أصدقائي الكرام القصة بعنوان إنتقام أنثى أتمنى أن تعجب حضراتكم

إنتقام أنثى بارت ٤٠ والأخير

مساء الورد
أريد تفاعلكم ويكون رأيكم بالقصة مهم إن كانت حلوة لو لا تفاعل وإعجاب أريد الصفحة تقوى لأن عندي قصص أحلى من هاي القصة أريد أنزلها
الكاتب مرتضى الهاشمي

إنتقام انثى
البارت٤٠ و الأخير
سحر وجها ينزف من أثر الضربة بالسچينة من رضا
ساره خافت گامت تعيط وتبچي
خاله لتموتين خاله سحر
رضا يضرب ساره راشدي وينومها على الكشن
سحر تتعصب وتصير نار وتصيح على رضا
حيوان عوف الطفلة تريد أكتلني أني يمك لدخل الأطفال بالنص
رضا إنتي تحجين هيجي ولچ هو منو إلي دخل الأطفال بهاي المشاكل ساقطة
سحر أني مأذيت بنتك ومچنت ناوية اسويلها شي
ساره تبجي من الخوف وتگول
خالة عفيه كولي لعمو خل يعوفنا خاله أريد أروح للبيت
سحر حبيبتي راح ترجعين للبيت لتبچين
رضا حركي السيارة لا اكتلچ إنتي وساره
سحر نزل الطفلة يله السيارة تتحرك
رضا يخدش رگبة  سحر بالسجينة
ولچ امشي لا اكتلكم اثنينكم ولله
سحر تلزم رگبتها والدم يوگع على إيدها
عوف ساره مالها دخل
رضا الملابس إلي گتلچ عليها وين
سحر بالعلاگة بالكشن الوراك
سحر تمشي بالسيارة ورضا يبدل ملابسه بسرعة ويخلي العباية والشال بالعلاكة حتى يلبسها من يريد ينهزم ويتنكر بيها
رضا خله ساره بحضنه والسچينة على رگبتها ويگول لسحر
أي خطأ منچ الطفلة تروح بيها
سحر دخيلك عوف الطفلة لتأذيها
النقيب علي كاعد يشوف إلي يصير بالسيارة لأن حط كامرة بالسيارة قبل لا سحر تروح لرضا
النقيب علي منريد هسه تهجمون عليه عنده رهينتين وسحر تنزف راح اگللكم على خطة
الملازم رعد تحت أمرك سيدي شنو الخطة
النقيب علي حضرولي سيارة كاملة بيها خرفان
الملازم رعد متعجب خرفان شسوي بيها سيدي
النقيب علي  بعدين تعرف أريد ٢٥ خروف بسرعة من أقرب جوبة لو كصاب
الملازم رعد صار سيدي
سحر هسه وين تريدني أروح وإنت تعرف المنطقة كلها محاصرتها الشرطة
رضا ضربي السيطرة كل سرعتج وفوتي
سحر شلون أضرب السيطرة غير يرمونا و نموت
رضا سوي مثل ما گتلچ أني عندي رهينتين محد يرمي 
سحر حاضر بس لا تأذي ساره
النقيب علي فتحو الطريق الهم خلوهم يطلعون وسوو سيطرة بعيدة ولازم يكون تحت عينكم وتراقبوهم بدون ميحس رضا
الملازم رعد نعم سيدي تحت أمرك
النقيب علي الخرفان حضرتوها
الملازم رعد إي سيدي خابرت على كصاب كال موجودات بالجوبة گتله جيبها هنا بس مگتلي شسوي بيها
النقيب علي أول شي ليجيبها هنا بعدين  أگلك وين تودوها و ثاني شسوي بيها أريد أضحي بحيوان أحسن ما أضحي بشر وعنده رهينتين لاتنسى طفلة ومرة وهذا يكتل فلازم أتعامل ويا بخطة ثانية متجي على باله
ملازم رعد مفهت شنو تريد تسوي
النقيب علي ماكو وكت هسه أفهمك بس راح تعرف بالأخير وتعرف شلون محسب حساب لكلشي
النقيب علي يذكر من گال لسحر قبل لا تصعد السيارة
هاي مهمة خطرة عليچ وأني احييچ بس أريد حسب التوجيهات تمشين وحاولي تعرفين وين يروح حتى اكدر أعرف وين انتظركم أني راح اراقبكم عن طريق الكامرة إلي خليتها أريد منچ الهدوء واريدچ تكونين واثقة بخطواتنا و تتوقعين الهجوم على أي لحظة لتخافين ما راح نأذيكم بس راح يكون تركيزنا على رضا
رضا طلعي بسرعة السيطرة مفتوحة
سحر تنطلق كل سرعتها والشرطة يگومون يرمون بالهوى طبعا بإتفاق مسبق مع النقيب علي ولحگتهم دورية
رضا طلعي يمنا وهسه يسره ضلي بين الفروع من يتهچ روحي على الشارع العام
سحر تسمع كلام رضا وتخلص من الدورية بعد إن طاردتهم وتصير على الشارع العام
سحر انت هسه وين مودينا غير أعرف حتى اسوق عدل
رضا طلعي على القناة مناك طلعي على طريق التاجي ولزمي السريع لحد ما نكون بعيدين عن بغداد
سحر صار
سحر تكلم روحها وين صرت نقيب علي راح اخلص درب القناة وين صرتو
مشو مسافة بعيدة وعبرو التاجي والطريق گدامهم مفتوح وبدت اتأيس سحر كل ضنها النقيب علي عافهم
رضا بده يرتاح وفرحان وخاصة من شاف سحر تمشي بسرعة فائقة ومحد كدر يلحگهم فجأة سحر تلاگي قطيع من الخرفان گبالها يعبرون السريع وهي جايه بسرعة إنصدمو ورضا وسحر ورضا گام يصيح على سحر
ولچ بريك بسرعة ذني إذا دعمتيهن راح يگلبونا ويفلشون للسيارة
قررت سحر إدوس بريك فكان بريك مفاجئ ورفعت السايد بريك هم والسيارة إفترت بيهم وإثناء ما إفترت ضربت كم خروف و انكلبت بيهم السيارة
محد گدر يسمع الثاني ولا واحد يگدر يتحرك بسبب الصدمة والخوفة من الحادث
بينما النقيب علي وباقي الشرطة التمو على السيارة حتى ينقذون منو بيها
الشرطة طلعو سحر وسارة ورضا
سحر بعد ما فاقت تصيح ساره وين ساره ساره
النقيب علي ساره مابيها شي بس خدوش راح نوديها للمستشفى نطمئن عليها
سحر أريد اشوفها
النقيب علي لتخافين راح تجين ويانه إنتي هم
سحر إنت چنت مضحي بينا نخلص من رضا تكتلنا إنت
النقيب علي أني متصورت راح تمشين هاي السرعة مو گتلج لتتعدين ال١٠٠ سياقتج كانت سريعة كلش ثاني شي أني لو فكرت أضحي بيكم ومسويت الخطة چان رضا كتلكم وبعدين هاي انتو كلشي ما بيكم
سحر المفروض تكونون متوقعين لكلشي
سحر تلتفت وتشوف رضا لازمي ٢ من الشرطة ويريدون ياخذو لسيارة الإسعاف
سحر تتفل بوجه رضا وتگله
حيوان ميكفيني منك لو أشرب من دمك تريد تهجم عليه لكن النزيف بسبب الجروح انهك حيلها وأثر الحادث ايضا توگع سحر بالشارع وهي مغمى عليها
بعد ما نقلوهم للمستشفى
بعد إسبوع
سحر بالمستشفى وبعد ما صحت وتشافت من الحادث لأن كان بيها رضوض بسيطة بس النزف والصدمة أثر عليها
الممرضة تدخل على سحر وتنطيها علاج وتضمد الجروح
سحر شوكت أطلع وليش محد إجه زارني
الممرضة الضابط منع الزيارة إلچ و كان المفروض من البارحة طلعين لكن النقيب أمر تبقين يوم واحد بس
سحر شنواني متهمة
تگوم سحر من السدية وتريد تطلع بس تنصدم النقيب علي وفراس يدخلون عليها
سحر هلو فراس شلونك ليش محتجزيني هنا وليش محد إجه سأل عليه
فراس عيونه كلها غضب وحقد ويريد ينتقم منها لكن النقيب علي يباوع عليه ويمنعه
سحر شبيك فراس ليش هيجي ويايه شسامع ليش عصبي وعيونك يجدحن نار
فراس  الچ عين وتحچين وتسألين بعد ما خنتيني
سحر تنصدم بكلامه وتخلي إيدها على حلگها وتفتح عيونها كلها وهي تسمع لفراس يكمل كلامه
ليش هيچي نزلتي راسي أني تالي عمري أفتر بالمراكز والمحاكم بسببچ مثلتي عليه فاقدة الذاكرة و كذبتي وحرتي شسويتي گلت عادي و چنت دائما أگلچ گليلي سحر عتدچ شي بعد صامته تگولين لا وتصيحين وتبچين وتگولين هاي أعداء إلك تالي
ويصيح بأعلى صوته وبعصبية
طلعين حضرتچ عاشگه واحد من ورايه وتريدين تسترين على جريمتچ
سحر تبچي بحرگه وتگوم تركض على رجل فراس وتبوسها
سامحني ولله مخنتك ولله غلطة و دفعت ثمنها كل هىذا إلي سويته حتى متعرف بغلطتي أبوس رجلك سامحني خليني خادمة إلك ولجهالك لتعاقبني أكثر إلي شفته أني مو قليل ولله حتى إنتقامي حتى ترضى عليه وتندمت ولله تندمت لخاطر ولدنا سامحني لخاطر سحر حبيبتك سامحني وخليني خادمة إلك ولجهالك أبوس رجلك لا تعوفني أموت بعدك ولله أموت
فراس يصير أحمر من العصبيةوعينه  تفيض من الدمع لأن إنقهر عليها
لو ما انطيت تعهد للنقيب علي كان هسه أني كاتلج رضا كلشي اعترف وفضحتيني ليش ولچ بيش قصرت وياچ چنت أحارب راحتى والنوم لاجلج ولأجل مستقبلج هاي تكون مجازاتي
سحر ولله غلطت اكلتني ريحني اشرب من دمي بس لتشيل بگلبك عليه ولا تگول راح أعوفچ أموت بعدك ولله امووووت وخليها بالك فراس أني مخنتك ولله مخنتك أني غلطت وچانت نزوة وعلاقة عابرة بس ولله مخنتك إنطيني فرصة وحدة أخر فرصة بحياتي ولله إذا غلطت بشي عوفني لو تكتلني لو شسوي بيه سوي المهم بس فرصة
فراس انطيتچ فرص وكتلچ قبل هذا الوكت وأكثر من مرة صارحيني يجوز اكدر اساعدچ جايه هسه تريدين السماح بعد ما نزلتي راسي بالطين
النقيب عمر يرفع سحر من الگاع ويكعدها على الكرسي ويگعد مقابيلها ويكلمها
النقيب علي سمعي سحر حتى لو فراس يريد يسامحچ فيراد وقت أما هسه عندي كم سؤال الچ وأهم سؤال و اولهم المرحوم عمر من اغتصبچ بيته شلون رحتيله
سحر تنصدم شنووو المرحوم ليش عمر مات
النقيب علي إي مات البارحة أثر المخدرات إلي كان يتعاطاها وبسبب موته مگدرنا نجي عليچ ونكمل تحقيق أجلناها على اليوم
سحر تباوع على فراس بخجل وكإنما تشكره لأن ما گال الحبوب كانت سحر تنطيها لعمر بعد ما گالت لفراس قبل
سحر راح أحچيلك كلشي بعد ما أضم عليك الخفت منه صار چنت خايفة فراس يعرف لهذا بقيت ساكته كل ذيچ الفترة أما هسه كلشي أحچي
هو كان مصورني وأني بموضع مخزي وهددني راح ينطي الفيديو لفراس أني گلت أروح للبيت وانطي فلوس وأخذ منه التلفون بس تعاركنا هناك لأن راد شرفي ولله رفضت أني مو ساقطة أني غلطت بعلاقة عابرة ولا خنت فراس
فمن رفضت هجمت عليه وكسرت التلفون من ردت أنهزم انضربت براسي حيل بالباب وانشك راسي وهو ضربني كل أنواع الضرب والتعذيب لحد ما اغتصبني و فقدت الوعي وصحيت على حسون إلي اعتدى عليه بالخرابة
النقيب علي زين من چنتي بالمستشفى شلون چنتي تتواصلين ويه رضا لأن بعض المكالمات ويه رضا لگينه وقتها وإنتي چنتي بالمستشفى
سحر الشرطي إلي بالباب مال الغرفة أني مره صحته بدون ما واحد يحس وانطيته فلوس وخلاني أتصل برضا وبعدين رضا جابلي تلفون وأنطى بيد الشرطي  وضليت على تواصل ويه رضا وكان اتفاق بيناتنه الإنتقام وبس والمقابل انطي فلوس يبدي بيها
النقيب علي شلون إنطيتي فلوس الشرطي وإنتي ما عندچ كلشي لا فلوس ولا تلفون بالمستشفى ولگوچ حتى بدون ملابس شلون حصلتي على هاي الفلوس
سحر من حچيت ويا الشرطي گتله الولد الراح تخابره راح أوصي يجيب فلوس ومن خابرت رضا وحچيت ويا عن طريق تلفون الشرطي گالي عادي أني أنطي فلوس وأجيبلچ تلفون
النقيب علي وشلون گدرتي تقنعين رضا
سحر أكيد لازم يقتنع بعد ما غريته بسوبر ماركت چبير وفلوس يحلم بيها وهو يعرف كلش زين راح أنطيها إله لأن يعرف عندي فلوس ويسميني بنگ متحرك
النقيب علي يعني أفتهم من كلامچ تجربتچ السابقة مچانت سبب تبدين صفحة جديدة ويه زوجچ ومتعضتي منها ورجعتي ويه رضا عادي تحچين ويا وأول شخص ردتي يصير وياچ هو رضا
سحر  لا أني مچنت ناوية أرجع لعلاقة ويا رضا أني ردت رضا وسيلة أنتقم بيها من عمر وهذا إتفاقي ويا و سئلوا لرضا
تباوع على فراس وتكمل كلامها ويه النقيب علي
أني چنت كلش خجلانه من فراس واتمنيت أسوي شي بس أرضي وكل ضني حتى إذا عرف أني إلي انتقمت لشرفي حتى لو كان الخطأ مني فراح يسامحني
النقيب علي اكو هواي أحداث أريد أخذ بيها اقوالج ومن ضمنها مقتل حسون إلي إنتي دليتي مكان رضا بي واغتصاب رهف
سحر ل متعجبة
ليش حسون مات
النقيب علي معقولة متدرين
سحر لا من يمك سمعت  اما رهف فصوچ رضا مو من عندي چان يريد جسمي ونكت بالإتفاق البيني وبينه وگتله العلاقة العابرة القديمة إلي بيني وبينك إنساها أني رجعت لعقلي وأحب زوجي بس هددني ينشر صوري وفيديوهاتي لهذا السبب سويت نفس الشي لرهف حتى ميگدر ينشر ولا يساومني بشرفي
النقيب علي چنت أتمنى اكدر اساعدج بس إنتي ما ساعدتينا بالبداية راح أضطر اخذج ويانه للحجز وبين ما تصعد اوراقچ للقاضي هو يحكم عليچ بس أني راح أذكر تعاونچ ويانه بالقضية وخاصة إذا رهف ما قامت عليچ دعوة راح هواي يتخفف عليچ الحكم لأن تعتبرين إنتي المحرضة على مقتل حسن
سحر تبچي وتصيح بكل علو صوتها
لاااااااااا السجن لاااااااا عفيه أبوس إيدك لتسجني لاااااااا
النقيب علي آسف سحر ولو گايلتلي من البداية چان إنتي  بيتچ اليوم بس أواعدچ راح أكون بجانبچ وأخف حكم تاخذي
يدخلن بنات شرطيات اثنين ويكلبچون ايدها وياخذوها
وسحر تعيط وتبجي
النقيب علي يمشي و فراس يغادرون الردهة
سرى تسأل فراس بعد ما رجع للبيت
بشر شنو إلي صار أكيد رضا كل اقواله كذب
فراس مكسور وعصبي و الجرح إلي سببته إله سحر واضح يرد على سرى
ياريت كان كلامه كذب
سرى لا لا مستحيل گول غيرها فراس
فراس هذا اعترافها هي مو كلامي أني چنت غبي ومضحكة أني نزل راسي جوى الكگع بالطين انوب حتى أطفالي ما أعرف شگللهم
سرى فراس معقولة سحر حبيبتك وإلي هي متحب غيرك تخونك
فراس انوب تغشم روحها وتگول أني غلطت بس مخنت
سرى راح اتخبل ما گاعد يستوعب عقلي البصير
فراس شوفي اكگج تفهمين الأولاد أمهم ماتت بالحادث وأني راح أقطع كلشي بينهم وبين أمهم أريد الهم مستقبل زين وما أريد باجر عگبة واحد ينزل راس ولدي
سرى شلون تحرمهم من امهم وتحرمها منهم حرام عليك حتى غلطت سامحها
فراس لعد شلون أواجه العالم بعارها على الأقل من اگللهم ماتت هي فترة وراح ينسوها بس من يعرفون بالسجن ومسويه البلاوي لا حتى راح يكرهوها أصلا وما أكدر أسامح بالخيانة لأن أحبها و مشفت غيرها ليش أخوتي هي تريدين أسامحها لو أني خاينها چان سامحتني للعلم أني رجال مو مرة وأجيب العار
سرى يعني هذا الحل برأيك تضيع بيتك ونفسك سامح يا أخي خل السفينة تمشي وأني متأكدة سحر تحبك وما راح تغلط بعد لخاطري عندك لخاطر أطفالك سامحها
فراس أحسن حل هذا إلي گلته أني  وبعد لهنا وكافي
سرى وشهد منو راح يبقه إلها بعد ما زوجها مات وعدها أطفال و حالتها كلش صعبة بقت لا أم ولا اب ولا اخت ولا أخ
فراس شهد بس تتحسن وتطلع من المستشفى أني أگوم بواجبي وياها شتحتاج أني اسويلها و ما راح أقصر وياها بشي
سرى هي شلون صارت هسه
فراس بتحسن خاصة بعد ما رجعت ساره وشافتها
سرى شوكت يسمحلها الدكتور بالتلفون أريد اطمن عليها وما اكدر أروح للمستشفى بسبب الأطفال
فراس عن قريب تطلع إن شاءالله
النقيب علي يصيح على رهف وابوها بعد ما دعاهم للتحقيق
أني كم مرة  گتلكم تعاونو ونبهتكم تتحملون كافة المسؤولية
أبو رهف سيدي بنتي مالها علاقة أني إلي گتلها لا تحچين بشي وإنت تعرف الشرف غالي ومو هينه علينا نكلك بتنه اغتصبوها لأن حتى دعوة منقيم على أي أحد بس خلصونه من رضا
النقيب علي إنت ضيعت حق بنتك
أبو رهف سيدي المظلوم حقه ما يروح الله هو ياخذه وشوف گدامك حق بتنه رجع بس عندي طلب سيدي رهف تريد تشوف سحر ورضا قبل لا نطلع
النقيب علي هسه راح أنادي عليهم
بعد ما دخلت سحر الشرطية جابتها
رهف تتكلم وياها بكل حقد وكره
هيجي احسلچ ضيعتي مستقبلچ وضيعتي إسم زوجچ وخليتي بالوحل شستفاديتي هسه شسوالج رضا بعتي زوجچ علمود واحد مهتلف
سحر منهارة واعصابها تالفه ومتكدر تحچي بس تبچي وتگول
إي أني حقيرة ومو زينة بس خل يسامحني فراس  أريد أشوف بنتي سجى إشتاقيتلها صدري يدر حليب أريد ارضعها  عفيه سامحيني وتنازلي على الدعوة حبيبتي ادنك على رجلها
رهف سبحان مغير الأحوال ولچ أني إلي سابقا دنكت على رجلچ حتى تنطيني بنتي ومتخلين ذاك الكلب يغتصبني هسه إنتي ادنگين على رجلي الله يسامحچ أني قمت أي دعوة عليچ تعرفين ليش أريد حسابي وياچ يكون يم القاضي الچبير العادل بيوم العدل من تشوفين فضيحتچ بيوم الحشر گدام مليارات البشر حاولي تتقربين لربچ لأن عندي لقاء وياچ بيوم القيامة
رهف تبچي بعد ما اتذكرت يوم الحادث مال اغتصابها الشرطية الجابت سحر رجعت طلعتها
رضا يدخل لغرفة الضابط برفقة شرطي بعد ما دز عليه الضابط
رهف تباوع على رضا وهي تحاول تبين نفسها منتصرة وممكسورة
هسه احسلك هيجي بعتني علمود هايه ودمرت بيتك وحياتك شوف رضا بعد تتحلم تشوف ليان خليني أني اربيها إنت متعرف تربي راح اگللها ابوچ سافر وبعد ميرجع و رفعت عليك دعوة طلاق وراح اكسبها عن قريب ثق بالله إذا طلعت لو بعد ٢٠ سنة لتفكر تشوف ليان ولا تسأل عليها بس اشوفك تسأل عليها أشرب من دمك ولله أشرب من دمك
رضا ميجاوب ومنزل راسه ورهف وأبوها يغادرون المركز

بعد فترة بقت سحر تسأل على فراس وممتعودة على حياة السجن بعد ما كانت حياتها مرفهة وبعد الضغوطات إلي اتعرضت إلها بسبب الحادثة وإلي صار بعد الحادثة  فقدت عقلها وحولوها لمستشفى المجانين  محد يزورها ولا أحد يسأل عليها وأبنائها عبالهم ماتت وشهد هم عبالها سحر ماتت لأن فراس حتى شهادة وفاة طلعلها وگدر يرتبها ويه ناس عود سحر ماتت بالحادث مال السيارة
أما رضا فإنتحر وهو بالسجن بعد ما خسر مستقبله وعائلته ومستقبله بسبب علاقة ونزوة وغريزة حيوانية
رهف قررت تعيش بيت أبوها وتكرس حياتها لبتها ليان
أبناء سحر يذكرون أمهم وبيچون عليها لكن الزمن كفيل بالنسيان
أما سرى وزوجها قررو يعيشون بيت فراس حتى يربون أطفال فراس
أما شهد فبدت حالتها تتحسن ورجعت لحياتها وكرست حياتها لتربية أطفالها وغيرت حتى البيت متريد شي يذكرها بعد بعمر و إشتغلت ويه فراس بنفس الشركة مالته
اما أبو حازم انحكم عليه ٢٠ سنة سجن والأموال إلي عنده كلها اتصادرت الناس إلي يطلبون أبو حازم جبرو عائلته يبيعون بيتهم ويسددون فلوسهم
أما فراس بالرغم ما سوته سحر بي لكن حبه إلها ما راح وبقه منقوش بگلبه مينام إله يحضن صورتها و كل ما يشوف صورتها تحصره العبرة ونوبات يزورها للمستشفى ويشوفها من بعيد ويسأل عليها ويتابع حالتها بدون ما أحد يحس
إنتهت القصة أتمنى عجبتكم أريد أرائكم حبايب بالقصة
العبرة منها تجنب الخطأ وهاي الفترة بالذات منتشرة الشباب يركضون على المتزوجة ويشوفوها ضحية سهلة ويسمعوها بكلمة أو كلميتن حلوات و بعض النساء يضنون أزواجهم ميعرفون هذا الكلام لكن لو يجون ويذكرون أيام الخطوبة راح يذكرون أكثر من هذا الكلام الجميل لكن بسبب العمل وضغوط الحياة قد ينسى الرجل زوجته بدون قصد
وهاي النتائج لا الولد يخلص ولا البنية
وكما تدين تدان
تحياتي الكم انطوني رأيكم بالقصة
راجعلكم
#الحضرية
رئيكم يهمني
شكرا للمتابعة
تحياتي مرتضى الهاشمي
🌹🌹