أحرار مير قلوبنا مُستحلة / للكاتبة : سَحــاب

9

الجزء التاسع

كيف اتبسم دامني حيل موجوع؟
قالت شفاه اللي قصدني كلامه
مثل الفرح أحيان يأتي به دموع
انا تعودت الحزن بابتسامة

-بيت راجح
جسّار بتلاعب: مانيب محرم لكم لا تسوون لي مشاكل أنا علي من أختي اتصلي على رعود يجي ويأخذكم انتي واختك
مشاعر بتمرد: أخليك تكلم رعود بشرط تأخذني معك لجدي
جسّار بعد تفكير: البسي عبايتك وافتحي الباب
مشاعر وهي تكتب رسالة لرعود: طيب بس البس عبايتي
جسّار بشك: هاتي جوالك من ورى الباب
مشاعر بتلاعب: تحسبني غبية اعطيك الجوال وتتركني وتروح دقيقتين وراجعه لك ومعي روح وشغف
جسّار بتهديد: لو ما كلمت رعود ماراح تطلعين من هالبيت
مشاعر اللي ما ردت عليه وهي تبعد عن الباب وترسل الرسالة لرعود ومضمونها " جوالي مع ولد الفهد لا ترد لو ايش ما يصير لو يحرق الجوال اذا أرسلت لك حرف الميم اعرف اني رجعت اخذ جوالي منه "
أول ما رسلت الرسالة مسحتها و دخلت للبيت وهي تشوف روح وشغف كل وحده فيهم تبكي: شغف قومي جيبي عبايتك وانتي يا روح جسّار برى بيودينا لجدي
روح اللي فزت من مكانها: الحين؟ موجود هو
مشاعر: ايه روحوا البسوا يلا
قاموا شغف وروح يلبسون عبايتهم واستغلت الفرصة مشاعر اللي طلعت لجسّار وفتحت الباب بس ما شافت ظل عند الباب او أحد واقف زفرت بقهر وكانت بتسكر الباب لولا رجل جسّار اللي مدها مانعها من تسكير الباب
جسّار بروقان وهو متسند الجدار: ما رحت يا بنت سعود ماهو انا اللي يرجع عن كلمته
مشاعر بنفس القهر: بتصل لك على رعود دام روح وشغف ما بعد جاوا وأول ما يجون ترجع لي جوالي
جسّار بروقان وهو يهز رأسه بالرفض : مو على كيفك انتي قلتي بتخليني أكلمه عطيني رقمه
مشاعر بروقان : تحسب سهل توصل لرعود؟ انسى ماراح يرد عليك الا لو اتصلت من رقمي وانا عطيتك الفرصة هذي
جسّار بمجاراة : هاتي الجوال
مشاعر عطته الجوال بعد ما اتصلت على رقم جوالها القديم اللي غيرت اسمه لرعود: تفضل
جسّار بابتسامة غريبة : تحسبيني غبي يا بنت سعود ؟
سكر الاتصال اول ما سمع إن الرقم المطلوب غير موجود بالخدمة حاليًا ابعد عن الباب وهو يفتش الرسايل ما لقى شيء انتقل لجهات الاتصال وهو يدور بالأسامي ما لقى الا الرقم اتصلت عليه قبل وخلال تفتيشه للجوال طلعوا البنات اشر لهم على السيارة ولكن سرعان ما غير كلامه
جسّار بنظرات حادّة لمشاعر: شغف هاتي جوالك
مشاعر اللي سكتت بورطة وهي شاكه باللي بيسويه من نظراته لها اللي كانت كفيلة تزرع الخوف في قلب مشاعر و شغف اللي طلعت جوالها من شنطتها وهي تمده لجسّار اللي اخذه وبدأ يكتب الرقم اللي اتصلت عليه مشاعر وعيونه موجهه على مشاعر بنظرات حارقة ما تحملتها مشاعر وهي تطلع قارورة ماء من شنطتها وتنزل لجسّار وبكل برود فتحت الغطاء وهي تصب الماء كله على جوال شغف
مشاعر بحدة: دامك تشك مانت كفو واذا انت ما ترجع عن كلمتك انا ما أقول الكلمة عبث شافت باقي ماء بالقارورة وكملت تصب الماء على جوالها : حتى رعود ما تستاهل تكلمه
جسّار اللي كان يطالعها بصدمة من ردة فعلها رمى الجوالات بالأرض وهمس بصوت قصير : بتندمين يا مشاعر بتندمين
ركب السيارة بدون ما ينطق بكلمه وشغلها وهو يهدي نفسه انه بيعد من الواحد للخمسه لو ما ركبت بيمشي ويخليها وصل للأربعة وهو يسمعها تصك الباب بكل قوتها كتم بنفسه وهو يجمع لها كثير مشى للمستشفى وهو كاتم أعصابه وصله اتصال من جده صارم رفع الجوال وهو يرد ويحطه سبيكر: يا هلا
رمّاح بحذر: ارحب شالاخبار وكيف راجح
جسّار بابتسامة: وصلت انت و مع الصارم بعد
رمّاح بابتسامة متبادلة: سوايا يدك يابو نجد تقول وتطول
جسّار بابتسامة : نورت دارك يا رمّاح وطلبك الثاني بيصير يعني بيصير
رمّاح بابتسامة: ان شاء الله جسّار جدي يسأل عن المستشفى اللي فيه راجح وبشرنا عسى مافيه شيء
جسّار بابتسامة: مافيه إلا العافية بس ارتفع الضغط عنده شوي وهذا حنا رايحين له عطني الصارم يا رمّاح
صارم اللي اخذ الجوال من رمّاح وهو يرد : هلا ابوي
جسّار بعد ما سكر السبيكر: زارك اللي حول 40 سنة ما زارك يالصارم؟
صارم باعتراف: زارني ورايح لراجح اخبره إني ما ظلمته الحياة ما تعطينا فرصتين يا جسّار
جسّار بمنع: ما جاتك الفرصة يا صارم ارجع البيت وأول ما تحين الفرصة بيجيك علمها
صارم برفض: لا يبه الشجاعة ما تجي مرتين
جسّار وهو قصده يمنع صارم: معليه انا اذا رجعت اخذتك له رمّاح توه راجع من السفر خله يرتاح وقل له يروح لضوى الظاهر انها صاحية
صارم اللي اقتنع: خلاص بس اوعدني توديني له
جسّار بثقة: كلمة جسّار يالصارم
صارم اللي يأشر لرمّاح يرجع: تم يبه تم
جسّار: عطني رمّاح
رمّاح اللي اخذ الجوال من جده : هلا
جسّار بابتسامة وعيد وهو يشوف نظرات مشاعر لروح: رمّاح روح عند ضوى في بيتي وقل لها تعطيك مفتاح السيارة اللي عندها وتعال لي المستشفى برسل لك اللوكيشن
رمّاح باستغراب: تم بس
قاطعه جسّار: بدون بس يا بو نجد
رمّاح باستغراب أكبر: معك احد انت؟
جسّار بابتسامة: معي اختي تعال المستشفى ونتكلم
رمّاح بلهفة: روحي يا جسّار؟
جسّار بابتسامة: معي بس الحراس واجد يا رمّاح
رمّاح بابتسامة أوسع: ماهي صعبة يا جسّار ماهي صعبة الله وقلبي معك
جسّار بابتسامة: بحفظ ربي ثم بأمانتي
سكر من رمّاح وهو يفكر يرد الحركة لمشاعر وصلوا للمستشفى نزل ووقف عند الاستقبال وهو يسأل عن غرفة راجح
جسّار برسمية : راجح آل راجح أي غرفة؟
موظفة الاستقبال وهي تعرف جسّار زين: غرفة 103 أستاذ جسّار تفضل
جسّار لف عليهم نص التفاتة لشغف وهو قاصد الكلام للكل : الحقوني
مروا من عند القسم وكان رعود توه طالع من دورة المياه اللي جنب غرفة راجح و أول من لمح رعود كانت مشاعر وأول ما طاحت عيون رعود على شغف جمد مكانه وهو ناسي جسّار وايش يعني جسّار
-عند رمّاح وصارم
صارم بصدّ : وش يبي منك جسّار ؟
رمّاح بابتسامة : سمّ؟ ما سمعتك
صارم بسخرية: ابتسامتك بتشق وجهك ترى للحين ما زوجتك بنت سعود
رمّاح بحب: تنحل يا جدي تنحل ويجيب الله الخير
صارم بحدة: انا للحين عند كلمتي ومانيب خاطب لك بنت سعود
رمّاح باستغراب: بس جسّار قال لي انك موافق
صارم وهو يصدّ عن رمّاح متعمد: موافق على رجعتك ما وافقت على زواجك
رمّاح بروقان وهو ما وده يخرب مزاجه ابدًا: عساه خير يا جدي
صارم بفرحة: رضيت انك ما تتزوجها يا رمّاح ؟
رمّاح برفض: رضيت انتظرها يا جدي
صارم بحدة: طيح الله حظك
صارم اللي ضحك ورجع لروقانه وهو يرجع البيت وشاف بوجهه كايد
رمّاح اللي نزل من السيارة وتسند على الطبلون: وش عنده كايد صاحي هالحزة ماهي عوايدك
صارم ونظراته الحارقة لرمّاح: بيخطب بنت عمه
صارم اللي ضحك من قلبه: هو السعودية تغيرت وصاروا يملكون ويخطبون الصباح جديدة
كايد بفرحة بعد ما انتبه لرمّاح : ارحب مليون ولا يسدون وش ذا المفاجئة يا مليون هلا
رمّاح اللي توجه له يحضنه: الله يبقيك احترت ابارك لك التخرج ولا الزواج
كايد بصدمة: وانت حتى وانت بألمانيا اول من توصله الاخبار؟ وش قصتك انت
رمّاح بابتسامة: مبروك لكل اخبارك ولا يهمك
كايد اللي شدّ على كتف رمّاح: هو انت وجدي تصالحتوا؟
رمّاح بابتسامة: اذا بتنتظرني نسوي زواجنا جميع بعد
كايد باستفسار: تقوله صادق ولا تمزح؟
رمّاح باستعجال: لا صادق عن اذنك كايد عندي موضوع ضروري
كايد بصوت عالي عشان يسمعه رمّاح اللي توجه لبيت جسّار: ماراح تسلم مني بتطيح بيدي و أعرف اخبارك
صارم بحدة: اترك هالخاوي عنك انت قلت لابوك؟
كايد اللي يحك رأسه بوهقه: لا جدي وش رأيك انت تكلمه
صارم بسخرية: ما ودك اتزوج بدالك بعد؟
كايد بعدم فهم: شلون تتزوج بدالي
صارم يهز رأسه بفقدان أمل: انا قايل مافيه من بيت أحفادي الصاحي الا راجح وجسّار وقايد
كايد بإحباط: افا يا جدي وانا
صارم بتعب: رح رح بيتكم وخلني أريح الله يصلحك ويهديك
-عند ضوى
دق الباب رمّاح بشكل خفيف لين وصله صوتها المبحوح: مين؟
رمّاح بابتسامة: ادخل؟
ضوى بشك: ادخل
دخل رمّاح وهو متأكد إنها ما عرفته من صوته أول ما دخل من الباب لحقته صرخة ضوى
توجه لها بسرعة وهو يغطي فمها: اشش أهل البيت نايمين
ضوى بفرحة ناسية همها: متى وصلت؟
رمّاح وهو يشوف ساعته : تو من ساعة تقريبًا
ضوى بفرح: سلامة الأسفار يا عين عمتك انت
رمّاح باستفسار: عين عمتي تقول إنها باكيه طول اليوم مين مزعلها
ضوى بصدق: نسيت الزعل يوم شفتك والله
رمّاح بجدية : وانا زعلت لما شفت عيونك وسمعت صوتك علامك يا ضوى
ضوى بحزن: بتأخذ حقي لو شكيت لك يا رمّاح
رمّاح بزعل: افا ما تعزويتي برخمه بس أشري وربي ما يمسي غير وهو عارف قيمتك
ضوى بابتسامة : حبيبي والله كنت ادري انك بترجع مثل ما رحت رمّاح الشهم اللي ما يرضى الغلط على غيره مثل ماهو ما يرضاه على نفسه
رمّاح بجدية: اتركينا من الكلام يا عمه مين مزعلك ساري؟
ضوى بتغيير للموضوع: وش اخبار الجادل يا رمّاح
رمّاح بابتسامة: جايك وانا ملهوف
ضوى بابتسامة: كيف عرفتها يا رمّاح
رمّاح بابتسامة ناسي هو ليه جاي: عرفتها لما كنت ماسك قضية خلع عمتي أم جسّار من ابوي تدرين هي كانت متدربة في مكتبي اللي اشتغل فيه ما كنت اعرف عنها شيء يا عمه ابد بالعكس كنت استحقرها
قاطعه اتصال جسّار أعطاه مشغول وهو يستوعب ليه جاي
جسّار باستعجال: صحيح عمه الله لا يهينك جسّار يقول عندك مفاتيح سيارة
ضوى باستغراب: ايه موجودة سيارته
رمّاح باستعجال: عطيني إياها
ضوى اللي فزت من سريرها: دقيقه
اعطته المفتاح وتوجه وهو يشوف رسالة من جسّار خلته يجمد مكانه " لا تجي المستشفى تعال لي مركز الشرطة واستعجل يا رمّاح "

-انتهى
الجزء قصير لأنه فيه أحداث ما أبيها تنظلم الجاي أطول بإذن الله
أستودعتكم الله يحفظكم
اكثروا من الاستغفار ...