بنات الناس مو لعبه ، تروح تترك هذي وتلعب بهذي وتكره وتحب هذي ..
حط راسه بكتفها : يشهد الله اني حبيتك اكثر من حبي لنفسي ، ويشهد الله انك الحب الاول والأخير !
كمل وهو يمسح دموعها : وعيونك الحلوين لا تبكي
-
" الـلـيـل - 12:00 "
جالسه بالحوش تشرب قهوتها وتناظر بالمطر الشبه خفيف والبنات الي يلعبون اونو .. البيت هدوء ونصهم نايمين ، وتقريباً فضى لأن عائله عبدالله
( ابو هاشم ) رجعو لبيتهم ..
وبعدما انتهت من قهوتها انضمت تلعب
مع البنات
-
" بـعـد يـومـيـن - بـالقـاعـة "
وقتها ما كانت تقدر توصف شعورها .. شعور فرح وتوتر بنفس الوقت .. وبذا الوقت كانو البنات متجمعين وجالسين حول نجود
عهود : إلا نجود انتِ ذوقك حلو بالاختيار ، اي لون مناكير اختار ؟
لفّت وعد لـ نجود : هذا الفستان ولا ذا ؟
لمى : حتى وهي عروس ما سلمت منكم
ضحكت رزان : هي تجهز نفسها ، ولا تجهزكم ؟
وعد : انطمي لا أقوم عليكم انتِ وياها
ديم : بنات بعد بكره بنروح الشاليه ؟
عهود : ايه بنسوي عشاء هناك
لفّت رزان بتساؤول : مشعـ .. اقصد جيراننا بيجون ؟
عهود : اظن ايه ، امي عزمت بس الي نعرفهم واتوقع الجيران بيجون
طلعت لهم جود وبحماس : دامكم متجمعين يا بنات عندي لكم خبر !
عهود : وشو ؟
جود : أنا حامل !!
نجود : كذابه ؟ بكون خاله !
لمى : وانا بعد ؟
جود : ايه
حضنتها نجود بقوه : بكون خاله يا بنات !!
نغم : مبروك مبروك يالخاله ويالام
بعدّت شوي عن جود وحضنت نغم : الله يبارك فيك
ضحكت عهود : بشرو اخوي محمد انه بيكون جد
جود : علمته وعلمت الكل
نجود : متى دريتي ؟
جود : قبل ثلاث ايام
نجود : ليه ما علمتينا ؟
جود : قلت اسوي لكم مفاجأه
عهود : عاد انا عمتك المفروض اول من يعلم ، مو اخر من يعلم !
نجود : انا المفروض أصلاً اعرف قبلك وقبلها يا عمتها
جود : قبلي ؟ حبيبتي أنا ام المولود ، أنا الحامل
ضحكو لمى والبنات عليهم ..
-
" بـعـد الزفـه "
زفو نجود لـ سيارة هاشم .. و ودعوهم
لمى : تدرون وش احلى شي ؟ يوم يعرسون خواتكم وتبقين الوحيده الصغيره !
ضحكت رزان : ترا الحامل وراك تسمعك
جود : والله ما هميتوني ، اهم شي أكلت البيبي ورق عنب وعشيته